رۆژه‌ڤكوردستانینێرین

ترکا ژ قەستی نەگۆتیە: کوردێ باش کوردێ مرییە!

محمەد چەلکی

Kan vara en bild av Mihemed Celki

دوهی پێنج پێشمەرگە ب دەستێن کوردان هاتنە شەهیدکرن(کوشتن) بناڤێ کورداتیێ! دوهی ١٤ کوردێن دی هاتنە کوشتن، هەر ب دەستێ کوردان! ئەڤ مللەتە ژ کوشتنا ئێک تێر نابیت …. بەس بۆ داگیرکەرا نەوێرن دوو بەرا د لەشکەرەکێ وی وەرکەن! ئەگەر لەشکەرێ داگیرکەرا هەما بەر ب وارگەهێن وان هاتن، تە هندیت، هند بوونە جاش، هند بوونە چاڤێ سیێ و هشارێن پێشمەرگان و چەپەرێن وان نیشا لەشکەرێ داگیرکەران ددەن! هند ژی ب ناڤێ بۆسلمانەتیێ دبنە برایێن داگیرکەران و دەستان دادهێلن! هندەک دبنیاتدا دبێژن: هەچیێ دادێ مارەکر دێ بێژینێ بابۆ! هندەک دەستێن خوە ب سەرخوەڤە دنن و هندی دونیا هەی دڕەڤن، لەوا ئەڤرۆ بەرمایێن قافلێن وان ل ئەفریقا، ئوسترالیا، چین و ئەمریکا و ئەورۆپا حوپ حوپا وانە، ژ خوە ئەگەر رێک هەبایە دا خوە ل هەسارا مەریخ و مشتەریێ دەن! ئەڤ مللەتە بیانی پەرێسە، ئەڤ مللەتە پارە پەرێسە، ئەڤ مللەتە بەری داگیرکەرێن وەڵاتێ خوە دکەڤیت و ب دەستێ خوە ئاڵایێ خوە ئاگری بەردەتێ! ئەڤ مللەتە بۆ شکەستنێن خوە پاساوا دبینیت و ل ئەگەر و چارەسەرەیا ناگەرهیت! ئەڤ مللەتە بۆ کوشتنا ئێک و حەلال کرنا خوینا هەڤ ل ئەگەران دگەرهیت! ئەڤ مللەتە ب ئەلەکتریکێ(کارەبێ) نێچیرا سامانێن ئاڤێ ب تایبەت یێن ماسیا دکەت! دارستانێن خوە دبڕیت و بۆ داگیرکەرێن خوە بدیاری دبت! ئەڤ مللەتە سیمایێ گر، دۆل و چیایان خراب دکەت و بۆ خوە ئۆلیان لێ ئاڤا دکەت! سەرۆک و مەرۆکێن ڤی مللەتی و هەر کەسێ چار مرۆڤ ل پەی بچن، دڤێت ئەڤ مللەتە تەڤ بۆ ببتە کولە و ئەو ب خوە ژی کولێ داگیرکەرێن کوردستانێیە و بێی فیتا وان ناچیتە ژوورا نڤستانا خوە! ئەڤ مللەتە بۆ داگیرکەرێن خوە مرۆڤەکێ نەرم و حەلیم و گوهدارە، بۆ برایێن خوە شیرەکێ برسی و بارۆڤا شواتا سلێمانی و دل ڕەقییا جەمەدا سەرحەدێیە! ئەڤ مللەتە گوهدارێ فەتوایەکا مەلایەکێ عەرەب، فارس و ترکایە و ئامادەیە خوینا خوە بۆ برێژیت و ب هزارەها کیلۆمەتران ببریت، دا ب ئەرکێ خوەیێ ئایینی ڕابیت، لێ فەرموودا پێغەمبەری(س) یا دبێژیت: ئەڤینا وەڵاتی ژ باوەرێیە! لێ ل دویف بانگێ خانی، حاجی قادرێ کۆیی و جگەرخوینی نڤێژێ ناکەت! ئەڤە مەزنترین مللەتە و یێ بێ ددەولەتە و شەرمێ ژی ناکەت! ترک دبێژنێ: باشێ هەوە ئەو کەسە یێ مری! لێ بۆ دبنە جاش! عەرەب دبێژنێ هوین ژ ڕڤێستا شەیتانی و بیژیێن ئەجنێن سلێمان پێغەمبەرینە، ب شانازیڤە ناڤێن وان ل کور و کەچێن خوە دکەن، ب شانازیڤە دبێژن: ئەم ژ هەوە باشتر زمانێ هەوە دزانین و پێ دنڤێسن و دبێژن: زمانێ کوردی یێ سەقەت و کێم پەیڤە و تێرا ئەفەندیان ناکەت، هەستێن خوە پێ دەر ببڕن! فارس دبێژنێ: هوین فارسن و بەچەیی ما هەستن(هوین کورێن مەنە)! ئەڤ مللەتە شانازیێ ب بەرژێکرنا خوە دبەت و د سەر ڤێ بەرژێرکنێ ڕا بۆ دبیتە جاش و برایێن خوە دکوژیت! ئەڤ مللەتە، ئەڤ مللەتە، ئەڤ مللەتە دێ کەنگی دەستا ژ حەلالکرنا خوینا برایێن خوە بەردەت! دێ کەنگی گەهتە وێ باوەرێ کو تەنێ کورد برایێن وینە و جیهانا دی تەڤ جیران و هەڤالن! حەتا کەنگی دێ پاساوا بۆ شکەستن و جاشبوونێ بینین! حەتا کەنگی دپرت پرت و بۆ ئێک ئامانج کار ناکەین و هەمی شیانێن خوە بۆ رزگارکرنا کوردستانێ نائێخینە گەر! حەتا کەنگی ب زمانێ هەڕەشە و خائینکرنا هەڤ دێ ئاخڤین! حەتا کەنگی سنوورێن عەشیرێ، سۆرانی،کرمانجی، گۆڕانی، زازایی، باکوور و باشوور دپیرۆز بن! حەتا کەنگی بەس مریێ مە یێ باش و ساخێ مە بۆ کوشتنێ و کۆلەتیێ بت! حەتا کەنگی، حەتا کەنگی، حەتا کەنگی ئەم ل ئازارێن هەڤ نابینە خودان و ئێشا تە، نە ئێشا من بیت و بۆ تە نەبم پشت و پەنا! حەتا کەنگی …. حەتا کەنگی بلا بەس بیت … بلا بەس بیت … وەرن ل هەڤ ببین خودان و ئاڤێ ب ئاگرێ بێ تفاقیێ دا کەین و ڤێ خوە کوژیێ بۆ هەتا هەتایێ بدوماهی بینین. پەندێ ژ مللەتێ جوهی وەرگرن. هزرکەن مللەتێ جوهی(ئیسرائیلی) ژ سالا ١٩٤٨ێ هەتا ٢٠٢٠ێ تەنێ ٤٠ ئیسرائیلی ب پرسێن خوینداریێ هاتنە کوشتن! کابێژن ئێکێ ئیسرائیلی بۆ دەولەتەکا عەرەبا ئاگەهییەک دایە وان! دەم هاتیە ئەڤ مللەتە ببیتە مللەت و تەڤشویێ بەرژەوەندێن مللەتێ خوە، مللەتێ کورد. کورد تەنێ برایێ کوردییە و هەڤالە بۆ دەروجیرانا. کوردستان

پتر به‌رچاڤ بكه‌
ڤێژی ب بینه‌
Close
Back to top button

ئه‌ڤ مالپه‌ره‌ cookies بكارتینه‌ . ژ بو به‌رده‌وام بونا ب كارئینانا ڤى مالپه‌ری . پێویسته‌ تو بكارئینانا مه‌ بو cookies ب په‌ژرینی 

Close