سەردار هێتوتی
ساڵەکا تژی کار بوو، خەو نەمابوو، گوند بۆ گوند، باژێر بۆ باژێر، ل کەسێن شاهرەزا و ئەکادمی دگەریان دا کو ل سەر هەموو بویەر و پێدڤیێن چەرخێ نوی کاربکەن و کوردستانێ بگەهینن گۆپیتکا سەرکەفتنێ، وان دەست ژ موچێ خۆ یێ بەردای، وان حکومەتا نەچار کری بهێتە سەر خەتێ و ئێدی ئەو رازی نابن زورداریا لسەر خەلکی یا بەردەوام بیت، وان سێ یان چار یاسایێن پێکگوهرک ژ بۆ قەیرانا ئابووری ل کوردستانێ د بەردەست دانە، ناهێلن چ جارێن دیتر چ کەس و لایەنەکێ سیاسی خۆ بفروشیتە ژێر و ژوور، وان یاسایا گران یا پەژراندی کو دڤێت حزبێن کوردی دەستا ژ جاشاتیێ بەردەن و ئێدی نابیت مافیا وەڵاتی برێڤە ببەن، وان ئاستێ خاندنێ د 2020 دا یێ گەهاندیە ئاستێ وەڵاتێن پێشکەفتی چونکی دگەل چاڤدێریا یاسایا ساڵا بووری ئەوێن شیاین کو د 2020 دا وێ یاسایێ بچەسپینن و چاڤدێریا برگە برگە بکەن، ئاها دا ساخلەمیێ ژبیر نەکەین وان فشار یا ل وەزیرێ ساخلەمیێ کری کو نابیت کەرتێ ساخلەمیێ ببیتە کەرتێ حزبی ئوو ل من ببورن کەرتێ تایبەت چونکی دێ زیان گەهیتە وەڵاتیان و دڤێت نەخۆشخانێن نەخۆشیێن گران ل سەر هەر سێ و نیڤ پارێزگەهێن وەڵاتی بێنە دابەشکرن. وان پەرلەمانێ زاروکان یێ دانای و مافێ ژنێ یێ بریە گۆپیتکێ و ب یاسایێن سەردەم ژینگەها پاراستی و کەرتێ تایبەت یێ ل ژێر دەستێ حزبان ئینایە دەر و هزار و ئێک کنر ژی یێن کری یێن کو نەهێلایا میدیا های ژێ ببیت داکو ژ وان خراب نەبیت، لەورا وان ب وی نیڤ موچێ دوو هەیڤا جارەکێ باشترین ژیان یا کری.
