ئیحسان ئامێدى
نە يا ڤەشارتيە كو ژ كەڤندا تا نوكە گەڵێ كوردستانێ ستەم و چەوساندن و بندەستى و تەپەسەرى و داگيركرن رەدكريە و ب شێوازێن جوداجودا بەرگرى و بەرخودان و بزاڤ و شورەش و سەرهلدان كرينە ژ پێناڤێ رزگاريێ و ئازاديێ و مافێن خويێن سروشتى. ئەڤ وەڵاتە بناڤی وەلاتێ كورد و كوردستان هاتيە نياسين و تا سەدێ نوزدىێ ژى دەولەتێن كوردى و ميرنشينێن كوردى هەبون، و ەك جارا ئەو هێزێن شەركەر شكاندينە و پاشڤەبرینە و كورد شياينە خو ب پاڕێزن. هةرێما كوردستانێ بەرهەمىَ خەبات و بەرخودان و شورەشێن خەلكىێ وێ بونە هەر ژ دامەزراندنا دەولەتا عيراقىێ تا سەرهلدانا بهارا سالا 1991 ێ دەمێ ب هەڤرا جەماوەرێ كوردستانا باشور ب كارلێكى دگەل هێزێن وێ يێن سياسى د چواڕچوڤێ بەرەيێ كوردستانى دا هێرش كرينە سەر سەنگەڕا و بنگەهێن دژمنى يێن لەشكەرى ئەمنى و هەوالگیڕی يێن سەركوتكەر و ب سەرێكدا ئيناينەخارێ و هەمى گوند و باژير ژ هەمى هەبونێن داگيركەر و سەركوتكەر د ماوەكى دیاڕ دا رزگاركرين و ئالا ئازاديىَ و سەربەخوييىَ بلندكرى. سەرهلدانا بهارا سالا 1991ێ گوپیتكا گەشەبونا خةباتا رزگاريخوازا گەلێ باشورێ كوردستانێ بو، دەمێ كارلێكيا شەرێ چەكدارى دگەل خەباتا روشەنبيرى و ميدياى و جەماوەرى هەڤگرتى و پێناڤى رزگاريا كوردستانىَ پێناڤى مللەتى و جەماوەرى سەڕهلدان كرى و وەلات رزگاركرى. زەمينا سەرهەلدانێ ژ ئەنجامێ كومەكا هوكارێن نافخويى و دەرەكى بو، و سەركردايةتيا كوردستانى پێشبينيا لاوازبونا رژێماما دكتاتورى و دامەزراوێن وێ يێن سەركوتکەر كر و د چارچوفێ بەرنامةكێ دارشتى ژ لايێ سەركردايەتيا بەرەيا كوردستانى ڤە نەخشە بو هاتە دانان و هاتە رێكخستن و برێڤەبرن و سەركيێشيكرن، و بەرهەڤيەكا تەواو بو كر. سەرهلدان يا جەماوەرى بو، چونكى تەڤايا جەماوەرێ كوردستانێ مل ب ملێ هێزا پێشمەرگەى پشكدارى تێداكر، و هێزا جەماوەرى ئێکلاكەرا سەركەفتنا خەباتا رزگارخوازبو، و گەلەك جها بەرى هێزا پێشمەرگەى بگەهيتێ جەماوەرى رزگاركر و ئالا ئازاديێ بلندكر. لەوان ژى ب سەرفرازى ڤە ناڤێ سەرهلدانێ كريە سەرهلدانا جەماوەرى، ئەڤە ژى رەوايا خەباتا چەكدارى و شورەشێن رزگاريخوازيا كوردستانێ نيشا ددەت، كو جەماوەرىَ مللەتى ب سەركێشيا بزاڤا بەرەيا كوردستانى خەباتێ بو هەر وان ئارمانجا بكەت يێن بدرێژاهيا سالان شورەش و خەبات بو هاتيە كرن. سەرهلدان وەڕچەڕخانەکا مێژوی بو دژێواڕێ خەباتا رزگاریخوازا گەلێ كوردستانێ و بڤێ چەندێ خويا كر كو ئيرادا مللەتى ژ هەر هێزەكێ ب هێزترە. شكەستنا سەرهلدانێ و كوچا مليونى ژى وێ نيشا ددەت كو گەلێ كوردستانێ ئێدى ئازادى دڤێت و بن دەستيێ قەبيلناكەت. سەرهلدانێ خوياكر كو كەركوك كوردستانە دەمێ سەرپەشكيێن سەرهلدانێ ل ئێفارا نەوروزا 1991ێ ئاگڕێ ڕزگاڕیێ ل سەر كەلا كەركوكێ هەلكرى و نيشا جيهانێ داى هەمى سياسەتێن عەڕەبكرنێ و پاکیانەژادی و سەركوتكرنێ نەشێت ناسناما كوردستانيا كەركوكىێ ژمللەتێ بستينن. سەڕهلدانێ و کوچا ملیونی وەکڕ كو جڤاتا ئاسايشا نێڤدەوڵەتی بريارا 688 ل 5/4/1991 ێ دەربينيت و سنورەكى بو سەركوتكرنا رژێمادكتاتورى دانيت، و دەڤەڕا ئارام بهێتە دروستكرن و پاشى هەڕێما كوردستانێ بهێتە دامەزراندن و دامەزراوێن دەستهةلاتێ يێن خومالى بهێنە هلبژارتن و دانان. بو ئێکەمين جار دمێژويا گەلێ كوردستانێ دا سەرهلدانەكا جەماوەڕی رى يا هوسا يا بهێز بهێتەكرن و بريارەكا نێڤدەوڵەتی د بەڕژەوەندا خةلكێ كوردستانێ دا دەڕبکەڤیت و ثاشى كوردستانى بخو ب ئيرادا خو سيستەمێ ديموكراتى دەستنیشانکەن و هەلبژاڕتنێن گشتى بكەن بو هەلبژاڕتنا ئەنجومەنێ نشتيمانيا كوردستانىَ و دامەزراوێن دەستهەلاتداريێ. هەرێما كوردستانێ بەڕهەمێ خەبات و قوربانى دانا گەلێ كوردستانێ یە .
