شەبان مزوری
ژبو ناسکرنا هەر تێگەهەکێ پێویستە بمن مروڤ پێناسا وێ بزانیت. ئەڤ بابەتە وەک گەلەک بابەتێن بەرێ من ئازراندین و بوچونا خوە لسەر دای، وەک بپێتڤی دوزانم کو ئەم وەک جڤاکا کوردی لسەر راوەستین، چونکە بمن ئەڤ تێگەهە کارتێکرنەکا مەزن لسەر پەروەردا مە هەیە و دبنە ستینێن دەرونێ مە، ژێر ئەنجاما ڤێ پەروەردێ ئەم خوەدانێن ئەڤروینە بهەمی چاکی و خرابی، بهەمی هێز و لاوازیێن مە. بمن بنگەهێ جڤاکا تەندوروست ئاڤا نابیت گەر ئەم سود ژ رەوشەنبیریا گشتیا تێگەهێن جیهانی وەرنەگرین و لسەر تێگەهێن تایبەتیێن خوە کار نەکین.
درەو
درەو: ئەو ئاخفتنە کو مروڤەک برێکا وێ پەیامەک بگەهینیت ( گوهدار، خوەندەڤان، بینەر، تەماشەڤان ) کو ئەو بخوە بزانین و بهونەر ڤەدهینیت و راستیا وی بابەتی ڤەدشێریت هەرچەندە دوزانیت راستی چەوایە. دەما مروڤ تشتەک ژ کەسەکی ڤەدگوهێزیت بلا درەو بیت لێ چونکە ئەو مروڤ راستیا وێ نوزانیت نابیتە درەوین. هەمی ئاریشە بچویک و مازن، جەنگ، تالان، کوشتن، سوتن و بکورتی هەمی خرابکاری سەرئەنجاما درەوێ یە. درەو گۆلا گەنی یە، هەر کەسێ کەفتە ناڤ دێ رزیت.
سویند
سویند دو رەهەندێن خوە هەنە، یەک ئولی یە، دویەمین مروڤاتیە، سویند ئەم نوزانین وەک درەوێ بو کویژان سەردەمێ مروڤاتیێ ڤەدگەرە لێ من گومان نینە کو تێشکا درەوێ یە. ژبو ئەولەکاریا خوە خەلکەک خەلکەکێ دن بەرامبەر خوە ملکەچ کری یە سویندێ بخوت، وەک ل دادگەهێ، یان دەما دیدەڤانێ تشتەکی بیت یانژی خوەدانێ کالە و بەرهەمەکی بیت ژبو فروتنێ. تەنیا و تەنیا سویند ب یەک ئامانج تێ بکارئینان ئەوژی کو گومانا درەوێ راکەت یانژی لاواز کەت. لپرانیا وەلاتێن جیهانێ سویند بخوەدێ دبێژن. وەلاتێن فەلە ئنجیلا هەی، موسلمانا قورئانا هەی، لێ لبەشەک وەلاتێن سیکولەر سوند تەنها شەرەف و وژدانە.
من بخوە گومان لسەر راستی یا هەرکەسی و هەر تشتی هەیە، نە گرنگە بابەت چی یە یانژی کویژان کەسە.
باوەری
باوەری بمن واتە مروڤ خوە ئەولەکار دبینە دناڤ هەمی بزاڤ و کارێن ل ژینگەها مروڤی تێنە کرن دبەرژەوەندیا مروڤی دانە، ئانکو ڤان هەمیا دبینە کو هەنە و تێنە کرن ژبو خوەشگوزەرانیا وی. باوەری و تەنها باوەریە دهێلیت مروڤ شاد بژیت. باوەریە دکە مروڤ خەونێن خوەش ببینە و ژ کابوسا قورتال بە. نەمانا باوەریێ واتە ژیانەک شێلی بێ ئاسو و د هەمان دەمدا وەندا کرنا خوە د خوەدا. ئانکو مروڤ خوە پەیدا ناکەت، چونکە هەبونا مروڤی وی دەمی هەیە دەما هەست بژیانا خوە دکەت، هەستێ ژیانێ ژ هەستا ئەولەکاریا هەمی تشت و کەسێن پەیوەندی بکەسێ مروڤی ڤە هەی سەرچاوەی وەردگریت.
هەرفاندن
دەما باوەری نەمینیت هێدی هێدی مروڤ دناخێ خوەدا د هەرفیت، د کەڤیتە رەوشا شیزەفرینی، ئانکو دناخێ خوەدا کێماسی دو کەسان ئەگەر نە زۆرتر دبینیت لەوما ئەم گەلەک جاران دێ بێژین فلان دیاردە ژ لایێ فلان کەسیڤە نە چاڤەرێکری بو، گرنگ نینە ئەو دیاردە سودبەخش یانژی زیانبەخش بیت، چونکە هەر کەس ژمە کەسەکی د کەساتیا مروڤەکیدا دبینیت کو بومە هاتیە نیاسین ب چەند رەفتار و رەوشتا، لێ ئەم ژبیر دکەین کو د کومەلگەها هەرفاندیدا مروڤە بناغێ وێ کو ئەو بخوە هەرفتی یە و بخوە نوزانیت ئە کی یە؟
گەلێ مەیێ کورد پێویستە ژ خوە بپرسە کو هەر تاکە کەس بکێماسی شەڤ و روژەکێ لسەر بیست سویندا دخوت و د هەمان دەمدا بکێماسی چل درەوا دکەت، لڤێرە دیار دبە کو سویند و درەو پێکڤە گرێداینە. چەندی سویند زۆر ببن درەو زۆرتر دبن و باوەی کێم تر دبیت.
ئەستەمە مروڤ بپەژرینیت کو کومەلگەها تاکەکەسێ وێ کێمترین سویندا بخوت، کێمترین درەوا دکەن. ئەز پتر ژ ٣٥ سالە ل ئەوروپا دژیم لێ تا روژا ئەڤرو من نە دیتی یە کەسەک ئەوروپی رەسەن د وەلاتێن پێشکەفتی دا یەک جار ژی سویند خوار بیت، لێ هەمبەر وێ من زۆر کێم درە ژی گوهلێ بوینە یان دیتینە.
سویندا ژ درەو واتە نە مروڤ بون. بەشەک ژ مە هەمیا هەیا ئەڤرو لبیرە چیروکا سەروکێ ئەمریکا بیل کلینتون ل دوماهیا سەدا بیستێ لگەل مونیکا لوینسکی. لەهەمی پروسێسا وێ چیروکێ کلینتون خوە بێ تاوان نیشان ددا، لێ دەما گوتنێ دڤێت سویندێ بخوی کو ژ راستیێ دەرناکەڤی، دانپێدان کر بتاوانا خوە. بباوەریا من کلینتون نە ژ ترسا خوەدێ و ژ بەر لومێن خەلکێ راستی گوت بەلکی تەنیا و تەنیا ژبو مروڤاتیا خوە ژ دەست نەدەت کو بەشەک ژێ ئەو باوەریا خەلکێ دایێ ببیتە سەروکێ وان.
بکورتی و بکوردی بمن سویند پیڤەرا مروڤێ درەوینە، چەندی پتر سویندا بخوی ژبو من دوجاری وێ دسەلمینی چەند مروڤەک درەوینی.
