شەعبان مزوری
ئەز باور دکەم ئەڤ بابەتێ من وێ بو گەلەکا چاڤەرێ نە کریبیت ئەگەر بێت و بخوینن. بابەتێ ڤێ خانما گوتی کو گەلەک جاران قوپی کریە، هەما بێژە بو بەنیشتێ دەڤێ هەمیا، بابەتێ پەرستگە و چایخانا، گوتارا مروڤێن ئولی و بابەتێ هەرێ گەرمێ هەمی جورە نڤیسەرا. تشتێ کرێت نەما نەهاتی گوتن، یا ژ هەمیێ بالکێشتر هەمی بابەت وەک هەردەم تێکەل بون. ژ هوکمەتا هەرمی تا دگەهیتە لایەنێن سیاسی و دامودەزگەهێن میری، کەس بێ تاوان نەما و وەک هەردەم نڤشتیا چارەسەریێ د دەستێ هەمیا دابو ژ دەرڤەی لایەنێن پەیوەندیدار.
بەری بچم ناڤ بابەتی دخوازم بپرسم گەلو هون دوزانن کو پەیڤا قوپیا ژ کوپیا هاتیە؟ بباوەریا من ژ باکورێ کوردستانێ هاتیە ڤەگوهاستن بو پارچێن دی یێن کوردستانێ. ئەگەرا ڤێژی هاتنا ماکینا کۆپیکرنێ بو وەلاتێ تورکی بەریا وەلاتێن دی یێن کوردستان لسەر هاتی پارچەکرن، وەک ئەم دوزانین کوردێن باکور دبێژن ئەمریکا ( عەمەریقا )، کرون ( قرون ) لەوما دراستیدا ئەڤ پەیڤ هاتیە کرێتکرن یانژی کرێت هاتیە بکار ئینان.
ژ دل دبێژم دڤیا مە هەمیا دەست خوەشی لوێ خانمێ کربا یا دانپێدان کری بشاشیەک لژیانا خوەیا خوەندنێ دا. گەلو چەند ژمە هەنە ڤەکری بو خەلکێ باخڤن لسەر کارەکێ خوەیێ چەوت ل قوناغەک ژیانا خوەدا؟ ئەرێ بو ئەڤ خانمە نەبیتە نمونەک جوان بو سەرەتایەک تازە ژ ژیانا مەیا جڤاکی؟ گەلو ئەڤە نە ئەگەرە کو مروڤێ کورد ئەستەمە دانپێدانێ بشاشیەک خوە بکەت؟ ئەڤ جورە رەفتارە نینن کو مروڤێ کورد بو شاشیێن خوە پەنا ببەت بەر هەمی جورە بوهانەکێ؟ ئەڤ و زور پرسێن دی دڤێت خەلکێ ئەڤ خانمە بو خوە کریە ئارمانج هزر لسەر کربا.
ئەم گازندێ دکین کو بەرپرسێن مە ژیێن میری، رێکخستن و مالێ دانپێدانێ بشاشیێن خوە ناکەن و دەما کەسەکی دانپێدانانژی کر، دیسان دێ گازندێ کەین، باشە لڤێرە پرسەک رەوا تێ پێش، کەنگی ئەم دێ دەستخوەشیێ ژ دل لکەسەکی کەین؟ ژبو جڤاکا مە پێشڤە بچیت و بگەهیت پێشەنگێن جیهانێ دڤێت ئەم وان کەسێت دانپێدان بشاشیێن خوە دکەن ئەگەر خەلات نەکین نابە بهیچ رەنگەک بباوەریا من رەخنە بکەین ئەگەر ئەوی کەسی زیانەک کیانی نە گەهاندبیت کەسەک دی.
هەر دڤان روژادا هێرشەکا بچەقو هاتە کرن بو سەر ئەندامێ پەرلەمانێ عیراقێ ژ فراکسیونا گوران دوکتور غالب موهەممەد، بێگومان ئەڤ هێرشە و هەمی جورە هێرشکرن بو سەر هەر کەسەکی ئەز شەرمزار دکەم و بتاوانەک کرێت و هوڤانە بناڤ دکەم، لێ لڤێرە بوچی کەس ژ مە قوپیا دوکتور غالب رەخنە نەکر؟ تو بێژی ژبەر وێ بیت دوکتور غالب ئوپوزسیونە و ئەڤ خانمە بپشتەڤانیا پارتا دەستهەلاتێ پوستێ خوە وەرگرتی یە؟ یانژی دبیت کارتێکرنا مێژیێ جڤاکا زەلامسالاری بیت کو بو زەلاما هەمی تشتەک رەوایە؟
دوکتور غالب وەک ئەندام پەرلەمانێ عیراقێ کوژمەک پارەی هەیڤانە وەردگریت لسەر ناڤێ پاسەوانێن خوە لەوما ئەڤ هێرشە چەندین پرسا بو من دوروست دکەت: بوچی پاسەوانێن وی لگەل نەبون؟ ئایا ئەو دەستبەرداری وێ کوژما پارا بویە یاکو تێ خەرجکرن ژبو پاسەوانا؟ یانژی دوکتور غالب ژی قوپیا دکەت وەک پرانیا ئەندامێن پەرلەمانێ عیراقێ وی کوژمێ پارەی ددەت لایەنێ خوەیێ سیاسی؟ دبیت وەک بەشەک دی ژپەرلەمەنتارا ئەندامێن مالا خوە، یان چەند نیاسێن خوە وەک پاسەوان نیشان ددەت؟ بمن ئەگەر دوکتور غالب قوپی نەکربا، کەسەکێ بتەنێ بچەقویێ نەدشیا هێرش بکەتە سەر، چونکە وێ دەمێ وێ پاسەوانێت وی رێگربانە.
بکورتی و بکوردی چاکی ژ دەف کێ بێت دڤێت دەست خوەشیێ لێ بکەین و چەوتی ژ دەف کێ بێت دڤێت شەرمزار کەین.
