رۆژه‌ڤكوردستانینێرین

سەرهلدانا باشورێ کوردستانێ و 30 سالێن حوکمڕانیێ و پرسیارێن بێ بەرسڤ

تەحسین ناڤشکی

پشتی بۆرینا 30 سالێن رەبەق ب سەر سەرهلدانا گەلێ کوردستانا باشووریڤە دژی دکتاتۆرییا حزبا باعس ل بهارا سالا 1991 و حوکمڕانییا خۆیەتی، نها دەم هاتییە هەکە نەبۆری بت کو بەرپرسێن دەستهەلاتا هەرێمێ، ب حزبێن دەستهەلاتێ و ئۆپۆزسێۆنێڤە، هەکە وژدانێن وان ساخ مابن، هندەک پرسیاران ب ئاشکرایی ئاراستەی خوە بکەن و ب وێرەکی بێژنە خوە و رایا گشتی و ئەو ب خوە ژی بەرسڤان بدە: ئەرێ مە بۆ خەلکێ خوە چ تشتێ ستراتیژی کرییە کو سەرخانە و بنخانەیێن وان یێن ئابووری مکوم ببن و رکمانییا نەحەز و نەیاران بکەن؟ ئەرێ هەکە راستە دو ئێداریی ل هەرێمێ نینە، ب ناڤێن دەڤەرێن زەر و کەسک، بۆچی دەڤەرا زەر نەشێت فەرمانبەرەکی ل دەڤەرا کەسک دامەزرینت و هەر وەسا دەڤەرا کەسک نەشێت هاریکارێ رێڤەبەرەکی ل دەڤەرا زەر بدامەزرینت؟ ئەرێ بەردەوامییا قەیرانێن مووچەی، کارەبێ، ئاڤێ و سۆتەمەنییان، نە باشترین گرۆڤەیێ بەربەلاڤبوونا گەندەلیێ و دزیێنە د ناڤ دەمارێن هەرێمێ دا، ژ ئەگەرێ ب کێرنەهاتنا سیستەمێ حوکمڕانییا تنێ دوبەرەکیێ پەیدا دکەت؟ راستە وەک هەر دەستهەلاتەکا تۆتالیتاری، دەمێ دەستهەلاتا هەرێمێ خوە د ڤان جۆرە پرسان نەگەهینت و خەلکەکێ دی ڤان جۆرە پرسیاران ژ سیاسەتڤانێن هەرێمێ دکەت، ئەوێ راستییێ ژی بزانت ژ بەرسڤێ درەڤت و شوونێ هندەک گوهۆڕینێن شکلی کو تنێ د بەرژەوەندییا هندەک کەسان دا، د دیرۆکا حزبێن خوە دا دکەنە بەرسڤێن گومانبڕ و ب باشترین دەستکەڤتی دبینن. هەلبەت ئەڤە ژی خوەخاپندن و درەوکرنە ل پێشیێ د گەل خوە و پاشی دگەل خەلکێ خوە و هەتا خەلکێ نۆرمال و نەهشیار ژی باوەر ناکەت کو حزبێن دەستهەلاتا ژییێ وێ 30 سالی شیایە وەکی پێدڤی خزمەتا خەلکێ خوە بکەن و هەبوونا خوە ل دووڤ دیرۆکا خوە یا درێژ ب ناڤێ خەباتێ بسەلمینن. رەڤین ژ راستییێ و خوە کرنە رەشە ل خەلکێ راستییێ دبێژت، ب هیچ رەنگەکی د بەرژەوەنییا چو ئالییان دا نینە و دەمێ بەرەک و گومتلەک ڤێک بکەڤن، ل دووڤ پیڤەرێ هەر سڤۆرە و بەر و منێن خوە هەر ئالییەک دێ تەمەت گوننەهێن خوە باجێ دەت و زیانڤێکەڤتییێ مەزن، وەک هەرجار جڤاکێ بێ دەستهەلاتە. چو پێنەڤێت دژمنان ژی هەر هۆسا دڤێت کو وەسا سەرکرداتییێن کوردی بۆ خویانی و بیانییان ب رۆخسارەکێ لاواز دیار بکەن کو وان شیانێن رێڤەبرنا دەستهەلاتێ نینن و خەلکێ وان پێدڤی خەلکەکێ دیە، هەکە دێ هەر بنە قوربانییێن بەرپرسێن خوە و دێ د ناڤ کاروانێ دوماهییا دیرۆکێ دا بەرزە بن.

پتر به‌رچاڤ بكه‌
ڤێژی ب بینه‌
Close
Back to top button

ئه‌ڤ مالپه‌ره‌ cookies بكارتینه‌ . ژ بو به‌رده‌وام بونا ب كارئینانا ڤى مالپه‌ری . پێویسته‌ تو بكارئینانا مه‌ بو cookies ب په‌ژرینی 

Close