شەبان مزوری
ڤان رۆژا کورتە ڤیدیویەک لناڤ تورێن کومەلایەتیدا زۆر بەر بەلاڤ بویە لدەڤەرا بادینا. وەک ژ ڤیدیویێ دیارە خرڤەبونەکە لگورستانەکێ د مەراسیما خاکسپاردنا مریەکی دا. ئەڤ مروڤێ دئاخڤیت بباوەریا من دخواست د پەیاما خوەدا مرنێ بینتە بیرا خەلکی و بوی شێوەی ل ئولا خوە ڤەگەرن کو مەبەست بوسرمانن و خوە ژ چەوتیان دویر کەن و لچاکیان خوە نێزیک کەن. بمن ئەڤ جامێرە زۆر سەرنەکەفتی بو هەم د پەیاما خوەدا و هەم دجهێ هەلبژارتی بو پەیامێ.
وەک من ئاماژە پێ کری جهێ پەیامێ گۆرستانە، یێ مریەکی بخاکسپرن، ئاقنکو دەما مروڤ لناڤ مریا بیت گەلو پێویست هەیە کەسەک مرنێ بو مروڤی ببیر بینیت، بەرسڤ نەخێر، چونکە دناڤ مریادا ئەگەر مروڤ مرنێ نەبینیت بگوتنا کەسەکێ دی مروڤ مرنێ نابینیت. هەر بوسرمان زۆر جاران مە بهیستیە کو عەزابا قەبری هەیە هەرچەند زۆر زانایێن بوسرمان بوچونێن جودا هەنە لسەر ڤێ یەکێ، لێ عەزابا بەری قەبری نە من خواندیە و نە من بهیستیە.
ئەڤی جامێری وەک هەڤشێوەیێن خوە فەنتازیەک باش ڤەهاند بو لێ ژبیر کر کو ئەو سەردەم نەمایە کو بڤان قەشمەریا دەرباس نابیت.
ئەو جامێر دبێژیت کو کەسەک ل دهوک مربو و چوار مریشویا دخوەرا نەدیت وی مری بشوت، پاشان وەک ژ گوتنا وی ئەز تێگەهشتیم ئەگەر شاش نەبم کەشە پێنجێ منەلایە، چونکە بسەیدا بناڤ دکەت. لڤێرە مە گوت ژبەر کەسوکارێن مری بلا ناڤێ مری نەبێژیت لێ دکاریت ناڤێ وان مریشویا بو مە بێژیت ژبو پەیوەندیێ لگەل بکەین، هەروەسا ناڤێ وی سەیدای ژی بو مە بێژیت یێ مری شوشتی ژبو پەیوەنیدیێ بویژی بکەین؟
لدویف فەنتازیا ڤی جامێری داهێنانەک تازە د ئیسلامێ دا پەیدا کریە ئەو ژی عەزابا بەری قەبریە؟ لدوماهیکێ ئەز دبێژم وی جامێری وەک ئاشکرایە ئەڤ رویدانە بو ڤان سالێن دوماهیکێ ڤەدگەریت و کامیرە زۆر بەر بەلاڤن، پرس لڤێرە بوچی ئەو مری نەهاتە ڤیدیوکرن؟ پرسا دوماهیکێ خوەزی ناڤێ مری گوتبا ژبو هندەک کەسا لێکولین کربا لسەر ڤێ بویەرێ.
پرسەک دی بو ڤی جامێری ئەگەر ئەڤ مریە بوسرمان بیت و ژ ئەگەرا هندەک شاشیا ئەڤە بسەری هات بیت، باشە ئەڤ خەلکێ نە بوسرمان چ بلەشێ وان تێت؟
بکوردی و بکورتی وەریسێ درەوینا یێ کورتە
