رۆژه‌ڤكوردستانی

نه‌ورۆز

محسن عه‌بدلڕه‌حمان

şehriban نەورۆز by Ka.molou


نه‌ورۆز… ئه‌و رۆژه‌ یا ل ئه‌سمانێ‌ ژیانێ‌ هیڤییه‌ك شینووبی، ژ چه‌رگێ‌ تاریستانێ‌ رۆناهی هه‌لاتی..
نه‌ورۆز.. ئه‌و په‌یڤا سێهربه‌نده‌ یا هه‌ستێن مرۆڤێ‌ كورد دئازرینیت، ئه‌ورێن خه‌مان ژ ره‌وانان ڤه‌دره‌ڤینیت..
نه‌ورۆز.. ئه‌و هه‌سته‌یێ‌ گه‌شبینی به‌خشه‌، مه‌ستییا سه‌ركه‌فتنێ‌ گه‌شه‌..
نه‌ورۆز.. ئه‌و چه‌ژنا نه‌ته‌وه‌یی یا كوردانه‌.. نه‌ ئه‌ڤسانه‌ و چیڤانوكا دێوانه‌
نه‌ورۆز..ئه‌و داستانه‌ یا بلیمه‌تیێ‌ گرێكێن وێ‌ رستین..ئاشۆپا به‌ره‌بابان ده‌ست بۆ ده‌ستی هه‌لگرتین و ڤه‌گۆهاستین
نه‌ورۆز.. بۆ ملله‌تان سه‌رساله‌، لێ‌ بۆ كوردان هیڤی و ئۆمێده‌ك نوی یه‌، هه‌ر داگیركه‌ر و خراپكاره‌ك خۆیی یان بیانی هه‌ر ئه‌ژده‌هاكه‌، هه‌ر مرۆڤدوست و ژینگه‌هپارێز كه‌یخسره‌وێ‌ چاكه‌
نه‌ورۆز.. نه‌په‌یاما سرۆشی یه‌، ئه‌و خۆ نویكرن و ڤه‌ژاندنا سرۆشتی یه‌
نه‌ورۆز.. ئه‌و رۆژه‌ یا ب شكاندنا بتان به‌ندین كۆله‌تیێ‌ شكه‌ستین، گیان ژ نه‌زانینێ‌ ڤه‌ره‌ستین، ب مه‌نجه‌نیقا هیزنێ‌ كورد رانای و نه‌مرودی ب ئاگری دادای، ل سه‌ر زارێ‌ كوڕێ‌ ئازه‌ری (ئه‌زێ‌ ئازاد)، میسای سێهربه‌ندێن فیرعه‌ونی دوڕاندین، كرێبه‌ست و رێككه‌فتنێن كۆله‌تیێ‌ دڕاندین، ل هه‌مبه‌ر رۆناهی و گه‌رمییا گۆڕییا ئاگری نه‌ورۆزی، شێخێ‌ خانی مه‌م و زین گه‌هاندنه‌ هه‌ڤ، ئه‌نگۆستیل و سۆز لێكگۆهارتن، بیێ‌ گۆتنا ب زمان و ده‌ڤ، ب ڤیان و دلداریێ‌ ئاگر ئیڤاری كه‌شكر، ب ئه‌لندا ئازادیێ‌ روویێ‌ ئه‌ژده‌هاكان ره‌شكر.
نه‌ورۆز ..نه‌ جه‌ژنا بوون و مشه‌ختبوونا مرۆڤانه‌، نه‌ورۆز یه‌كسانییا ده‌می یه‌، ئه‌و جه‌ژنا سرۆشتی یه‌، نه‌حه‌زان ڤیان ژناڤببه‌ن، كرێتبكه‌ن، ڤارێبكه‌ن.. ژ ناڤه‌رۆكێ‌ ڤالابكه‌ن، لداویێ‌ ژ جه‌ژنا سرۆشتی كرنه‌ ئاگرپه‌رێسی، ژ شۆره‌شی كرنه‌ سه‌ما، ژ سۆتنا داگێركه‌ران كرنه‌ گۆشت براژتن!
دگه‌ل ده‌ستپێكا ئادارێ‌ هنده‌ك ده‌ست ژ هه‌ر تشتی به‌ردده‌ن، و خۆ بۆ هه‌لكه‌فتێن ڤێ‌ هه‌یڤی ته‌رخاندكه‌ن، ژ ره‌خنه‌یێن تێكده‌ر بۆ هه‌ر پیرۆزییه‌كا گه‌لێ‌ كورد، سه‌رهلدان، به‌یانا 11ی ئاداری، كیمیاباران و ئه‌نفال، خه‌له‌كێن زنجیره‌كێ‌ یه‌ بناڤێ‌ برۆژه‌كی (ئه‌مركسرائیلی) لدژی ئوممه‌تا ئیسلامێ‌، ئانكو موسلمان كوردان بكوژن و كوردستانێ‌ داگێربكه‌ن و بسۆژن نه‌ تاوانه‌، لێ‌ كورد سه‌رهلده‌ن و هاواربكه‌ن، ئه‌و دژی ئێكرێزییا موسلمانایه‌، نه‌ورۆز هه‌ما ئاییرده‌یێن گاوریێ نه‌، چنكو موسلمانا تنێ‌ دوو جه‌ژن هه‌نه‌، و ئه‌و ژ بال خۆدێ‌ نه‌ مرۆڤانه‌!
ئه‌رێ‌ ده‌رباروه‌ی ئاییرده‌یا جه‌ژنێ‌ ده‌قه‌ك د قورئانێ‌ دا هه‌یه‌، ژبلی ئه‌وا ل سه‌ر زارێ‌ عیسا پێخه‌مبه‌ری هاتیه‌ گۆتن: (قال عیسی ابن مریم اللهم انزل علینا مائده‌ من السما‌و تكون عیدا لاولنا هو اخرنا و ایه‌ منك ..) سوه‌رتا المائده‌ ئایه‌تا 114. كو ئه‌وژی جه‌ژنا كریستیانانه‌ و كریستیان ژی ئانكو (نصاری)!
 
ئه‌ڤه‌ نه‌ورۆز ل سه‌ر ده‌مێ‌ مه‌مالیكان وه‌كو نموونه‌
مه‌قریزیێ‌ ل چه‌رخێ‌ مه‌مالیكان ژیای، د مێژوویا خۆ دا ڤه‌دگێڕیت، دیارده‌یێن ئاهه‌نگگێڕانا سه‌رێ‌ سالا مسری دیاردكه‌ت، كو ئێك ژ ئاهه‌نگێن مه‌زنێن هه‌موو مسرییان ژ موسلمان و فه‌له‌یان دگێران، هه‌روه‌سا ل سه‌ر ئاستێ‌ فه‌رمی ده‌وله‌تێ‌ هه‌ر ژ چه‌رخێ‌ فاتمی، ب ڤێ‌ هه‌لكه‌فتێ‌ ئاهه‌نگ دگێران و ل ته‌نیشت ئاهه‌نگێن مللی، رادبوو ب به‌لاڤكرنا به‌خشی و نیشانان، ئه‌وا شێوه‌یێ‌ كه‌رنه‌ڤاله‌كا مللی وه‌ردگرت، كو خه‌لك ده‌ردكه‌فته‌ سه‌یرانگه‌هێن گشتی و ئاڤ ل هه‌ڤ دره‌شاند، دیسان كه‌سه‌ك ژ ناڤ خۆ وه‌كو میر بۆ نه‌ورۆزێ‌ د هه‌لبژارد، كو شێلكا وی ل كۆلان و تاخان دگه‌ڕیا و باچ ل سه‌ر خه‌لكی د سه‌پاندن و ژێ‌ دستاندن، و یێ‌ نه‌دابان ئاڤ لێ‌ بژاند
 

پتر به‌رچاڤ بكه‌
Back to top button

ئه‌ڤ مالپه‌ره‌ cookies بكارتینه‌ . ژ بو به‌رده‌وام بونا ب كارئینانا ڤى مالپه‌ری . پێویسته‌ تو بكارئینانا مه‌ بو cookies ب په‌ژرینی 

Close