سەردار هێتوتی
پشتی پروسا ئازادیا عیراقێ، ب ناڤ هەڵبژارتنێن ئازاد ژ ساڵا 2005ێ وەرە یێن بڕێڤە دچن و هژمارەکا سەرۆچاڤان یێن ل سەر کورسیکێ خارنێ دروینن بێی کو بشێن کارەکی ئەنجام بدەن یان ژی گوهرینەکێ بکەن. عیراق ئەو وەڵاتێ کەفتیە لژێر هەژموونا زورینەیەکا شیعە و گرە گرێن وێ زەڵامین هشک یێن ئولینە و کێمینەیا کوردی و عەرەبێن سونە ب تنێ هەبوونا وان وەک ناڤ هەیە و نەشێن چ گوهرینا د ئاست بریار و ڕێڤەبرنا عەرد و گەلێ خۆدا ئەنجام بدەن. کوردێن بەلەنگاز و دلخۆش یێن کو ب ساڵانە نەشێن مادەکێ دەستوری بنەجهـ بکەن ئایا دێ شێن رێژا کوردان د ناڤا سوپا و هێزێن چەکدار و سازیێن حکومەتا فیدرال دا بگەهینن ئاستێ ڕێژەیا هەبوونا کوردان ل عیراقێ؟ چ پێنەڤێت گۆتنەکا خەیالیە، باشە ئەڤێن نەشێن ڤان مافێن دەستوری د ناڤا عیراقا شیعە دا بچەسپینن پا چاوا دێ شێن ڕەوشا ژیان و ئابوورا خەلکی بەرەڤ باشیێ ببەن. لەورا دبێژم ئەگەر ب تنێ ئەڤ هەڵبژارتنە بۆ جوانکرنا عیراقا عەرەبی بیت د ناڤا جیهانا دیموکراسیەتێ دا و دەوڵەمەندکرنا هژمارەکا سەروچاڤێن کوردا بیت، ئەنجامدان و نە ئەنجامدانا وان چ ژ ڕەوشا کەدکارەکی و ماموستایەکی و کابانیەکا ماڵێ ناگوهریت، و یا دیتر ژی بلا هەر کەس لگورەی هزرا خۆ شروڤێ بدەتە گۆتنا من.
