کوڤان ئەمین
، ئەڤ ڕۆژە ب واتەیا ژ دایکبوونا دادپەریێ و نەمانا حوکمێ قەرەقۆشی و زۆردار و ستەمکار ناڤا مللەتێ کورد دا دهێتە نویکرن و ساخکرن. وەکو دڤێ ئەڤسانێ دا هاتییە دیارکرن ل سەردەمێن کەڤن زوحاکەک هەبوو ب سەربرینا کەنجێن کوردا ژیان دکر و خوینا وان دەرمانێ ئێش و دەرد و کەدەر و نەخوەشیێن وی هاتبوو دەستنیشانکرن، ئەڤە چەند ڕاستە ئەز نزانم. دڤێ چیروکا ئاشوپیدا هاتیە خویاکرن و دبێژن کو زوحاکی سەرێ کەنجێن کوردان دبرین و ب خوینا وان سەرێ خوە دشوشت حەتا ئارامی ڤێ کەڤتبا، کەسەک بناڤێ کاوەیی ئاسنەگەر ژ تەخا هەژار ب کوشتنا زوحاکی پلان دارێشت، ل وی سەردەمی چ هێمایێن ژ ئاگری باشتر نەدیتن کو بشێن بکەن نیشان بوو سەرکەفتنێ دەمێ زوحاکی دکوژت لەوما ئاگر کرە هێمایێ ئاشکرنا کوشتنا زوحاکی و لسەر ئاڤاهیێ کوچکا زوحاکی ئاگرێ سەرکەفنتێ هەلکر! ناڤێ وی باژاری چبوو و کاوەیی زوحاک کوشتبوو ئەز ڤێ ژی نزانم، ئەڤ ڕۆژە وەک نیرۆژ و سەرکەفتن هاتە دیارکرن و ب سەرسالا نەتەوا کورد هاتە دیارکرن ، هەر سال ل ڤێ ڕۆژێ ئاگرێ نەڤرۆزێ وەک هێمایێ نویڕۆژا کوردی هەلدکەن ژ پێخەمەت نەمانا حوکمەکێ زۆردار ئاهەنگا ڕزگاربون و دادپەروەریێ دگێرن، هەرسال ل ڤێ ڕۆژێ جەژنا ئازادیێ دگێرن ب سەرسالا کوردی دهێتە ناسکرن. حەتا ڤێرە چ کێشە تێدا نینن و جهێ ڕێزگرتن و دەستخوشیێ یە ب ڤێ مەبەستێ ئاگرێ سەرکەفتنێ هەلکەن و ئاهەنگ و سەیرانا بگێرن، لێ ئەڤ چەندە هەژی پرسیارکرنێ یە ئەرێ داپەروەری و ئازادی و نویخازی دحوکمرانا کوردی دا هاتییە بەرقەراکرن ئان ژی دەستهەلاتا کوردی وەکو زوحاکەکێ خوین مژ ل هاولاتیەک خوە دنێریت و مافێن وان زەوتکرینە و نادەتێ، ئەرێ داخوازکرنا مافان تیرۆر و سیخوریە، دەستهەلاتا کوردی ناهێلیت ئێک کەس وەکە خوە و دویر ژ بیر و بوچونێن ڤێ دەستهەلاتێ ب ئازادی و پاراستی بژیت، دەستهەلاتا کوردی ژ بەر داخازکرنا مافێن خەلکێ هەژار گەنجێن وەلاتێ مە ب شەش سالێن زیندانکرنێ مەحکوم دکەت. ئەرێ ما هوین ناپرسن ڕۆژێن نویخوازیێ و سەرکەفتنێ لکیژان قۆلاچا ڤی وەلاتی دهێنە دیتن ئان دراڤێ چوونا سەیرانێن نەورۆزی دبەریکێن کیژان هاولاتی دا دهێنە هژمارتن؟ دباوەرا مە دا هەردەمێ مرۆڤێ کورد شیا دخاکا خوە دا وەکە مرۆڤەکێ ئازاد خودان ماف و کەرامەت ژیان کر وی دەمی نیرۆژ و سەرکەفتن و دیلانا کوردانە.
