کرمانج هاریکی
مخابن کوردێن موسلمانێن توندرەو نەشیانە جودایێ د ناڤبەرا رەخنێ و دژایەتیێ دا بکەن. نوکە باشە ئیسلام سەد مەزهەب و تورقێن سوفیگەریێ یێت هەی، ئەز نزانم و پرسارا من ئەوە تو د سەر کیش دینێ ئیسلامێ تێشی؟ نوکە ئیسلام دینەکێ ب تنێ نینە، هەر مەزهەبەك دینەکە . راستە هەمی مەزهەب قورئانێ د کەنە چاڤگەهـ لێ هەر مەزهەبەکێ خواندنا خو یا تایبەت بو دەقی یا هەی. هەمی مەزاهبێت ئیسلامێ د کوکن کو حەدیسا بوخاری یا تەژی تەحریف و تەزویرە. هەر تەریقەکا سوفیگەریێ ژی دینەکە. هەلگرێن بیر و باوەرێن تایبەت یێ خودا ناسیێ نە. یاسا و رێسایێن خو یێن تایبەت بو عیبادەتی تقوسێن خو یێن هەی. خوزی من دیتی ئیسلام ببا دینەکێ یەکگرتی د چوارچوڤێ هەستەکا مروڤایەتی خو دیتی. ئێکو دو تەکفیر نەکربا. هەڤدو قەتل و عام نە کربا.هەردەم پرسیارەک دڤێت ل بیرا مە بیت ، ئایا موسلمانا پتر کافر کوشتنە یا پتر هەڤدو کوشتنە و بوچی؟ بەرێزان ئیسلام بەحرەکا خوینێیە د ناڤبەرا خودا هزاران کارەسات یێن ب سەرێ ئێك ئینای. ب چەندین جارا ب دەستێ خو پیروز تری جهێ دینێ خ یا ئاگرباران و وێران کری. ئیسلام یا بویە سمبولا ئیرهابێ کوشتن و تالان کرنێ . ب پرسە خالد بن وەلید کیە؟ یەزید بن معاویە و حجاج بن یوسف السقفی و ابو طاهر القرمطی و ابو عباس السفاح و ابو جعفر المنثور و هزارەهایێن دی کینە؟ چ پێشکێشی ئیسلامێ و مروڤایەتیێ کریە. ئەز وەکی مەلایەک د پرسم ئەز ل سەر چ رێ د گەل ئیسلامێ بچم. شیعە بم یان سونە. هەکە ئەز شیعە بوم دازدە ئیمامی بم یا اسماعیلی بم یان زەیدی بم یان عەلەوی بم یان نسەیری بم . دەوەرە دێ هێمە ئالێ سونیا شافعی یان حەنەفی یان مالکی یان حەمبەلی یان ماتوریدی یان ئەشعەری یان موعتەزلی یان اخوان سەفا یان روشدی یان وەهابی یان احمدی یان بەهائی و خودێ دزانیت کا چەند مەزهەبێت دی یێت ڤەشارتی هەنە ژ بلی اخوانێت تروریست و داعشی و قاعیدە و …. دێ د ئیسلامێ بگەهن پاشی وەرن خو بکەنە محامیێ ئیسلامێ کەسێ بەحسێ پیروزیێت ئیسلاما دروست نەکریە . ئەز یێك ژ وان داعیێت ئیسلاما عەقلانی مە . یێ لێدگەرم دا ئیسلامەکا هەڤچەرخ و گونجاو د گەل مروڤایەتێیێ بچیت پەیدا بکەم. ئەڤرو روژ بو روژێ ئیسلام یا کویڤی و ناشرین دبیت. تو نەشێی ئەڤرو ب میتود و تێگەهێ بەری هزار و چوارسەد سالا بهزری. دەستێ خو داننە سەر وژدانا خو بەرێ خو بدەنە پێشکەتنێت جیهانا ئیسلامی کا چ ئینجازات بو خو و بو مروڤایەتیێ هەنە. کا چ داهێنان و بەرهەمێن هەڤچەر بو مروڤایەتیێ هەنە. ل کیرێ و ل کەنگی مروڤایەتیێ خو ب قەرزدارێ عەقلێ ئیسلامێ بزانیت. دڤێت ئەم مەمنونی خودێ بین مە نەفت یا هەی. بینە هزرا خو سوبەهی نەفت نەما یان بەدیل بو دیتەڤە ئەڤ عولەمائێن موختەرع یێن جیهانا ئیسلامی دێ ب چ ژین؟ دێ چاوا جڤاکێ ئاراستە کەن؟ چ پلان هەیە بو جڤاکێن خو؟ نانی دێ ب چ بو ملەتێن خو پەیدا کەن؟ مەلا دگەل رێزێن من بو هندەك مەلا، کا ژ بلی درەوا و خەیالا بەحەشتێ و سێکسی ، عەزابا قەبری دل رەشی و کەرب و کوینێ چ بو خەلکی دبێژن یان خەلکی فێری چ دکەن؟ وەرن دا پرسیارەکێ ل حالێ خو بکەین. چاڤەکێ ب عەقلیەتا خو یا خەیالی دا بخشینین. مە چ کریە بو خو ئەم چ دکەین بو جیهانێ؟ ئەڤ هەمی پرسیارە جهێ تێرامانا کەسێ موسلمانە . بەسە باباغایی ل دیڤ رەوشەنبیرێ عەنجەهی و ئەحمەقێن عەقل هەرزەکار و نەخوش یێن عروبی بکەڤن. ئەڤە هزار و چوارسەد سالە ئەم یێ بلێڤا کانێ زەواجا میتعە و مسوار و سەبیە مەلکت ئەیمان و عەبد گایین حەلالا یان حەرامە. خودێ ئەم بو غەریزێ نە چێکرینە. خودێ ئەم بو هەرەشێ و ترورێ درەو دگەل خو کرنێ ئەم نەچێکرینە. وەرن دا ل عەقلیەتا حەیوانی یا خەیالا بەحەشتەکا نە مەزمون دەرکەڤین. دا ژیانێ بکەینە بەحەشت بو مروڤی و بو مەخلوقێ خودێ. سەرێ خو ل خەوا درەوێت بازرگانێت دینی راکەن . کینە ئەو زانایێت بازرگان یێن یاریا ب هەست و عەقلێ مە دکەن. هەردەم زەلامێن دینی داردەستێت دەسهەلاتێت زالم و درندە بونە. وان مەلایێت بازرگان نەهێلایە مروڤ هشیار ببیت . نەهێلایە مروڤ بهزریت هەردەم هەولا کورەفامیا خەلکی یا دای. راستیا دیروکا خودێ ئیسلامێ ژی نیشا خەلکی نەدایە. هەردەم ئەو کولکە مەلایێن نەزان هەول یا دای مروڤێن هشیار و زانا ل بەر چاڤێن جڤاکێ پیس بکەن. هەردەم هەولا یا دای هزرێن تەنویری و عەقلانی بخەندقینن و بێدەگ بکەن. ب هزاراها زانا و روناکبیر و تتەنویری یێن بویە قوربانی عەقلێ گەنی یێن مەلایێن بازرگانێن ئولی کو ل سەر پشتا خەلکی خو بخودان دکەن. هەردەم خەلك یێ کریە وەسیلا بژێوا ژیانا خو ، کورەکرن و چاڤ گرتنا جڤاکێ پێکولێت وان یێ دل رەشانە بویە. ڤەگەریان بو مەدرەسا روشدی دێ گەلەك کێشە و گرفتێت ئیسلاما کلاسیك و ئەسیرێ دەسهەلاتێن داپلوسینەر چارەسەر کەت. ابن روشد و ابن مقفەع و ابن رەوەندی و ابن سینا و سەهرەوەردی و حەلاج و علی شەریعەتی و نجیب محفوز و فرج فودە و عبدالخالق معروف و ب هزاران هشێن هشیار یێن دی هەولا رزگارکرنا ئیسلامێ یا دای . ژ دەستێ دەسهەلاتێن بوگەنێن بناڤ ئیسلامی و مەلایێن بازرگان و خوفروشێن دەسهەلاتان ، ئەڤ هەڤرکیە هەر یا درێژەڤەکێش و تەژی شەرەنیخە. لێ د داویێ دا سەرکەتن یا هزرا عەقلانی و هشێن هشیارە.تێبینی من وێنێ خو نە ئینایە خوارێ هندی ئەز خو ب جوان و موبارەك دبینم . یان من حەزا خو دەرئێخستنێ یا هەی. من یێ ئینایە خوار دا هەر کەس بزانیت ئەز خو ل هزر و بیرێت خو ناڤەشێرم.
