شەعبان مزوری
زۆر جاران بمن ئەم ئالاڤ و ئارمانجا ژ هەڤ جودا ناکین لەوما خوەندنەک شاش بو رۆژەڤا خوە دکین. لەوما لسەر ئاستێ تاکە کەسی ئەگەر ئەم تەماشاکەین دێ بینین هەر کەس ژمە هندەک ئارمانجێن خوە هەنە و دەما بدەستڤە تینین ئەم ئامادە نینین دەستبەردا بین. ئەڤ پیڤەرە بمن دەرباسدبیت بو کەسێن ئارمانجا وان دەستهەلاتداریە وەک هیڤیەک کەسوکی و ژبەر ڤێ چەندێ دەما ئەڤ کەسە دگەهن دەستهەلاتێ ئامادە نینن بهیچ رەنگەکی دەستبەردار بن.
لڤێرە من دخواست چەند دێرەکا لسەر رومانا جورج ئوریێل ١٩٨٤ بنڤیسم کو لسالا ١٩٤٨ نڤیسیە. ئەڤ رومانە ژ رومانێن دیستوپیا تێ هەژمارتن ( دیستوپیا واتە دوزەخ ). رومان لسەر دەستهەلاتدارێن زۆردار و دیکتاتورە. دەستهەلاتێن خەلکێ دکەن کویلە. لڤێرە ئورێل دڤێت بێژیت کو سەردەما کوشتنا مروڤا نەما چونکە دەستهەلاتداریا دیکتاتور هیڤیێ و بەرخوەدانێ دناخێ مروڤی دا دکوژیت. لرومانێ جیهان هەمی بویە سێ وەلات، ئنگلتەرا، ئەمریکا باکور و باشور، نیوزلەندا و ئوسترالیا بونە یەک وەلات، دویەمین وەلات روسیایە و ئوروپا هەمی، سێیەمین دەولەت چینە ، یابان و چەندین وەلاتێن دی یێن ئاسیا. رۆژهەلاناڤین لگەل ئەفریقیا بیاڤا ململانا ڤان هەر سێ وەلاتانە.
ئەڤ رومانە ل لوندون رویدانێن وێ دەرباس دبن، کو ناڤێ وەلاتی ئوشینیا یە. رومان لسەر رێبەڕێ وێ یە، بو مێژو گەلەک دبێژن پەیڤا برای گەورە کو دەستهەلادارەک پێ هاتیە ناڤکرن بو جارا یەکەمین لڤێ رومانێ هاتیە. برای گەورە کەس تشتەکی ژێ نوزانیت ژ دەرڤەی وێنێن وی کو کولان و راگەیاندن هەمی گرتینە. برای گەورە سەروکاتیا پارتا دەستهەلاتدار دکەت، کو هەمی چەمکێن ژیانێ لوەلاتی لژێر کونترولا وێ نە.
هەلبەت رەوشا لوندون وەک باژێر زۆر خرابە، جەنگە پرانیا باژێری وێران بویە، خەلک برسیە، رویسە و خاسە، ئێش بەر بەلاڤن. لڤێرە پارتا برای گەورە ژ دو چینا پێکهاتیە، بازنێ تەنگ کو ئەو کەسێن یێن نێزیکی برای گەورە هەلبەت رەوشا ڤان هەردەم یا باشە، بازنێ مەزن کو پێکهاتیە ژ ئەندام و لایەنگیران کو پرانیا وان چینا کارمەند و خوەدان پێنوسن، دەنگن، هونەرن نە خرادژین، لێ ما چینا مەزن کو هەمی رەنگێ کارکەریێ و جوتیاریێ دگرە ئەڤە دپیسترین رەوشدا دژین. ژڤی خەلکێ چینا سێیەمین تێ خاستن کو وەلاتپارێز بن، پشودرێژ بن، بێ گازندە بن، بکورتی بەرێ وان ژ داخازێن سەرەکی بدەن تشتێن حەزوکی.
تشتەک دن زۆر گرنگ ئورێل بمن پێنڤیس دکەت ئەوژی دەما دبێژیت لسەر برایێ گەورە، ئەڤ گەمژە و ساویلکە لگەل گەمژێن دەوروبەرا خوە بوینە زانا و بسپور تەنها چونکی دەستهەلات هەیە.
ئەم ڤەگەرین سەر هوکمەتا ئورێل و وەزیرێن وێ کو لسەر بنەمایەک دو رویتی کاردکەن، حوکمەتا برایێ گەورە چار وەزارەتن:
وەزارەتا ئاشتیێ کو کارێ وێ خوە بەرهەڤکرن و بهێزکرن بو جەنگێ.
وەزارەتا راستیێ ( راگەهاندن و رەوشەنبیری ) کو تەنها کارێ وێ درەون، سەختەچیاتی یە.
وەزارەتا ئەڤینێ، پۆلیش، ئاسایش و دەزگەهێ سیخوریێ بخوەڤە دگرە.
وەزارەتا بەرفرەهیێ، کارێ ّە تەنگاڤ کرن و برسی کرنا خەلکیێ.
لدوماهیێ ژدل دبێژم ١٩٨٤ رومانەک هەژی خواندنێ یە و فلمەک هەژی تەماشە کرنێ یە
