ردوان گولی
مەها ئادارێ یا پری وتژی هەلکەفتێن خوش ونەخوشن بو مللەتێ کورد،وئەگەر بێژم مەها کوردانە دبیت دەربرینەکا راست ودروست بیت،گەلێن ژێر دەست وزولم لێ کرین هەمی دەمان ب ئومێد وهێڤینە،روژەک دێ هێت وئەلندا سپێدێ دێ هەر هەلیت،دەمێ مروڤ نێرینەکێ لسەر دیرووکا گەلان دکەت ل جیهانێ،دبیت زور جاران تووشی ئەشکەنجەدان وگرتن ومشەختبوونێ ولاوازبوونێ چووینە،بەلێ هیچ جارەکێ مللەت نامرن ودێ هەر گەهن مافێن خوە یێن رەوا،چەندین شورەش وتێکوشین وبزاڤێن چەکداری دناڤ مە کوردان دا ئاگرێ وان هەلبوویە وچریسکێن وان بەلاڤ بوونە،وسەخمەراتی ئازادی وسەربەستیا مروڤێ کورد وئاخا کوردستانێ ب هزاران شەهیدان خوە کریە جان فیدا وقوربانی،ودوژمنێن مە برێکێن هوڤانە ودرندانە سەرەدەری دگەل داخازا مافێن مە یێن رەوا کریە،مینا بکارهینانا زاراڤ وئیدیەمێن ئیسلامی دژی کوردان وەکی پروسێسا هاتیە ناڤکرن ب ئەنفال وبکارهینانا چەکێ کێمیائی وکوشتنا ب کوم وجینوسایدکرن وڤەشارتنا ب ساخ وزیندی وگرتن ودورپێچکرن ووو هەمیان نەشیان مە ژناڤ ببن وقرکەن،چونکە مللەت چ جاران ب کوشتنێ خلاس نابن وبن بر نابن وژێ ب هێزترن،وئەگەر مللەتەکێ ئەڤە دوریشمێ وان بیت دڤێت مروڤ بمرت بو ژیانێ نەک بژیت بو مرنێ ل ڤێ دونیایێ،دێ هەر روژەک هێت وکەلهێن ستەمکار وزوردار دکتاتوران دێ هێنە ژناڤبرن وهەرفاندن، دەمێ تەڤایا کور وکچ ودانعمەر رابن دژی سیستەمێ دکتاتوری وزوردای،ورویدانا سەرهلدان وبەرخودانان دناڤ مللەتێن ستەمبار وژێردەستدا مینا خالەکا وەرچەرخانێ یە ددیرووکا وان دا،گومان تێدا نینە گەلێ کورد بوو دەمەکێ درێژ دبن ستەم وزورداریا رژێمێن ئێک لدویڤ ئێک ل بەغدا ژیایە،خەلکێ کوردستانێ ب هەمی تەخێن خوەڤە هێڤی وئومێدێن باش وگەش هەبوون،مە هزرکر پشتی سەرهلدانێ کوردستانێ دێ بیت بەهشتا سەر دونیایێ ودێ ڤیت شاما شەریف،بەلێ شەرێ براکوژیێ هاتە ئەنجامدان بشێوەکێ هوڤانە دناڤبەرا هێزێن سەرەکیێن کوردی دا،وخەلکی هزرکر ئەڤە کورد هاتن وئێدی دونیا دێ بو خەلکی بیت ئەو بەهشت وژیانا ئاشوپی یا خەلک پێ دهاتە قائیلکرن لسەردەمێ شورەشێ، بەلێ وەسا دیار بوو خەون وخیالێن خەلکی بەروڤاژی دەرکەتن مینا ئەم دکوردەواریێ دا دبێژین کابرا لدویڤ بێهنا کەباب چوو بەلێ بسەر داخدانا کەران هەلبوو ! دەمێ شورەش وخەبات دکرن گەلەک دوریشم وگوتنێت بریقدار وخوش بو خەلکی دگوتن وپێ دخاپاندن،بەلێ جهێ داخێ یە سەرکرداتیا کوردی ئەڤ چەندە بسەرێ خەلکی ئینایە تا هندەک بێژن خوزی کێن سەدامێ دکتاتور ؟! راستە گەلەک کارێن باش وچاک یێن هاتینە ئەنجامدان پشتی سەرهلدانێ بەلێ نە ل ئاست وحەز وهێڤی وخەونێن مللەتێ کورد بوون،ئەڤە(30)سال بورین هێشتا ئەم دوو هەرێمین ودوو حکومەتین ودوو هێزێن لەشکەری وناڤخو ووو،سەرکرداتیا کوردی نەشیان دەزگەهێن دەولەتبوونێ ئاڤاکەن وسەرەدەریێ دگەل هاوەلاتی بکەن دویر ژ پشتگێریا حزبی ومایتێکرنا وان دناڤ هەمی کاروبارێن حکومەتێ دا ژ دامەزراندنا چایچیەکێ هەتا دگەهیت مەزنترین بەرپرس،کورت وکرمانج هەر هاوەلاتیەکێ دگەل پارتی وئێکەتی بیت ئەو هاوەلاتیێ پلە ئێکە وکوردپەروەرە ونیشتیمان پەروەرە،یێ خوە بو وان بهلاڤێژت ودەستان بو بقوتت ئەو فریشتە ویێ دفەلەکا وان دا نە زفریت ئەو ئیبلیسە ! مخابن … ردوان گولی/سوید