محمەد چەلکی
ئاوڕێن تە
ئاگڕ بەردایە خەونێن من،
دویکێلەکێ سپی ژ بەژنا هۆزانێن من ڕاکر.
گەلەک ژمێژە
بەلێ هەر
من خەونەک هەبوو
چەند مەزن دبووم
سیبەرا وێ بەژنا هەمی چیا بڕ دکر
تاسا ئەحمەدێ خانی فردکر.
دگەل جزیری
جزبە دچوو
بەرێکانی دگەل فەقی دکر:
( ئەی ئاڤ و ئاڤ، ئەی ئاڤ و ئاڤ ما تو ب عەشق و موحبەتێ مەوج و پێلان تاڤێی بەلاڤ بێ سەکنە ئو بێ راحەتێ)
* هشکە ساڵە، مە نینە ئاڤ
عەشقێ دلێ ئاغۆش کری
مە نەماینە رێک و دەراڤ
لەوا لکزین و دل بگری.
من … بەلێ من
خەونەک هەبوو
ئەڤرۆ ل دەرازینکا ئولیا تە
ئەوا ل سەرێ گری
مینا سۆلتانێن بەرێ
خوە ژ هەمایا ڤە دەرکری
بشفشێن پیلای …
ب سەیێن دڕ
ب کولەیێن
ژ دلۆڤانیێ دخەساندی
پەرژان کری
بساخی هاتە ڤەڕچکاندن.
چ دۆزەخە ئەڤ ژیانە
گرنژینێن خەونێن من
ل داربەستا ئاڵای ئالاندن
ب بێدەنگی
دبەر گۆڕستانا ئەنفلان ڕا بوراندن.
ئاوڕێن تە
چیرۆکا سۆلتانێن بەرێ
دڤەژینیت
وەسا دیارە
دخازی عەوران ئاڤس بکەی
هویر گارسی بسێ رێزی
ب ستوینێن ڕەشماڵێن مەڤە …
ڕاکەی سەمایێ
ئەم ژی مینا لێبۆکان
بکەڤین چەپا و هەرایێ
(حەی حەی … ئەڵا حەی وەرن پێکڤە بڤەخوین مەی حەی حەی …. ئەڵا حەی وەی پا چ خۆش رەوشە مە هەی حەی حەی … ئەڵا حەی وەرن پێکڤە بڤەخوین مەی حەی حەی … ئەڵا حەی)*
تویڕە نەبە
چەند خەونا بڤەڕچکینی
چەند عەوران ئاڤس بکەی
ب کەی هشکە سال
چەند سەیێن دڕێن باژێری
ل خوە کۆم بکەی
تەڤ سۆزانیا کۆم بکەی
هەرچی و پەرچی و هەر کەسەکێ
ژ دلۆڤانیێ خەساندی
ل ئەنفالان سوارێن حەمیدی بوون
ئەڤرۆ کوڵاڤێن وان
هندی بەژنا تە دبلندن
تە چ دڤێت
هەر وێ بکە
پاساو ڤەدیتنێ ژبیر بکە
وێ ل شانێ تە نابینم
لێ ڤێ بزانە خەونێن من
ل بەژنا ئاڵای دپێچاینە
ئەختەبۆتە
چەند ب‌هێتە ڤەڕچکاندن
دگەل بایێ سوبەکا دی
شاکا ددەتن
بۆ کۆپێ زنارێ بلند
سینگێ تەڤ باو و باڕۆڤان
دشەقنیتن
خەونێن تازە
ل سەر لێڤێن هۆزانەک نوی
مارە دکەتن.
من … بەلێ من خەونەکا هەی
حەی حەی … ئەڵا حەی
یێ سەرخۆشم نە ب مەی
حەی حەی … ئەڵا حەی
دەروێشێ سەربەخۆیێ مە
حەی حەی … ئەڵا حەی
کوردستانێ عاشقێن هەی
حەی حەی ….
کوردستانێ عاشقێن هەی *
ژ دیوانا فەقیێ تەیران.
سەعید دێڕەشی. سپیرێز ٢٠٠٥. بەرپەر ٦٣.
* ژ ڤەهاندنا منە لێ ل سەر ریتمێ زکرێ سۆفیان.
١٨-٠٥-٢٠٢١ دهۆک
