محسن ئوسمان
!ئەز باورم پتریا پرسیارا د ناڤبەرا خەلکێ کورد ب گشتی و زانا و شارەزا ب تایبەتی دا دهێتەکرن، گەلۆ بۆچی کورد نەبوونە دەولەت؟ بەرسڤا ڤێ پرسیارێ ژی پرانی پالددەنە دژمن و داگیرکەران، لێ ئەگەرێ سەرکی و بنگەهین ژی، خوە د ئەقلێ دەولەتداریا مە دا دبینیت. کورد هێشتا ژ ئاست و هشمەندیا کۆچەری، دەربازی وارێن سڤیل، ئەقلانی و باژارڤانی نەبووینە. ڤان پاشخانان وەکریە، کو کورد دژمنێن خوە بن، چونکو گەلێن نکارن مفای ژ ئەزموونێن خوە و دیرۆکێ وەرگرن، نەچارن ببنە قوربانێن هشمەندیا خوەشباوریا خوە.ئیرۆ ب تەڤ واتەیا پەیڤێ، گرێدانا دەسەلاتا باشوور ب ملەتی ڤە، ژ داگیرکەر و بیانیبوونێ کمباخترە! لەورا مرۆڤێن زانا و هشمەند نکارن چ خەون ل سەر پاشەرۆژا کوردان دانن! پرنسیپێن پرۆپاگەندا چاکسازیا ئیرۆ ل باشوور دهێنەکرن، نە ژ بەر باشکرنا رەوشا خەلکیە، بەلکو دەما دەسەلات لاواز دبیت، ژ بۆ پتر رازیکرنا خەلکی دەست ب هندەک چاکسازیێن سادە وەک رووکەشی دکەت. لەورا یەک ژ چارەسەریا ئارێشێن گەلێ کورد خوە د “ئازادی و نەتەوەیی” دا دبینیت، بەلێ پا ئیرۆ مە ژ بۆ چاڤێن رەشێن گەندەلی و تالانێ، هەردوو هنداکرینە! ب ڤێ یەکێ، هێشتا ل ڤان جڤاکان تێگەهێ ئازادیێ، ژ هەڤکێشا “سەید و عەبد”، دەربازی وارێ سیاسی و جڤاکی نەبوویە! لەورا گەلەک گرینگە رەوشا دەڤەرێ/ کوردان، بەری شەرێ جیهانێ یەکەم بهێتە خواندن و داڤەکرن، داکو پتر بەرچاڤروهنیەکا رەوشا هنگی و ئیرۆیا کوردان بۆ مرۆڤی دیار ببیت. ب دووربینیا ڤان جورە خواندنان، بۆ مرۆڤی خویا دبیت، کو هێشتا پرۆسێسا نەتەواتیا کوردی د قووناغا پێکهاتێ دایە، چونکو هێشتا خولکێ ڤێ نەتەوێ یێ دیار نینە. راستە پشتی شەرێ جیهانێ یەکەم، کەشێ رزگاریا نەتەوەیی یێ سەردەستبوو، بەلێ ئاست و شیانێن سیاسی و هزریێن هێزێن جڤاکی بەرهەڤ نەبوون. لەورا سەرهلدانا بزاڤێن نەتەوەیێن کوردان، پتر وەک چاڤلێکرن و ڤەژەنا کریاران بوون، نەک کریار ب خوە بووینە. راستە ژی کاودانێن پەیدابوونا هندەک دیاردە و تێگەهان مینا هەڤن، بەلێ پا سروشت ژێکجودا بن، دیارە ئەڤە ژی باندۆرێ ل سەر ئەنجامان دکەن.مە پێدڤی ب ڤان وارێن شرۆڤەکرنێ‌یە: “ئەنترۆپۆلۆگی” بۆ خواند و رەخنەکرنا دیرۆکا مەیا کەڤنار، “سۆسیۆلۆگیا” بۆ داڤە و راڤەکرنا دیاردێن جڤاکێ مە و “فەلسەفی” بۆ هلسەنگاندن و نرخاندنا باژارێن مە وەک گوندێن مەزن. ب ڤێ یەکێ، ئەگەر ئەم بکارین دەسنیشانکرنا فاکتەرێن رێگریا وەرارا جڤاکی/ ئەقلی بکەن، دێ هنگی کارین خوە ژ ڤێ بازنا هەرتم مە دوبار دکەت، رزگار بین. ئەگەر مە دوهی تاجا ئازادیێ، کربیتە ئازادیا تاجی، پا دڤێت ئیرۆ ئەم ژی هندەک ژ درووشمێن ماو تسی تونگ: “وەرن دا سەد گولان بچینین” بینە ژیانێ.ب کورتی، ئەگەر مرۆڤ دوور نەچیتە دیرۆکێ، بەلکو ژ ئەزموونا تراژیدیا 1975، کۆمرەڤیا 1991 و مەترسیا ئیرۆ/ 2021، تەڤ ب خوەشباوری و سایا ئەمریکا بوون. لەورا چەوا ئەوا دوهی ل بهارا ئەرەبی هاتیەکرن بۆ کوردان نەبوویە پەند، وسا ژی ئەڤ رەوشا ئیرۆیا ل کابۆل دهێتەکرن، بۆ مە نابیتە پەند! ئێدی ب تەڤ خواندنێن سیاسی و جڤاکی، هەڤلێر ل بەندا دووبارەبوونا ئەزموونا کابۆل ب ئاوایەکێ دی‌یە، کو مرۆڤ دکاریت ب پائیزا هەردەمیا گەلێ کورد ب ناڤ بکەت. لەورا ب ڤێ هەلکەتێ دبێژین، بلا سەرێ بریاربدەست و سەرۆکێن مە خوەش بیت!مژارەک بۆ دیالۆگێن هزری و ئەقلانی…
