کرمانج هاریکی
وەك پرسیار، ئەرێ بو پ ك ك ل باشور خو قایم کریە؟ ئەرێ ما باکور نە مەیدانا شەرێ وێیە؟ باش بو فزززە ل باکوری لێ ناهێت؟ بوچی شەری دیپورتی باشور دکەت؟ ئەڤ پرسێن من ئازراندی کەس وەسا تێنەگەهن کو ئەز یێ ب دژی هەلویست و دیروک و تێکوشانا پ ك ك مە .یان ئەز بەرگریێ د هەلویستێت مافیایی یێن پارتی و یەکێتی دکەم.
لێ ئەڤ پرسەکە وژدانیە دڤێت دەهان پرسێت دی درێیا ڤێ پرسان دا بینینە ئورتێ. وەکە ۱ ـ ئایا هەبونا پ ك ك نەبویە ئەگەرێ پاراستنا ئەمنا قەومی یا کوردی؟ ۲ ـ ئایا پ ك ك روحەکا بەرگری کرنێ د کەسایەتیا مروڤێ کورد دا یا نارەڤ ئاڤا نەکریە؟ ۳ ـ ئایا تورکیا راستە بەس دوژمنێ پ ك ك یە؟ یان هەمی گەلێ کورد ل هەر درەکا دونیایێ ب دژی خو دزانیت؟ ٤ ـ ئایا ئەگەر پ ك ك نەبا دا کورد وەکی ئەڤرو بنە ناڤ ل سەر ئاستێ جیهانێ؟ ٥ ـ ئایا بێی سەرخوبونا یان دەستوری کرنا کوردستانا باکور ئەم دشێین ل باشور ببینە کیان؟ ٦ ـ ئایا ئەگەر پ ك ك و پەروەردا روحی یا ئاپوچی نەبا دا ئەو بەرخودانا ل روژئاڤایێ کوردستانێ هاتیە کرن دا ل دایك بیت؟ ۷ ـ ئایا هەکە پ ك ك نەبا دا هەدەپ و کورد ل پەرلەمانێ تورکی بونا وان هەبیت؟ ٨ ـ ئایا پ ک ک ئەجیندایەکا تورکیە وەکی گەلەك کەس وەسا دهزرن؟ ۹ ـ ئایا هەکە پ ك ك نەبا چارەنڤیسێ خەلکێ شنگالێ دا چ بیت؟ ۱۰ ـ ئایا د هەمبەر تەنگاڤیێن باشور تێکەتی ل سەر دەمێ داعش پ ك ك هەلویست هەبو؟ ۱۱ ـ ئایا د جەوهەرێ خودا پ ك ك دەڤ ژ پروژێ خو یێ کوردستانی بەردایە؟ ۱۲ ـ ئایا جهەکێ فەرتر ل باشورێ کوردستانێ هەیە کو پ ك ك بگەتە بنکە و بارەگا و سەربازگەهـ بو بزاڤا خو؟ یا ژ من وەرە دڤێت هەر ئێکێ ل مە وەک کەسەکێ لیبرال و سەربە خو دور ژ هەژمونا هزرێن کلاسیکی یێن سیاسی ل دیڤ بەرسڤەکا راست و دیراسە کری یا ڤان پرسان بگەرین. ئەڤ لێکولینێن ل سەر ڤان پرسان دهێتە کرن دێ ئاسویەکێ رون یێ ئاستێ تێگەهێ کەسێ کورد بو پێشەروژێ دەتە مە. بێگومان هیچ حیزبەکا سیاسی ژ بلی حیزبێت ئیسلامی ل کوردستانێ هەمی نێگەتیڤ نینە . هەر وەسا چ حیزب و لایەنێن سیاسی یێن پێرفێکت بێ خەلەتی ، شکەست و سەرکەتن ژی نینە. لێ پیویستە کەسێ کورد یێ روناکبیر هندەکی ئەندیڤیدوێلانە و لیبرالیانە د بوارێ روناکبیرکرنا جڤاکێ دا کار بکەت. داکو بکاریت ئاسویەکێ رون بو پەروەردە کرنا کەسایەتیا مروڤێ کورد دەستنیشان بکەت. هندی رەوشەنبیریا مە یا کوم و کولەکتیڤ بیت ، ئەم دێ د بن هەژمونا عەقلێ وتارا ئولی دابین. ئاراستێ هزرینا مە دێ یا نێگەتیڤ و یا پاشڤەرویی بیت. هەردەم دێ هزرا مە د رابوردوی دا کار کەت. ئەم نەشێین و نکارین خو ناس بکەین. کەسایەتیا خو ل خانا درست دا دانین. بێگومان پ ك ك یا کاری پرانیا قورسایا خو بێخیتە سەر ئاڤاکرنا کەسی ، د وارێ کەسی دا یێ کار کری. ئەرێ هەڤبەرابەر کرن د گەل هیز و حیزبێت دی یێن هەرچوار پارچێن کوردستانێ پ ك ك ب رێژەیا چەندێ ل وان حیزبا د ئاڤاکرنا کەسایەتیەکا هەمەلایەنی ڤە چەند سەرکەتی تر بویە؟ ئەرێ پارتی و هەمی حیزبێت کلاسیکی یێن نە خودان ئەیدیولوجیەکا رون کارینە کەسەکێ کوردێ ل دویڤ ستاندارێ کەسایەتیا پێگەهشتی یا جیهانی یا شورەشگیر و دەست پاک ئاڤاکەن؟ ئەز دبێژم نەخێر. ئەو دیروکا هەشتێ سالی یا سیاسی ل کوردستانێ ب گشتی ژ بلی پ ك ك چ لایەنێت دی ب شێوازێن زانستی و ل گور ستاندارێ شورەشگێریا جیهانی د کەسایەتیا کورد دا کار نەکریە. هەر هەمی حیزبێن کلاسیك ب پارتی دیموکراتیی کوردستان ڤە هەول نەدایە کەسەکێ ئازاد ئاڤا بکەن. هەردەم د سەر رابوردوی و دیروکا شوێلی د کەسی دا یێ کار کری. مروڤەکێ بەنی و گێل و گوێرایەل یێ بەرهەم ئینای. گرێدانا وی ب بریارا کولەکتیڤ ڤە بیت. هەردەم خودان خودانەك بیت و مولکێ فلان خوداوەندی بیە. لەورا پێداچونەکا عەقلانی و دیروکی یا فەرە ئەم د دیروکا خو یا هەشتێ سالیا بوری دا بکەین. ئاسویێ سەد سالیا بهێت ببینین . ل سەر پێشەروژا روئیایا ئاپوچی ل فەلسەفە و ئێتیکێ جڤاکێ و کەسی بنێرین. ل گور وان پرێنسیپێن ئوجەلانی بو پەروەردە کرنا کەسایەتیێ د کەسێ نیشتیمانیێ یێ کورد دا دارشتی کار بکەین. دا بکارین کەسەکێ بەرخودێر و ب هێز ئاڤا بکەین. هەکە ئەم بێین بەراوردەکێ د ناڤبەرا کەسایەتیێ کورد یێ ل سەر پرێنسیپێن کلاسیک و ئەلەکی (فطری) خوزا ئاڤا بوی بکەین د ناڤبەرا وی شورەشگێرەکێ عەقلیەتا جەمعی کولەکتیڤ و ئەو کەسایەتیا پ ك ك ب پرێنسیپێن زانستی یێن زانستێ جڤاک ناسیا ل گور ستاندارێ جیهانی پەروەردە بوی، دێ کیش کەسایەتیێ ب کەسایەتیەک شورەشگێر و خودان شیانێن گورانکایێ بینین. بەلێ راستە و کەس وێ ئینکارێ ژی ناکەت کو زەمینەیا پ ك ك تێدا چێبوی یا جیاوازە ل وێ زەمینە و رەوشەنبیرا پارتێن مە یێن باشور و روهەلات و روژئاڤا یێن کلاسیک تێدا چێبوی. راستە پ ك ك ل کەش و هەوایەکێ دژوارێ هەڤرکیا بلوکێ ئیمریالیزمیی و بلوکێ سوسیالیزمی د د دەولەتەکا رەگەز پەرستا ناتویی د بن کارتێکرنەکا نزیك ل تێێگەهـ و رەوشەنبیریا لیبرال یا ئەوروپی ل دایك بو. لێ پارتێن مە یێن دی یێن سیاسی هەمی بوییێ عەقل و رەوشەنبیریا خومالی یا کولەکتیڤە. دامەزرێنەر و بیرمەندێن مە پرنیا وان دەرچویێن زانستێن ئولی و د بن هەژمونا کولەکتیڤیا رەوشەنبیریا مزگەتێ دا بون. ل بەرهندێ ئاست و روئیا و دیدا وان دێ یا جیاواز بیت. بێگومان ئەو جیهانبینیا مودێرن یا دونیا دیدەیا ئاستێ هشیاری یا جەمامەرێ پ ك ك ێ هەی بلند تر و خودان بەیاڤەکێ بەر فرەهـ ترە بەراورد د گەل حیزب و لایەنێت دی. لەورا لێگەریانا بەرسڤا پرسێن من و خودێ دیدا من یێن هەژی بەرسڤدان و ل سەر راوەستانێنە. کەسێ کورد دڤێت بێتە مەیدانا خو خواندن و خو پێناسەکرنەکا وژدانی . زەمینەیا پێشەروژا خو بەرەڤ ئاسویێ لیبرالیەتا کەسی ببینیت. کار بو ئاڤاکرنا کەسایەتیەکا پێشەروژی بکەت. هەر تنێ رابوردویێ خو یێ پاشڤەرو و بوگەن و تەژی کارەسات نەبینیت. دیرووکا رابوردو لەشەکێ مریە. لێ دیروکا داهاتو ئەم وەکی هەر ئێک د جهێ خودا وەکی کەس لێ بەرپرسیارە دیروکەکا زێندیە.
