جاسم محمد شرنەخی
نڤێسەرێ بەڕازیليێ ب ناڤ و بانگ (پاوڵۆ کویلو)، د چیرۆکەکا خوەدا دبێژت: “باب یێ مژویلى خواندنا رۆژنامێ بوو، لێ کورێ ویێ زاڕۆک بەڵا خوە ژێڤە نە دکر و دلەیزى، دەمێ باب تەنگاڤ بووی، پارچەکا بچویک ژ رۆژنامێ ڤەکر و نەخشەیێ جیهانێ ل سەربوو، پرت پرت کر، پارچە تێکڤەدان و تەڤلى هەڤکرن و دا ب زاڕۆکێ خوە، گۆتێ سەر ژ نوى وى نەخشەیێ جیهانێ بۆ ب من بەرهەڤ بکە، ب ئاڕامى دەست هاڤێتە ڕۆژناما خوە و دخواند، لێ هەر زوى کورێ وى گۆتى ها باب من نەخشێ جیهانێ ڕێكخست، باب حێبەتى ما گۆتێ: – دەلالێ من چەوا تە کارى ب ڤێ لەزاتیێ چێبکى؟ – بابێ من، ل سەر لایێ دیتر وێنەیێ مرۆڤەکێ هەبوو، دەمێ من ئەو درۆستکر جیهان ژى درۆست بوو!! (کویلو) ڕاست د بێژت، ئەگەر یێن بەرپرس ژ کۆما مرۆڤان ل وەڵاتەكێدا وەبەرهێنان د مرۆڤیدا کرن، مرۆڤسازى کرن، کەس ئاڤاکرن – بەلا بەریا هندێ ڕەوشا مرۆڤی چەند تێکچووى ژى بتن – گومان نینە دێ زوى وەڵات ئاڤا بتن. هۆسان بژارەیێن دلسۆز بۆ مرۆڤایەتیێ چ پێغەمبەر بن یانژى فەیلەسۆڤێن چاکساز بن، شیاینە تەلاڕێن زۆر مەزنێن شارستانیێ بلند بکن، خەلکێ ژ مادەیێن خاڤ و خام ڤەگۆهێزن ژبۆ جوانترین شێوە، هەمی ژی د دەمێت پیڤەریدا، ئانكو ژ شڤانێن پەزى و گاڤانیا چیل و حێشترا بکەنە شڤان و چاڤدێر و پێشڕەوێن گەل و وەڵاتێن جیهانێ، هۆزانڤانێ مەزنێ ژ نەژاد کورد (ئەحمەد شەوقى) د دەرحەقێ پێغەمبەرێ پێشەوادا سڵاڤ لێ دبن دبێژت: أخـوك عيسـى دَعَـا ميْتاً، فقـام لهُ ** وأَنــت أَحـييتَ أَجيـالاً مِـن الـرِّممِ واتە برایێ تە مەسیحى سڵاڤ لێ بن گازى مرى دکر، ئێكسەڕ ڕادبیە سەر پیێن خوە، لێ تە بەربابێن مڕۆڤان ژ خاڤ و خلولی و خوەلیێ یێ ساخ كرنەڤە! ئاڤگەرێ مەزنێ سەنگافۆرا ژى (لى کوان یۆ) بەریا دەمەکێ مێژوویێ زۆر کێم وەڵاتەکێ وێران یێ ئاڤا ڤەخوارنێ ژى لی هزرەت، کرە هەڤڕکێ ئەمریکا و یابانێ، لێ پشتى چی؟! هەلبەت پشتی شیاى مرۆڤسازیێ بکت، تەقریبەن وی ژ ماددەیێ خاڤ و خام ئاڤاكر، ژ هندەک کەسێن هەژارى و بێفامى و نەخۆشیێ هەلوەشاندین و کرینە گرۆپێن عیصابا ل سەر پشتا ماتۆرسکلان د دویماهیا ساڵین شیستاندا بەد کریارێن خوەیێن موغلاجیا ئەنجام ددان، (یۆ) یێ مەزن کارى وان سەر ژنوی ب زانست و بهایێن بلندێن كار و بەرهەمێ ئاڤا بكت، د ئەنجامدا تەلاڕێن شارستانیا وەڵاتێ سەنگافۆڕا ژى هەر زوى هند بلندبوون هەتا قوچ ل عەورا دان. مەزناهى بۆ خۆدێ سەرکێش و پپێشڕەوێن وارێ مەژى هاتن ئەو هاوڵاتیێ ژناڤ خوەدا و ل ژێر ستەما داگیرگەران هەلوەشاى، هەمان هەلوەشان بۆ خوە و سیاسەتا وەحشكانیا خوە کرنە دەرفەت ژ بۆ پتر هەلوەشانێ، ژ بۆ پتر کویڵاتیێ. بڕاستى بەعسیزم و بەعسیان کار ب ئاسان کربوون، هوین ژى هاتن هەوە خەمساری نە كر د دەرڤەتپەڕێسیێدا ژ بو ب جهئینانا درویشمێ: كێژاتی و بێ زاری و ئەزئەزی و ترس و نقۆمبوون د ناڤ بەرژەوەندیێن نزم و كێمدا و یێن هەر دوهنێ سەرێ واندا، هۆسان پاشڤەمان ژ هاوڵاتیان، چێكرنا بەحشتا ل سەڕ دونیایێ ژی ب مال و سەروەت و سامانێ وەڵاتی كاڕ و ئەرك و بەهرا كاربدەستان. والله یا ڕاست ئەڤەیە: مروڤسازی نە كاری وەیە! خۆپەڕیسی ئارمانچا وەیە! بیرێن نەڤتێ ل بەندا وەنە! چاڤێن وان ل ڕێكا وەنە!
