رۆژه‌ڤكوردستانی

مانیفێستا خوەکوژتنێ!

محسن ئوسمان

مخابن مە کوردان هندی هزر و پلان ل سەر ژناڤبرنا هەڤکرین، مە هند هزر و نەخشەرێک بۆ گەلێ خوە نە دارێتینە. قەدەرا مە وەک گەلێ کورد، مە هند زیان و تراژیدیا ژ خەلکێ خوە دیتی، مە هند ژ داگیرکەران نەدیتیە! ب درێژیا دیرۆکا تەڤگەرێن کوردی، هەرتم ملەتێ مە ب ناڤێ “کوردینی، نەتەوە و دەولەتێ” هاتیە خاپاندن و سلێماندن.ئەڤێن ئیرۆ دخوازن دیسان ب هەر ئەگەر و ئارگۆمێنتەکێ هەبیت، ئاگرێ شەرێ براکوژیێ گەرم بکەن، ئەو بخوازن یان نە، ئەو دکەڤنە د ناڤ رەفێن خیانەت و بەرژەڤەندیا دژمنان دا. نەمازە ئەڤ رەوشەنبیر، زانا و کوردپەروەرێن ب چاڤەکی کوردان/ جیهانێ دبینن، ئەو دڤێت بکەڤنە بەر دادگەها دیرۆکێ، چونکو ئەون ئاگرێ خوەکوژیێ گەرم دکەن.ئارێشا هەرە مەزنا پارتێن کوردی هێشتا ژ دەرڤەی باندۆرا گلۆبالێ دژین و هێشتا ژی نزانن، کو ئێدی جیهان ب تەڤاهی کەتیە بەر دادگەها شەفافیەت و چاڤدێریێ. گەلێ “رەهبەر، سەرۆک، بەرپرس و بریاربدەست”ێن پارتێن مە، ئیرۆ باش بزانن، تشتەک ژ دیرۆکا هەوە ل بەر نفشێ نوو ناهێتە ڤەشارتن. کانێ هەوە دوهی و ئیرۆ، چ بۆ دژمنان و چ ژی بۆ دۆست و هەڤالێن کورد ل هەرچوار پارچین کوردستانێ کریە.دیارە ژ بەر وەرارا تەکنۆلۆژیایێ رەوشەنبیریا لۆکالی رادەستی “رەوشەنبیریا گلۆبالێ” بوویە، کو د تەڤ واران دا لۆکالیبوونێ واتەیا خوە نەمایە، تاکو پارتێن/ دەسەلاتێن دەڤەرێ/ کوردی ژی، ل هەمبەر یاریێن سیاسیێن مەزنێن جیهانێ، ژ دەرڤەی حسابانن. لەورا دڤێت پارتێن کوردی یاریا سیاسیا جیهانێ فام بکەن و پشتا خوە ب گەلی گەرم بکەن، چونکو ئەگەر بهارا ئەرەبی ملەت دگەل رێبەر و دەسەلاتێ بان، بلا هەر دەولەتێن مەزن دژ بان، هەر دا مینن. بنێرە ئەو ستەمکارێن ئەرەبێن ژ کورسیکێ هاتینە لابرن، وان هەر تشت بۆ دەولەتێن سەردەستێن جیهانێ کرن، لێ دیسان خوە ل بەر هێزا گەل نەراگرت.گەلێ کورد هەر تشت ژ بۆ کورداتیێ کر، داکو ئێدی ئازاد و خوەیی ماف بیت، لێ دەسەلات/ دوورهێلی درەو ل خەلکێ مە کر. لەورا ئەگەر تەڤ ئال گوهـ ل دەنگێ ئەقلی نەگرن، ئەنجام گەلەک ترسناکن. مخابن سیاسەتمەدار و رێبەرێن مە، هێشتا خوە ژ هشمەندیا چاخێ شکەفتێ/ بێمنەتیێ رزگار نەکریە! راستە دەسەلاتا کوردی، هەوە بەریکێن خوە ژ دراڤی پرکرن، بەلێ پا هەوە دلێ هەڤولاتیان ژ حەز و ژێیاتیا خوە ڤالاکرن. ب ڤێ یەکێ، نە بەس هوون ئیرۆ بۆ خوە کار ناکەن، بەلکو هەوە دوهیا خوە ژی ژ دەستدا. ئەز باورم ئەگەر هوون ئاورەکێ ل گەلێ خوە نەدەن، دێ نێزیک راستی پائیزەکا چارەنڤیسا مان و نەمانێ هێین!ب کورتی، مرۆڤێ ڤەگەریتە دیرۆکێ، دێ ب زەلالی چەڤەنگێن نەمرێن جیهانێ بینیت، کو هەر هەموو ب کەدا خوە، نەک ب پارە و گەندەلی، تەڤلی دیرۆکێ بووینە. بنێرە گاندی ب رووتیا لاشێ خوە، تەڤلی گەلێ هندستانی بوو، نەهرو ب حەزا خوەیا ملەتی چوو حەجا نەتەوەیی، گیڤارای ولات ب ولات خەباتا خوە بەردەوامکر، تاکو ل داویێ بوویە شەهیدێ مرۆڤاتیێ و ماندێلا ژی تەڤ گەنجاتیا خوە د بەرخوەدانا زیندانێ دا دەربازکر. لەورا ئەڤ نەهنگە، بوونە سیمبۆلێن بەرخوەدان و ئازادیێ. ب ڤێ تێگەهشتنێ، دەما مرۆڤ ل دیرۆکێ دنێریت ڤان کەسان دبینیت، نەکو کەسێن ل سەر خوینا شەهیدێن خوە دەولەمەند بووین. لەورا ئەڤا ئیرۆ هوون دکەن، ژ دەرڤەی “مانیفێستا خوەکوژتنێ”، چ واتەیێن دی نینن! محسن ئۆسمان

پتر به‌رچاڤ بكه‌
Back to top button

ئه‌ڤ مالپه‌ره‌ cookies بكارتینه‌ . ژ بو به‌رده‌وام بونا ب كارئینانا ڤى مالپه‌ری . پێویسته‌ تو بكارئینانا مه‌ بو cookies ب په‌ژرینی 

Close