محمەد چەلکی
ل رۆژەکا وەکو ئەڤرۆ(٩-٤-٢٠٠٣) ئەز ل بەرلینێ بووم، ئەو چەند شەڤبوون هەتا نی سپێدێ ل بەر کەنالێ الجزیرة بووم و گوهداریا رەنگێ پێشڤەچوونا هێزێن هەڤپەیمانیا نێڤ دەولەتی ب سەرۆکاتیا ئەمریکا ل سەر هێزێن سەددامێ دراکۆلا و قرکەرێ نەتەوا کورد دکر.
هەر پێنگاڤەکا هێزێن هەڤپەیمانیان نێزیکی بەغدا دبوون پتر رەنگە شاگەشەیەکێ و هینکاتیەکێ ب سەر برینێن من دا دهاتن چونکو ئەو لەشکەرێ وان رۆژان بوویە پێتڕانکێ هێزێن هەڤپەیمانیان، ل سەر نەتەوا مە خوە وەکو شێرەکێ برسیێ گیانێ مە نیشا ددان و دلۆڤانی خوە ب گیاندارێن مە نەدبر، د وان چرکان دا گیانێ ئەنفالبوویان و دویکێلێ سیڤاندێن گوندێ مە ل بەر چاڤێن من سەمایا تولڤەکرنێ دکر، لێ تول ئەو تولە یا تو ب دەستێن خوە ڤەدکی لێ دیسا ژی من هەست ب سڤکبوونا ئازارێن خوە یێن چەندین ساڵان دکر.
دەما دەبابێن هەڤپەیمانیان ل سەر جسرێ نیڤا بەغدا دهاتن و دچوون، رەف رەف لەشکەرێ سەددامی چەکێن خوە دهاڤێتن و جلکێن سڤیلا ل خوە دکرن و هەر ئێکی دەستەک تزبیێن ١٠١ی هەلگرتن و ل مزگەفتان بوونە دەروێش!
سپیکەرێ جەزیرە هەر چەندە هندەک چیرۆکێن بێ بنەما ڤەدگێران و هانا لەشکەرێ پەرپویتێ سەددامی ددا کو بەغدا بلا ببیتە پێتەسبۆرگا روسی(لینینگرادا سوڤیەتی) لێ هەموو بانگین و هاوارێن وان ببەر ئاڤدا چوون و کەسەکی ئەو بانگەوازێن وان ب دوو فلسێن سۆرێن سەردەمێ پاشاتیا عێراقێ نەدکڕین!
پشتی دەمەکی ژ حڕە حڕا سپیکەرێ جەزیرە لەشکەرێ هەڤپەیمانا گەهەشتە مەیدانا فیردوس کو پەیکەرێ دکتاتۆرێ عێراقێ لێی چکلاندی بوو، پەیکەر کەفت یا ڕاستر ئێخست و ل خەلکێ وێرێ بوو تلیلی و پەیکەر ڕاکشاند و ل رەخەکێ دیێ بەغەدا ئەبو تەحسینێ دلسۆتی وێنەکێ مەزنێ سەددامی دا بەر نعلا و ل دامودەزگەهێن دەولەتێ فەرهود ڕاکرن و هەیلەل وی بابێ وی تشتەکی بۆ خۆ ببەت! ڕاستی ئەو دیمەن چ جارا ژبیرا من ناچن کو من ددیت خەلکێ عێراقێ هندە دژی دەولەت و ئاڤەدانی و پێشڤەچوونێنە! دەولەت ملکێ خەلکێ وەڵاتیە لێ وەکو دبێژن: دەما نیشتیمانپەروەری و وەڵاتپەروەری تەنێ ب پرۆپاگەندا دەزگەهێن ڕاگەندنێ و توقاندنا دەستهەڵاتێ بهێتە بەرهەم و نە ل سەر بنگەهێ وەڵاتیبوون و پاراستنا روومەتا مرۆڤی بیت، هینگێ دەولەت وەک دامەزرێنەرەکا داپلۆسین و سەرکۆتکەر دهێتە هەژمارتن و هەردەما بیڤ بۆ وەڵاتی هەلکەفت، دێ تولا خۆ ژ دەستهەڵاتێ ڤەکەت و هەر چ بکەڤیتە بەر دێ ژناڤبەت چونکو ب ئالەتێن داپۆلسینێ ناس دکەت و ب دوژمن دهەژمێرت.
د وێ چرکە ساتا پەلخاندنا پەیکەرێ سەددامی دا داوی ب وەرزێ دیکتاتۆریەکا ملهۆر و کرێگرتی ئینا و رێ بۆ لەشکەرێ دزان هاتە ڤەکرن و عێراق ژ دکتاتۆریا کرێگرتی بۆ دەولەتا کۆمکێن دزێن تائیفی کەفتە رێ و ئاییندەکێ نەدیار و ڤەقەتای ژ کاروانێ شارستانیێ.
هەلبەت ئەڤا نوکە ل عێراقێ رووددەت بەرهەمێ دکتاتۆری و نەپەژراندنا هزرا ڕکابەرە کو نەشیایە وەلاتیەکێ هەستا نیشتیمانی و وەڵاتپەروەری ل دەف ئاڤا بکەت.
هەردەما دەستهەڵات هەر دەستهەڵاتەکا هەبیت مەرەما وێ تەنێ پاراستنا هێزا دەستهەڵاتا خو بیت، هینگی رەنگێ پەیوەندیێن وەڵاتیان ل گەل دەستهەڵاتێ دچیتە د خانا هەڤنەپەژراندن و دوژمناهیێ دا، ئەگەر وەڵاتیان شیانا هێزا گوهۆڕینا دەستهەڵاتێ نەبیت ژبەر هۆڤەتیا دەستهەڵاتێ و خەتماندنا هەموو بزاڤێن جڤاکی بۆ گوهەرتنا دەستهەڵاتێ ب ئاوایەک ئاشتیانە، هینگێ ل بیڤێن دەرەکە مێزە دکەن بۆ هەلکۆتانا سەر دەستهەڵاتێ و نموونا عێراقێ و لیبیا دیارن و ب مخابنیڤە دەرگەهێن جەهەننەمێ ل وەڵاتیان تاق دمینیت چونکو بەرخوردێ دکتاتۆریێ و دەولەتا پۆلیسی هەستا نیشتیمانی و وەڵاتپەروەریێ دکوژیت وەڵاتیێن فەرهودکەر ب بەرهەم دئینیت.
پیرۆزە رۆژا ٩-٤-٢٠٠٣ێ و نەخشە ل هەموو دکتاتۆرێن کرێگرتی و دوژمنێن هەڤپەژراندنێ و پێکڤەژیانێ.
