كوردستانینێرین

سەرهلدان و دەرئەنجام پشتی سيهـ ساڵان

تارق حسو

 سەرهلدان رامانە ئێگرتن وبەرخودانا مللەتانە دژی ستەمکاری و حکمرانیا دکتاتوريا وەڵاتان، وەکو ئەم هەموو دزانين مەها ئادارێ لجەم مللەتێ کورد يا تژيا ژ خۆشی ونەخۆشيان، ئێك ژوان سەرهلدانا نۆت وئێکێ يە، ئەڤ ساڵ دبت سيهـ ساڵ لسەر دەربازبوونا سەرهلدانا باشورێ کوردستانێ  دژی ستەمکاريا ژێما ژناڤچویی، لێ ئەگەر ئەم رەخنێ لخوە بگرين ئەز باوەرناکەم  گونەها وێ پتربت ژ خێرا ئەم دئينين زمان،  پسيارەك دهێت پێش ئەرێ دەرئەنجامێن ڤێ سەرهلدانێ چ بون؟  گەهشتن کێرێ؟  گەلۆ مە چکر؟ ئەرێ ئەوە ئەڤی مللەتێ خۆليسەر ڤيايی وبەرهەمێ تەڤگەرێن کوردی ژخەبات وشەرێ جەکداریا سەد سالێ گەهشتا قوناغا دەستنيشانکری ئەوا ما پێخەمەتی وێ ب هەزاران قوربانی داين ژبلی ئاڵانکرن و ئەنفال، دەربەدەری، وکيمياباران، مالوێرانی و… هتد وهەر بێژا بدوماهيك ناهێت.

سەرهلدانا باشورێ کوردستانێ ل بەهارا ٩١ ئەز پيرۆز دنەرخينم ، لێ دەرئەنجامێن وێ وەکو بەرهەم ددەستێ چەند کەسێن خوە دانێن حوکمران لناڤ پارتێن کوردستانی دا ب تاڵانکرن ولەوتی ددەم خوياکرن، چونکی دەما بەری سيهـ ساڵە مە ٩٥% ژئاخا پيرۆزە کوردستانێ رزگارکر، لێ ئيرۆ بورينا هندە قەدەر ساڵان مە ٥٥% ئەڤ پيرۆزیا ژدەست دا ژ ئەگەرێ نزانين و لاوازيا عەقلێ خوە،،،  ئەرێ ئەگەرا  سەرەکی ژڤێ دەستدانێ پارتێن حوکمرانێن کوردستانی بون يان دوژمنێن هەرێمی ووەڵاتێن زلهێزبون!!  دباوەريا من دا ئەگەر ئەم پسيارا شــڤان وگاڤانەکی وەڵاتێ خوەبکەين دێ بێژن ئەم سوچ دارين چونکی ئێکگرتنەک نەتەوەيی بۆ ڤيان ودلێنيا ئاخا وەڵاتی  لناڤ پارتێن کوردستانی دا پەيدا نەبو وپەيدا نابت ژی، وهيچ جارەکێ  دبەرهەڤنەبوينا هندەك کەسێن شۆل پێچێبويی لناڤ پارتێن مەدا ئەڤێ رەوشە خراب لسەر ڤی مللەتی لادەن ژبۆ بەرژەوەنيێن خويێن تايبەت، ئەرێ ماقولە؟ سيهـ ساڵ حوکمرانيا هەرێمێ د دەستێن مەدابت برەنگێ دەولەتبوونی ودولار لسەرسەرێ ئەڤان پارتيێن کوردستانی دا ببارت وەکا تەيرۆکێ و ونيڤ ژڤی داهاتی بهێت دزين بێ پسياربهێتکرن ژئێك بەرپرسەکێ گەندەڵ “من أين لك هذا المال”. نکارين هێلا ئەلێکتريکێ دروستبکەن بۆ ڤی مللەتێ مانديبوویی ، يان بکارين دوو پردان، ئەو جادەکێ برەنگێ ئۆتۆبانێ لناڤ بەينا هەر سێ پارێزگەها بهەڤرا گرێبدەت وبکەڤت دخزمەتا گەل دا، ئەگەر ئەم رەخنێ بگرين ودوو گۆتنێن راست بينين زمان قەبولناکەن ودێ بێژن تێکدەرن، وئەگەر بێژن ژکێم دراڤيا وبەرهەمێ خۆمالی هندکا،  ئەز راست نابينم، کا بەرێ خوە بدەن ڤيلە وشقێن بەرپرسێن گەندەڵ ئەوێن سيهـ قات بلندکرین ل هەولێر ودهوک وسلێمانیێ ژبلی کۆجك وديوانێن لسەرێ گران ژبۆخۆشی ولزەتا خوە، ياراست ورەوا،  ها ئەڤا بەرهەمێ وێ سەرهلدانا مللەتێ خۆليسەرا ئەم باحسژێدکەين ب خوينا گەل هاتيە پێش، هندەك تاڵانچيا بدەست خوڤە راکێشاند لسەر کيسێ شەهيدێن کوردستانێ .

ژبەر وێ رەوشا خراب وقەيرانا ئابوری ئەوا نها هەرێما کوردستانێ لناڤ دەربازدبت وخەلکێ مە پێ تەنگاڤبويی ونفرينا لخوە دکەت، دبۆجونا من دا دەستهەڵاتا باشور بۆ دۆست ودوژمنێن خوە وئەڤايە جيهانێ سەلماند ئەم هەژی دەولەتبونێ نينين، وعەقلێ مە يێ دورە ژهندێ، ژبەرکو ئەو رەڤتارا دوژمنان نکاری ئەنجام بدەت ل دژی گەلێ کورد بسەدێن ساڵان هات ئەنجامدان بدەستێن چەند کەسێن خوە دانین بەرپرسێن ئەڤی گەلی وهەتا دوهی سيخور وزەلامێن رژێما سەدامی بون، ئەوژی کوشتن ولاوازکرنا هەستا نەتەويی يە لجەم تاکە کەسێ کورد،  ‌مخابن پشتی سيهـ ساڵان هێشتا عەشيرتکانێ وئەقلێ گوندی لسەر مە يێ زالە وئەم نکارين خوە ژبن ڤی بارێ گران رابکێشين وهەڤدوقەبولبکەين، وەسە خويابو هەر ل دەسپێکە دايکبوونا حوکمرانيا هەرێمێ نەيا سروشتی بوو چونکی پێ خوە شاش هاڤێت وئەوکەسێن نەهەژی ل جهێن هەژێ دامەزراندن، جهێ مخابنيێيە بەهرا پتر ژ رەفيق وکورێن خوين مژێن کوردستانێ کرن پلەدارێن بلند ل سەرۆکانيێ وبزانابوون دژاتيا کورد پەروەرێن نەتەو خوازکرن وهەر جارا ئێک گازنەك بجوك بکەت ژدەستهەڵاتێ ژبەرکو دا وی ڕويێ خويێ ڕەشێ جاشاتيێ پێ ســــــــــــــــپی بکەت، دێ هولێهێت ئەگەر مللەتەك بکەڤت دەستێن هندەك کەسێن بەرژەوەندی خوازو دژاتيا ئەڤی مللەتی کربت ودژيانە خوە دا خێر نە خوست بت بۆ کوردان وئيرۆ ببن رێبەرو پێسوژێن ئەڤی مللەتی بۆ ميناك ئەو کەسێ جارا ئێکێ گۆتنا “جيب العميل” لسەر زمانێ خوە بکار ئيناندی دژی پيرۆزێن کوردستانێ نە خەلکێ باشورێ کوردستانی يە ونها ئەو کەس شيرەتکارێ حکومەتا هەرێمێ يە ل هەولێرا پايتەخت ، يانژی ئەو جوامیرێ هوزانا زێرە سەرۆک مان زێرە بۆ سەدامێ نڤيسی نها پلە خانەشينيێ هەيە وەك “لواء” ل پێش چاڤێن مالباتێن قوربانيێن کوردستانێ. ل داويێ دبێژم مخابن بۆ حوکمرانيا سيهـ ساڵيێ مە نکاری نڤشەك ساغلەم وبژوين ئاڤابکەين وئەڤی مللەتێ مانديبوويی تێربکەين ژبەرهەمێ وێ سەرهلدانا ئەم پێ دخوڕين.

پتر به‌رچاڤ بكه‌
Back to top button

ئه‌ڤ مالپه‌ره‌ cookies بكارتینه‌ . ژ بو به‌رده‌وام بونا ب كارئینانا ڤى مالپه‌ری . پێویسته‌ تو بكارئینانا مه‌ بو cookies ب په‌ژرینی 

Close