كوردستانینێرین

ڤایە بهار دیسان هات لێ؟

هەستیار ئاریانی

ساڵڤەگەرا رۆژا سەرهەلدانا ئادارێ جارەکا دن پڕس وبیرئانین وهیڤی وئێش وژانان لبەر چاڤێن مە دەرباز دکەت، پشتی بورینا سیهـ ساڵان وەرن دا هەڤبەر بکەین دگەل ژیانا مە د رۆژا ئیرو دا، ئەرێ دێ چ ژێك جودا کەین؟ و چ بینین؟ گەلوو ئەڤ بوو!!! هزر وئارمانج وهیڤیێن گەل ومللەتەکی کو ب مەردینی هەر تشتەك دایە پێشکێشکرن ژبۆ ئازادی وخوەسەری وهەبوونا ناڤێ وەلاتێ خو کوردستانێ ئەرێ مە دڤییا ژ دەستێن داگیرکەرەکی رزگار ببین دا نەکەڤینە داڤێن هندەك داگیرکەرێن دیتر، ژ کوچکی ئەم چوین ناڤ تەنورێ ئانکو ل جهێ داگیرکەریا ئیراقێ کو ئەم ژ وێ ژی خلاس نەبۆین داگیرکەریا تورك وئیرانێ ژی هاتە سەر، ژ دەستهەلاتیا دژمنێن عەرب ودارودەستەکێن وان ژ جاش وکرێگرتی وخوەفرۆشان، ئیرو جاش وکرێگرتی وخوەفرۆش ودویڤەلانکێن تورك وئیرانێ ژێ زێدەبوون. سامانێ سەر وژێر زەڤی دبەرێ دا ل ولاتێک مە ژبۆ گەل ومللەتی نەبوو،نها ژی بئاوایەکێ زێدەتر وسیستەماتیك ل بەر چاڤێن مە برن ودزین وتالانکرن. دبەرێ دا دژمنی بئاوایەکی نەراستەوخو ونەبزانابوون ئەم هاندایین کو پتڕ گرێدای ئاخ وئارمانج وناسنامە وکولتورێ خو بوین ژبەر ستەمکاری و زورداریا وان، لێ ئیرو دەستهەلاتا کو نوینەریا هەمی داگیرکەران دکەن، تاك وجڤاك بێ هیڤی و دل سارکرن ژ هەر تشتەکی و پاشەرۆژ ژێ ل بەر جاڤان رەش وتاریکرن، تاکو وێ رادەیێ کو هێز وئەنەرژیا پاشەرۆژا گەشا گەل و مللەتی کو گەنج و لاون وەك نەڤیێن نوی تەقاندن و رەڤیان و گەهاندن وێ بێ باوەریێ کو خەندقین دناڤ زەریا و دەریا دا پێ باشترە بچاڤێن زل بەرێ خو بدەنە برینێن کۆل، ونەڤیێن کەڤن ژ خەبات وکەد وتێکوشینا وان پەشیمانکرن. چاند وزمان و دابو نەریتێن کەڤنارێن ڤی وەلاتی دهێتە قڕکرن و ژناڤبرن، کولتورێ داگیرکەران پتڕ جهێ خو دکەن، ژن و جوان بێزارکرن و ژهەر رەنگێ ئازادی و خوەناسکرنێ زڕبارکرن وهزروبیرێن بیابانێ بناڤێ ئسلاما سیاسی وئسلاما دخزمەتا دەستهەلاتێ دا کلوخ و مەژیێ هەر کەسی رەش وتاریکرن، و هەر دەنگێ ئازاد کو ڤان دیمەنان دبینن و کەلا دلێ خو درێژن وبێژن، دەڤێن وان گرتن و دناڤ زیندانا دا دارزاندن. وکار وکەد وبەرهەم ئانین هاتنە قڕکرن و بێکاری بەربەلاڤە داکو بەرهەمێ دژمنان بدارێ زورێ ل سەر مە و دڤێت نەڤێت بهێتە سەپاندن، هەژاری و ستوخواری ودەست کورتی رۆژ بو رۆژێ رێژەیا وێ هەر بلند و زێدەتر دبیت. سەرهەلدانا کو بەرهەمێ دەستێن گەل ومللەتی بخوبخوە یە کو بخوینا کور و کچێن وان هاتیە نەخشاندن وبتولا سەدهان ساڵان ئاگرێ وێ هاتیە هەلکرن وشاراندن، پارت ولایەنێن سیاسی نەتێ و نەژێ ، کرنە یا خو وگەل و مللەت ژێ زڕباکرن. دئەنجام دا دڤێت نەڤیێن نۆی بەرهەمێ کەد و تێکوشینا باب و کالێن خو ژ دەستێن نوکەر و دز وتالانکەران دەربێخن و ژبۆ هەمی گەل ومللەتی ڤەگەرینن، وسەرهەلدانەکا دیتر بهەلێخن وب شارینن داکو ئەم ژێ بهێن رێزا گەل ومللەتێن ئازاد وهەرتشتەك رەوایە ژبو ئازادی و روومەت وسەرفەرازیێ

پتر به‌رچاڤ بكه‌
ڤێژی ب بینه‌
Close
Back to top button

ئه‌ڤ مالپه‌ره‌ cookies بكارتینه‌ . ژ بو به‌رده‌وام بونا ب كارئینانا ڤى مالپه‌ری . پێویسته‌ تو بكارئینانا مه‌ بو cookies ب په‌ژرینی 

Close