عبدالرحمن بامەرنی
دا ل بەراھیێ دھندەك زاراڤان بگەھین و لبەر خوە ئالوز نەكەین، سەرھلدان بەرھەمێ گەلە و خەلكی پێ ل جورئەتا خوەدانا و رژێم ژناڤ باژێران راتەقاند، كێ كر و كێ خار؟ ئەو بابەتێ نڤیسینا من یا كورت نابیت.
سەرۆك ئەو كەسەنە، یێن سەركێشییا حزبان دكر و ھەر حزبەكێ لدویڤ قەبارێ قوربانیدانێن خوە و جەماوەرێ خوە سەرۆكێ خوە پێش خستیە و نوكە د پلە و پوستاندانە.
دەما ئەز بەحسا سەرھلدانێ دكەم، ئەز بەحسێ سالا 1991ێ دكەم و سەرھلدان چاوا ھاتەكرن و وی دەمی ئەگەر رێكخستنەك ھەبایە، ھەمی تشتێ مە، دا سیستەماتیك بیت، دا دامەزراوێن مە یێن حكومی بن و حكومەت لێ بیتە خودان، حزبان ژ قەبارێ خوە زێدەتر دەستتێوەردان دكاروبارێن حكومەتێ دا نەدكر، كا تانوكە ئەڤ شینوارە د بەردەوامن..
ئەز بەحسا پشتی سەرھلدانێ دكەم، كو سەركردایەتییا كوردی ب عەقلیەتا چیایی مامەلە دگەل عەقلیەتا باژێری كر، عەقلیەتا چیای مەبەست پێ، ژ خواندنێ ھاتیە ڤەقەتاندن، ژلایێ رژێما ژناڤ چوویڤە دەست ب سەر مال و ملكیەتێ ویدا ھاتیە گرتن و بوویە خودانێ خوە و چنە! دگەل ھەڤبەركرنا عەقلیەتا باژێری، كو خودان باوەرنامەنە و بسپور و تایبەتمەندن. ددەمەكیدا دڤیابایە، ئەڤێ ژ خەباتا چیایێ ھاتیە ناڤ باژێری، باشترین موچە ھەبایە، عەرد دابایێ و خانی بۆ ھاتبایە دروستكرن و ئیمتیازاتێن باش، لێ تا ڤێرە زێدەتر نە چوبایە و ئەركێ وی بدووماھی ھاتبایە و بۆ رێڤەبرنا باژێری، ئەڤ كەسێن تایبەتمەند و خودان شیان ھاتبانە دەست نیشانكرن، ب مەرجێ خوینا كوردان بدەستڤە نەبایە.. باوەردكەم ئەگەر ئەڤە ھاتبایەكرن، گەندەلییا نوكە ئەم ژبەر دنالین سێكا وێ ژی نەدما… لێ مە ئەڤ چەندە ھەمی رەخنە نەكرن، ژبەركو مە دگوت سەرھلدان یا نازكە و یا ژ مەڤە ئەگەر مە رەخنەكر، دێ جارەكا دی ئەم كەڤینە د ئەزموونا بەری 91ێداڤە.
دەما ئەز بەحسا رەخنەكرنا سەرۆكان دكەم، ئەز بەحسا رەخنەكرنا سەرۆكێ ھەرێمێ دكەم و سەرۆكێ حكومەتێ و سەرۆكێ پەرلەمانی و لیستە یا درێژە تا نزمترین كار بەدەست، كو پیروزییا ڤان كەسان تا وی راددەیە ھندێ ئەركێ خوە دروست جێبەجێبكەن. (مەبەستا من ب سەرۆك، نە سەرۆكێن حزبانە و ئەوان پێگەھێ خوە یێ جەماوەری و لایەنگرێن خوە ھەنە، لێ مەبەستا من بتنێ ئەو سەرۆكن، ئەوێن من ناڤێ وان ئیناین، ئەو فەرمانبەرن).
دەما ئەز بەحسا فەرمانبەری دكەم، یانكو ڤی كەسی ترومبێلا خوە یا تایبەت ھەیە، باشترین ترومبێل و جھێ وی یێ كاری ژی ھەمی رێكارێن خوشیێ لێ ھەنە و تا مالا وی و خواندنا زارۆكێن وی و ئایندێ خێزانا وی و ژیانا وی یا گەرەنتیكرییە یان كو ئەو یێ بەرامبەری پوستێ خوە ڤان ھەمی ئیمتیازاتان وەردگریت، ئیمتیازاتێن وی ژی ژ بەرھەمێ سەرھلدانێ نە و ئەو سەرھلدانە من و تە و یێدێ و ڤی خەلكی یا كری، بوویە ئەگەر ئەو د ئەركێ خوەدا یێ سەركەفتی نەبوو، دڤێت وی رەخنە بكەین و (ستوپەك)ێ بۆ لێدەین.
بكورت و كرمانجی یا من دڤێت بێژم، دەما ئەم سەرۆكەكی ژڤان رەخنە دكەین، ئەم یێ فەرمانبەرەكێ ھەرێمێ رەخنەدكەین و ئەو ب دەستكەفتێن سەرھلدانێ یێ بوویە فەرمانبەر، نە زێدەتر.. ئەگەر تە ڤیا كەسەكێ پیروز بكەی، ئەو كێشا ھاولاتیەكێ وەك من نینە، تو وی دبینی ئەندامەكێ حزبا خوە و ئەز دبینم فەرمانبەرەك و سەرھلدانێ ئەو یێ گەھاندیە ڤی پوستێ!!
