رۆژه‌ڤكوردستانینێرین

د سەرەدانا پاپای دە داگیركەر گەفان ل كوردان دكەن پارتێن وان ژی ل هەڤدوو ..!

جەمال چەلكی 

ئەنجامدانا سەرەدانا پاپایێ‌ ڤاتیكانێ‌ بۆ ئیراقێ‌ باوەرناكەم تشتەكێ‌ نەپلانكری بیت یان ژ وەهم و باشایەكێ‌ سەرچاوەیا خوە یا بنگەهین وەرگرتبیت، لگور نێرینا من ئەجیندایێن سەرەدانا وی تایتلێن ڤەشارتی لپشت هەنە، چونكە ئەو چوار جهێن هاتیە دەسنیشانكرن یێن واتەدارن، رەنگە پەیوەندیا خوە ب وان گوهرینان ڤە هەبیت ئەڤێن كو موحتەمەلن ل ئایندە دا ل رۆژهەلاتا ناڤین بهێنە پێكئینان.

بیگومان هەر جهەك ژ ڤان جهان ئەڤێن پاپای سەرەدانكری ل ئیراقێ‌ خوەدیێ‌ ئایدیولوژی و بیروكەكا مەترسیدار یا جیاوازن، هەلبەت پڕەنسیبێن نەجەف لسەر هاتیە ئاڤاكرن زهنیەتەكا پاشڤەرۆ یا مەزهەبگەرایە، دبن كاریگەریا دەسهەلاتدارێن ئیرانێ‌ تەڤدگەرن، هەر وەسا یێن نەینەوا ژی پڕەنسیبێن ناسیونالیستێن راسیستن، داعشان هێزا خوە لڤان دەڤەران وەردگرت، د هن بیاڤان دە دەستێن توركیا د ئاراستەیێن ئەڤێ‌ دەڤەرێ‌ دە دهێنە خوەیاكرن، د دەما خوە دە گەلەك ب رحەتی كرین و فروتن ب ژن و قیزێن ئیزدیان د كرن، ل بەغدا ژی عیراقچیاتی هەیە باوەریا وان ب سیستەمەكێ‌ سەنترالێ‌ رادیكالە، كو ب رێكا هێزێ‌ بێ‌ ل بەرچاڤگرتنا تایبەتمەندیا دەڤەران ل فاو هەتا زاخو دخوازن دەسهەلاتا خوە بدەنە سەپاندن.

سەرەدانا پاپای بو (بەغدا، نەجەف، نەینەوی) ئەم ناكەینە مژارا سەرەكی یا نرخاندنا خوە د ئەڤێ‌ نڤیسارێ‌ دە، گرانیا بابەتێ‌ خوە ئەمێ‌ بدەینە سەر سەرەدانا پاپای بو هەولێرێ‌، دەسهەلادارێن هەرێما كوردستانێ‌ گەلەك ب باشی بەرهەڤیێن پێشەوازیێ‌ پێكئینابوون، مەراسیمێن پێشەوازیێ‌ وەسا دهاتنە دیتن، كو پاپا گەلەك یێ‌ دلخوەش كری، پێكهاتا كریستیانان ب زمانێ‌ سریانێ‌ دگوت ئەم نها یێك هەرێما كوردستانێ‌ و ئەم یێن بەختەوەرین، نوینەرێن كریستیانێن دەڤەرێ‌ بگشتی بەشداری مەراسیمێن پێشەوازیێ‌ بوون، پێكهاتێن كریستیانان بەری نها گرێدانا وان ب كوردستانێ‌ زێدە لەواز دهاتە فورمولەكرن، دڤێ‌ قووناغێ‌ دە گوهارتن هەتا رادەكێ‌ یا د ئاراستەیا وان دە هاتیە پێش، ئەڤە د هندرێ‌ خوە دە خالەكا پوزەتیفە هەم د چێكرنا باوەری و متمانێ‌ د نیڤبەرا پێكهاتێن دەڤەرێ‌ دە هەم ژی بەرسڤەكا ئەرێنی یە بو داخوازا پاپای د بوارێن پێشڤەبرنا پێكڤەژیانێ‌ و هەڤدوو قەبولكرنێ‌ دە.

خالێن هەرە نیگەتیف یێن سەرەدانا پاپای، هەتا ئەگەر مەبەستا وی ژی ئەو نەبیت، لێ‌ نە راستەوخۆ دەستەك دانە ب دەسهەلاتدارێن دەڤەرێ‌، ئەم دازنین كو دەسهەلاتا دەڤەرێ‌ یا دویرە ژ پرسێن یەكسانی و دادپەروەریێ‌، گەندەلی یا گەهشتیە گوپیتكێ‌، ئازادیا ڕادەربرینێ‌ بەردەوام دهێتە بنپێكرن، دامەزراوێن نیشتمانی یێن هاتیە حزبیكرن، دەسهەلات ب تەمامی یا هاتیە مونۆپولەكرن، سیاسەتا ترس وفوبیایێ‌ ب شێوازەكێ‌ موبەرمەج دهێتە پەیرەوكرن، پاپا وەكە كەسەكێ‌ ئولدار و دویر ژ سیاسەتێ‌ ئەڤان مژاران ب ئاشكرایی نا نرخینیت، لەورا ژی ئەڤ جورە سەرەدانە مورالێ‌ ددەنە دەسهەلاتێ‌، كو یێن بەردەوامبن لسەر سیستەمێ‌ خوە یێ‌ نە دادپەروەرانە، د بەرامبەر داژی نەك تنێ‌ هیچ قازانجەك ژبوی تەخ و توێزێن هەژار و زەحمەتكێش نینە، بەلكو زیانێ‌ ژی ب بەرژوەند و تێكوشانا خەلكێ‌ دەستكورت دگەهینیت، دەسهەلات دكاریت بێژیتە خەلكێ‌ خوە تەماشەكەن ئەم د هێلێن دبلوماسی دە چەند یێن بهێزین و مە چاوان ب گرانی سەنگا خوە د قادا نیڤ نەتەوی دە هەیە، ئەڤە مورالا خەلكێ‌ د بوارێن گوهرینێن بنگەهین دە دراكێشیتە بن ئاستێن هەری نزم دە، لداویێ‌ ژی دەرفەتێن هندێ‌ بۆ دەسهەلاتێ‌ دهێنە ڕەخساندن خوە ڕفریش و ئەبدەیتكەن بو پتر بنەجهكرنا سیاسەتا مونۆپولەكرنێ‌.

سەرەدانا پاپای هەر چەندە پتر رویەكێ‌ ئولی پێڤە دیارە، سەرەرای هندێ‌ دەولەتێن هەرێمی د سەری دە (توركیا، ئیران) ژ نێزڤە رەوش د شوپاند، ئەو وەكە وەلاتێن كوردستان د سەردا هاتیە دابەشكرن، سیاسەتا وان دگەل هندێدا نینە ب چ رەنگان رێبوارێن خەلكێ‌ بیانی بكەڤنە هەرێما كوردستانێ‌، ئەڤە ژی ب وێ‌ ئارمانجێ‌، كو هەرێم د هێلا دبلوماسی دە بهێتە دورپێچكرن و دەرفەتێن هندێ‌ نەهێنە پێش سودێ‌ ل رەۆشێ‌ ببینیت.

د سەرەدانا پاپای پولەك هاتبوویە ئامادەكرن وێنێ‌ پاپای و نەخشێ‌ كوردستانا مەزن لسەر هاتبویە نیشادان، ئەڤێ‌ چەندێ‌ رەنگڤەدانێن دژوار یێن توركیا و ئیرانێ‌ لدویف خوە دە ئانین، هەر دوو وەلاتێن هەرێمی نە رحەتیێن خوە ئانین زمان و ژ حكومەتا هەرێما كوردستانێ‌ خواستن ب ئاوایەكێ‌ لەزگین هن زەلالیان بدەنە رایا گشتی، دگەل ئەڤا هەژی هن پارتێن توركیا بێرێزیێن مەزن لهەمبەری نەخشێ‌ كوردستانێ‌ كرن، سەروكێ‌ پاتیا نەژادپەرست یا توركیا (مەهەپێ‌) دگوت: نەخشێ‌ هوون ئیماژەدكەن یێل ژێر پێدمەدا، چ كارڤەدانێن مەزن ژ ئالیێ‌ كوردان ڤە ل هەمبەری ئەوان بێرێزێن هن پارتێن توركیا پەیدانەبوون، لداویێ‌ حكومەتا هەرێمێ‌ دا خوەیاكرن، كو نەخشەیێ‌ كوردستانا مەزن نە پرۆژێ‌ حكومەتا هەرێمێ‌ یە.

مژارا نیشادانا ئەوی پولی توركیا و ئیرانێ‌ هند مەزنكر، گەفە ل هەرێما كوردستانێ‌ خواستن، ئەڤ كەفێن هەنێ‌ ل دەمەكێ‌ دانە، كو چ جاران وەكە ئیرۆ ناڤمالیا كوردان یا پەرت و بەلاڤ نینە، یا باش ئەو بوو، هێزو ئالیێن كوردستانی لهەمبەری ئەوان گەفێن داگیركەران هەلویستەكێ‌ ئێكگرتی هەبایە، لێ‌ مخابن بەروڤاژی ئەڤێ‌ چەندێ‌، لجها هێزێن كوردستانی بەرسڤا داگیركەران بدەن بەربوونە هەڤدوو .. هەولدان پتر ئێكدوو كرێتكەن ..!

نەیارێن كوردان ئیرۆ گەفا ل كوردان دخوازن .. كورد ژی گەفان ل هەڤدوو دخوازن، ل هەرێما كوردستانێ‌ رەوش گەلەك مەترسیدار دهێتە دیتن، سیاسەتا تەكرەویێ‌ ژ ئالیێ‌ هن هێزانڤە دهێتە پەیرەوكرن، هەر ئێك ژوان دخوازیت ب سەرێ‌ سەركێشیا پرسگرێكا نیشتمانی بكەن،ئەڤە بخوە ژی نەخوشیەكا سیاسی یا هەری مەزنە، ئایندە و پاشەرۆژەكا نەدیار د دەتە خوەیاكرن.

گەرەكە ئەم بزانین، كو سەرەدانا پاپای تشتەكێ‌ پلانكریە .. نە وەهمە .. نە كارەكێ‌ ڤالایە .. پرسەكا موبەرمەجە .. مورالەكا بهێزە  هەم د ئالیێ‌ دبلوماسی دە هەم ژی د ئالیێ‌ سیاسی دە، ئەجیندایێن سەرەدانا وی دگرنگن .. دویر نینە تایتلێن ڤەشارتی لپشت هەبن .. رەنگە ژی ب هن جوران گرێدانا خوە ب گوهرینێن نوی یێن رۆژهەلاتا ناڤین ڤە هەبیت .. سەرەدانا پاپای نە لگور دلێ‌ داگیركەرێن كوردستانێ‌ یە .. لێ‌ ئەو ژ دەرڤەی ئیرادا وانە ئەو ب ڕۆلێ‌ رێگریێ‌ ڕابن .. ڕاستی جیهان ئێدی پرسگرێكا كورد ناسدكەت، لێ‌ چارەسەریا وێ‌ نە هند كارەكێ‌ ئاسانە .. چ هێز بتنێ‌ نكارن سەركێشا ئەڤێ‌ دوزێ‌ بكەن .. بلا چ كەس و چ ئالی خوە نەخاپینن، پێتڤیاتیا گەلێ‌ مە ب ئێكگرتن و ئێكرێزیێ‌ هەیە، ژبلی ئەڤێ‌ چ رێكێن دن نینە ..!

پتر به‌رچاڤ بكه‌
Back to top button

ئه‌ڤ مالپه‌ره‌ cookies بكارتینه‌ . ژ بو به‌رده‌وام بونا ب كارئینانا ڤى مالپه‌ری . پێویسته‌ تو بكارئینانا مه‌ بو cookies ب په‌ژرینی 

Close