نێرین

مه‌ترسیێن هشكه‌ساڵیێ

سه‌ردار هێتوتى

من ل ڤێره‌ مه‌ره‌م ب هشكه‌ساڵیا بێ بارانیێ نینه‌، چونكى ئه‌گه‌ر باران بهێت یان نه‌هێت ل ڤى وه‌ڵاتێ د ناڤدا دژین چ جداهى نابن، نه‌ گرنگه‌ دێ به‌رهه‌مێ جوتیارى چلێهێت، نه‌یا گرنگه‌ دێ ئاڤ كێم بیت و ژێر خانا ئابوورى دێ د مه‌ترسیێ دابیت، چونكى جوتیارى به‌رهه‌م هه‌بیت یان نه‌ دێ گومرك هه‌ر ل سه‌ر ڕێپێدانا كارێن خۆ بن و قه‌ت ڕێكێ ژ به‌رهه‌مێ بیانى ناگرن ژ به‌ر كو وان مافیایا ب تنێ چاڤ ل به‌رینكا خۆیه‌، ئاڤ هه‌بیت یان نه‌، ئاڤا ریباران ب هه‌روه‌ بچیت یان نه‌ ما وان چ خه‌مه‌ چونك بۆ وان ئاڤا دڵوپكرى ل تركیا و ئیرانێ دهێت و خه‌ما وان بنیاتێ ئابوورا ڤى وه‌لاتى نینه‌ و دێ هه‌ر به‌رهه‌مێن خۆ ل ده‌رڤه‌ ئینن دا كو گومركێ پێ وه‌ربگرن. هشكه‌ساڵیا من پێ مه‌ره‌م، نه‌دانا وى موچه‌یه‌ یێ كو خه‌لك ل سه‌ر ڕاهاتى و خه‌لك فێرى ماسى خارنێ بووى، ئه‌وان خه‌لك ب ڤى داهاتێ كێمبهاڤه‌ گرێدایه‌ و هێدى هێدى خه‌لكى ل سه‌ر نه‌دانا وى ژى په‌روه‌رده‌ دكه‌ن هه‌تا كو سالێَََََََ دبیته‌ ئێك موچه‌. ده‌ما هشكه‌ساڵیا دراڤى چێبوو، و ڕێكێن كارى ژى لبه‌ر خه‌لكى د گرتى بن، ل وى ده‌مى جڤاك دكه‌ڤیته‌ د مه‌ترسیێ دا چونكى ژ ئه‌نجامێ فشارا ده‌روونى و ژ نه‌چارى و نه‌بوونا ڕێكێن قورتاڵبوونێ دێ خه‌لك په‌نایێ به‌نه‌ به‌ر خۆكوشتنێ و ژ بلى ڤێ ئێكێ یێن مایى ژى دێ ل سه‌ر دراڤێ كێم یێ د به‌رده‌ست رازى بن و هنده‌ك ژى دێ ڕێكا ده‌ریا ئیجه‌ گرنه‌ به‌ر و دێ به‌ره‌ڤ ده‌رڤه‌ى وه‌ڵاتى ڕه‌ڤن. ل ڤێره‌یه‌ هشكه‌ساڵى په‌یدا دبیت و وه‌ڵات ژ قه‌یرانێ به‌ره‌ڤ قه‌یرانا مه‌زنتر دچیت و كه‌سێن كارزان و رێزان ل وه‌ڵاتى دچنه‌ ده‌رێ و دێ هشكه‌ وه‌ڵاته‌ك ل سه‌ر رویێ عه‌ردى ب ناڤێ كوردستانێ ب تنێ مینیت.

پتر به‌رچاڤ بكه‌
Back to top button

ئه‌ڤ مالپه‌ره‌ cookies بكارتینه‌ . ژ بو به‌رده‌وام بونا ب كارئینانا ڤى مالپه‌ری . پێویسته‌ تو بكارئینانا مه‌ بو cookies ب په‌ژرینی 

Close