كوردستانینێرین

شەپرزە

سەردار هێتوتی

د ناڤا ڤێ گێلەشۆکا دەست چێکری، ڤان قەیرانێن دومدرێژ، ڤێ خۆلیسەریا بەردەوام چ جارا ئەلندا ئارامیێ و دلرحەتیێ ل ڤی وەڵاتی ناهەلێت، پشکا زێدە ژ خەلکی د ناڤا فکارێن بێ ئەنجامدانە، هند ژ وان دترسن ژ پاریێ نانی و هند ژ هەبوونا خۆ دترسن و ترسا گەلەکان ژی زاروک و نفشێ دیڤدایە. قەیرانا هەرێمێ کو ب قەیرانەکا دەستچێکری دهێتە ل قەڵەم دان ب ساڵان ڤەکێشا، ڤێ قەیرانێ هەستا مرۆڤبوونێ ل نیک تاکێ کورد نەهێلا و کرە ئێخسیرێ دراڤی و پاریێ نانێ لبەر دەستێ پارتێن سیاسی، ڤان قەیرانان هەستا نەتەوایەتی و شورەشا ب دەهان ساڵان و خوینا شەهیدان کرە قوربانی موچەکێ دوو هەیڤان جارەکێ و ڤێ قەیرانێ زێدەتر برینا برینداران خوین ژێ بەردا و ئەو نەچاری کارێن نە ژ ڕێزێ کرن. حکومەتەک د دەما هەفت ساڵان دا دشیان دا نەبیت مللەتی برێڤە ببەت بۆ چ یا باشە؟، ئایا نابیت ناڤێ وێ د پەرتۆکا گێنس دا ب نەعلەت لێکری بهێتە قەلەم دان، ئەو حکومەتا زێدەباری دەهان بیرێن نەفتێ و چەندین دەرگەهێن سنووری و فروکەخانە و باشترین عەردێ چاندنێ دەما نەشیت موچە دابین بکەت ژ بۆ چ یا باشە؟ د ناڤا گێلەشۆکا دەستچێکری دا گەل ل هەڤ دویر کەفتیە و بێ باوەری ل نیک وان دروست بویە و ژ هەبوونا خۆ یا سوبەهی دترسن و چ نەمایە ژیانا خو دەستان ژێ بەردەن و ب کۆم قەستا رەحما دەریا ئیجە بکەن و ژ ڤێ دوزاخا لسەر عەردی خۆ خڵاس بکەن. لەوما دڤێت ب هشیاری کار بۆ ئارامکرنا دەروونێ خەلکی بهێتەکرن و ڕەوشا وان یا ئابووری باشتر لێبکەن و ڕێکێن خۆ خودانکرنێ ژ خەلکی نەهێنە گرتن و حکومەت ب هەمی پێناسێن خۆڤە ببیتە حکومەت دا خەلک ژ شەپرزەییێ خڵاس ببیت.

پتر به‌رچاڤ بكه‌
Back to top button

ئه‌ڤ مالپه‌ره‌ cookies بكارتینه‌ . ژ بو به‌رده‌وام بونا ب كارئینانا ڤى مالپه‌ری . پێویسته‌ تو بكارئینانا مه‌ بو cookies ب په‌ژرینی 

Close