نێرین

پێدڤیە جڤاك بایکوتا گەندەلان بکەت

میر نێروەیی

گەندەلی واتە بکارئینانا کار یان پۆستەکێ گشتی بۆ مەرەمێن خۆیێن تایبەت کو پێکدهێت ژ (دزینا مالێ دەولەتێ، کنترولکرنا مولکان ، وەرگرتنا رەشوە و بەرتیلان و واستەکاری .. ) کو ب رامانا دزینا مالێ گشتی دهێت کو د کەرتێ حکومی و کەرتێ تایبەت دا دهێتەکرن، د نها دا گەندەڵی دیاردەکا جیهانیە و ل هەر ولاتەکێ د ئاستەکێ جوودا دایە، ل هەرێما کوردستانێ ژی هەر ل سالا ۱۹۹۲ هەیا نها گەندەلی هەبوویە، لێ ژبەر نەهوشیاریا وەلاتیان د بیاڤێ حکومرانی و ئیداریی دا د ناڤ وەلاتیان ب گەندەلی نەهاتیە هژمارتن و “بکێر خۆ هاتی” هاتیە بناڤکرن، لێ پشتی سالا ۲۰۰٥ و بتایبەتی ل سالا ۲۰۰۹ ب ئاوایەکێ بەرفرەهـ و ئاشکرا گەندەلی هاتیەکرن، هەتا گەهشتیە وی ئاستی کو حکومەت و سەرۆکاتیا هەرێمێ ژی نەشیاینە پەردەپۆش بکەن و بەحس ژ هەبوونا گەندەلیێ کرینە بێ کو ریبریبوونەک بهێتەکرن، هەڤدەم رێژە بەرەڤ زێدەیێ چوویە، یا زەلال و بەرچاڤە خودانێن سەرێن گر و باژێرێن ئاکنجیبوونێ و دونەمێن عەردی و بلوکێن دولاری ب کەدا خۆ نەگەهشتینێ و بەری سالا ۱۹۹۲ تێر ب زکێ خۆ نانێ هشک ژی نەدخوار ن، ئەم هەمی باش هەڤدوو ناسدکەین و دزانین کی چ بوو و شیانێن هەرکەسەکێ چبووینە. ل هەرێما کوردستانێ یەکەم پێنگاڤا توشبوون ب گەندەڵیێ وەرگرتنا پۆستەکێ حزبی یان حکومی یە، هەیا پۆستەکێ ژی وەربگری پێدڤیە عەشیر رێگر نەبیت و ئاغا رازیبوونێ لسەر بدەن و خودان زوور مرۆڤ بیت ئانکو خەلک یێ پێڤەگرێدای بیت، دەما ب عەشائیری کەس دبنە خۆدان پۆست و دەولەمەندببن واتە لسەر حسابا تە دهێنە دانان، پێدڤیە ب عەشائیری چارەسەر بکەی، ژبەرکو تو د جڤاک و ناخێ خۆ دا عەشیرگەری، د دەمەکێ دا کو یاسا یا غایبە و چ دەورێ خۆ نینە د ڤان بابەتان دا، پێدڤیە هەر کەسەک ژی ژ خۆ دەست پێ بکەت، بەرێخۆ بدە مالبات و گوندێ خۆ کی گەندەڵە؟ هەمی د دیار و ئاشکرانە، و هەمی ب مالێ تە یێن ستوور بووین، کەسێن بڤی ئاوایی دز هێژایی سەرەدەریێ نینن و شەرمە تێکەلیێ دگەل بکەی و ژ وێ شەرمتر ئەوە کەسەک مەلاقی و خوشکاندنێ بۆ دزێ مالێ خۆ بکەت!. پێدڤیە جڤاک ژ کەسێن گەندەل رزگار ببیت، هەیا هوون گەندەلان چارەسەر بکەن، پێدڤیە هووین وان ریسوا بکەن، د هەمی جڤات و سمینار و خرڤەبوون و شاهی و تازی و هەلکەفتان دا تێکەلیێ دگەل نەکەن، خزماتی و ژن و ژنخوازیێ دگەل نەکەن و بازاران دگەل نەکەن، هەر دەما بناڤێ مروڤانی و نیشتیمانی ئاخفت پشتا خۆ بدەنێ، بێژنێ ” گەندەلان مافێ ئاخفتنێ نینە “، هەردەما هاریکاری پێشکێشکرن نەکەنە قاڕەمان د مەردینیێ دا و هاریکاریان ژێ نەوەرگرن، تو چەند نزیکێ وی بی خۆ ژێ دوور بکە، ب کورتی پێدڤیە جڤاک بایکوتا گەندەلان بکەت، و هەمی تێکەلبوون و سەرەدەریان دگەل قوود بکەن، هەتا هەست ب بیانی بوونا خۆ بکەت، و خەلک ب هووری چاڤدێریا رێڤەبەریێن میری بکەت، هەر بەلگەکێ گەندەلیێ ژ رێڤەبەراتیەکێ دیت، ل سوشیال میدیایێ بەلاڤ بکەن، دەما هوشیاریا جڤاکی دگەل گەندەلی و گەندەلان گەهشتە ڤی ئاستی، حکومەت ژی دێ وی کەسی لادەت و نەچار بیت پێداچوونێ د خۆ دا بکەت و بڤی ئاوایی دێ نەچار بیت کەسێن ژ هەژی ب دانیتە جهێن هەژی، کەسێن پۆستان ژی وەردگرن جورئەت ناکەن گەندەلیێ بکەن. پشتراستیێ ددەمە هەوە هەیا گەندەلی چارەسەر نەبیت، بزانە دێ بەردەوام خەلک توشی کریزێن دارایی و نەبوونا مووچە و خزمەتگوزاری و وەلات وێرانیێ بیت، لێ هەر دەما گەندەلی چارەسەربوو، بزانن ئەگەر بەغدا پارەی ژی نە هنێریت دێ رەوش ئاسایی بیت و رۆژ بۆ رۆژێ بەرەڤ پێشڤەچن، ئەڤجا هوون ئازادن د هەلبژاردنا ڤان بژاردان دا.

پتر به‌رچاڤ بكه‌
Back to top button

ئه‌ڤ مالپه‌ره‌ cookies بكارتینه‌ . ژ بو به‌رده‌وام بونا ب كارئینانا ڤى مالپه‌ری . پێویسته‌ تو بكارئینانا مه‌ بو cookies ب په‌ژرینی 

Close