كوردستانینێرین

ژیان هەمان جوت پێلاڤێن ڤان گوگە

شەعبان مزوری

باوەر دکەم کەس ژمە نینە گەلەک جاران چاڤێ وی  بکتەک یان جوتەک پێلاڤێن دریای نەکەفت بن، لسەر گیفکەکی، لبەر دەریێ مزگەفتەکێ، لکێلەکا تەختەکی، ددەستێ پنیدوزەکیدا یانژی لبەر دەرێ سەرشویەکێ. بکورتی پێلاڤێن کەڤن و دریای زۆر هەنە لێ لڤێرە بومن پرس ئەوە بوچی ئەگەر کەسەک بخوازیت کەسەکی بشکێنیت دێ بێژتێ تو ژ پێلاڤا من کێمتری؟ پرسا دوێ بوچی تابلویا هونەرمەندێ هولەندی ئەرنست ڤان گوگ ( ١٨٥٣\١٨٩٠ ) جوتێ پێلاڤا دەنگڤەدا؟

ئەرێ گەلو ما د زۆر چیروکاندا باسا دەنگێ پێ لەشکەرێن جودا لجیهانێ نەهاتیە کرن؟ لەشکەرێ باش واتە جوت پێیێن باش، واتە جوتەک پێلاڤێن باش، سەهما لەشکەرا شپ شپا گاڤێن وانە لەوما لەشکەرێ هێتلەر پێلاڤێن خوە بنێ وان تایبەت چێدکرن ژبو دەنگەک تایبەت ژێ دەرکەڤە. پێلاڤ بخور زیندانا پیایە ژ لایەکی، لێ ژ لایەک دن نیشانا هێزا لەشێ لسەرە لەوما ژکەڤندا خەلکە زۆر پیتە ب پێلاڤا کریە.

ئەگەر مروڤ بوژدان تەماشەی زۆر کەسا لدەوروبەرا خوە بکەت کو تێنە ناسکرن رەوشەنبیر، نڤیسکار، هونەرمەند، هەمی شیان و هونەرا خوە خستینە د خزمەتا کەسەک کالفام، بێ وژدان، ستەمکار، وەلات وێرانکەر…. هتد ژ فێلێن کرێت و زیانبەخش. باشە گەلو ئەڤ توخمە جوتەک پێلاڤا تینن؟ بمن نە، ڤێجا نوزانم بتە چەوایە. نڤیسکارەک وەک دوستویڤسکی لرومانەک خوە، لسەر زمانێ قەهرەمانەکێ رومانێ دبێژیت ( شکسبیر جوتەک پێلاڤا نایی نیە ). گوتنەک بڤی شێوەی دبیت گەلەک ئنگلیز ئێشاند بن، لێ هەمان دوستویڤسکی دبێژیت کارکەرێ تەوالێتێ پاکدکەت زۆر باشترە ژ کەسەک وەک پوشکین. راستە دبیت کەسێن تێرخواری پێ نەخوەش بیت لێ زکڤالا، ریس و پێخاسا، بەرەڤاژی ئاها ئەڤ هەلویستە ژ روناکبیرا دڤێت. رەوشەنبیر ئەوە یێ بازارێ لسەر مافێن گشتی نەکەت، بەلێ بملیونا کەس هەنە خوەدان ناڤ و دەنگن لێ گەلەکا گوتیە وان، هون جوتەک پێلاڤا نائینن، لێ باوەر ناکەم روژەکێ کەسەک گوتنەک هوسا بێژیت مارکس یان دوستویڤسکی، چونکە وان هەمی ژیانا خوە تەرخانکر ژبو گازیا هەژارا بلند کەن.

جوت پێلاڤێن ڤان گوگ هندەک دبێژن وی ئەو پێلاڤ ژ بازارا کەڤنەنیا کری بو لپاریس، پاشان دانان بەر بارانێ و د هەریێ ڤەدان و تابلویا خوە چێکر، هندەک دی دبێژن نەخێر پشتی پێلاڤا کەڤن کری، روژەک باران پیاسە پێکر لکولانێن پر هەری لپاریس و تابلویا خوە چێکر. بمن تشتەک گرنگ نینە پێلاڤ چەوا هاتن بەردەستی لێ یا گرنگ ئەوە بوچی فەیلەسوف، هونەرمەند، مێژونڤیس زۆر گرنگی دان ڤێ تابلویێ.

جوتەک پێلاڤا یەک ژ ماسترین فەیلەسوفێن سەدا بیستێ وەک فەیلەسوفێ ئەلمانی هیدجەر کو تێ ناسکرن یەک ژ پێنج فەیلەسوفێن هەرێن ناڤدار لمێژویا مروڤایەتی ل پیشانگەهەکێ ل ئەمستردام سالا ١٩٣٠ جوتلێن ڤان گوگ هوسا ددەتە ناسکرن، ئە یێن جوتیارەکێ نە، رۆژ و کارێن وێنە، وەک مروڤ بێژە ڤێ پێلاڤێ برێ دئێخیت ل ئەتمەسفێرا گوندی دا. هەر چەندە زۆر بوچون هەبوینە لسەر ڤان جوت پێلاڤا لێ تێگەهشتنا من یا تایبەی بو رامانا پەلاڤێن ڤان گوگ ئەوە کو چەندی پێلاڤێن تە بێ سەروبەر بن، پیر و لاواز بی دەستبەرداری رێکا خوە نەبە. بو من پێلاڤ نیشانا بەردەوامیا لێگەریانا ئاسویە.

پتر به‌رچاڤ بكه‌
ڤێژی ب بینه‌
Close
Back to top button

ئه‌ڤ مالپه‌ره‌ cookies بكارتینه‌ . ژ بو به‌رده‌وام بونا ب كارئینانا ڤى مالپه‌ری . پێویسته‌ تو بكارئینانا مه‌ بو cookies ب په‌ژرینی 

Close