کرمانج هاریکی
ل سەردەمێ درستبونا یەکێتی نیشتیمانی کوردستان سەردەمێ ئاڤابونا روژا چارەنڤیسێ گەلەکی چل ملیونی بو. وەکی پێتڤیەکا دیروکی و یا روژەڤی ب عەقل و هەستەکا نوی هاتە مەیدانێ. یەکێتی هات دا مروڤەکێ دی ل سەر بنگەهێن هزی ئاڤاکەت. دا رەفزا کەلتورێ ئاشبەتال و رەڤێ بکەت. ئەیڕیولوجیەکا سەردەمیانە کرە پرا دەربازکرنا مروڤێ کورد بو جیهانا شورەشەکا نوی. ئیستیراتیجیەکا نوی دارشت و بو حیزبەکا خودێ هێزا جەماوەری دوست و دوژمنا حسیێبەکا مەزن بو کر. لێ ئەڤرو زور بەداخەوە یەکێتی بەرەڤ چارەنڤیسەکی رەش و نادیار یا رێگوزەر دکەت. ئەز ل خو و ل هەمی خوێندەڤانێ بابەتێ خو ل خەمخور و دلسوزێن یەکێتیا خو دپرسم بوچی یەکێتی توشی ڤێ رەوشا ناهەمار و روخێنەر بو؟ گەلەك ئەگەر و فاکتەر هەنە کو ئەم بکەینە خالێن گەنگەشە ل سەرکرنا یەکێتیێ. لێ خالا ل هەمیا گرنگ تر ژ لایێ من ڤە دهێتە دیتن. ئەو بو کو حیزب ل پرێنسیپێن ئەیدیولوجی هاتە دامالین. حیزب بەرەڤ ئاڤاکرنا سوزەکی وەلاء و وەفایا سەرانێن یەکێتیێ ڤە راکێشا . دو جەمسەرێن سەرەکی و هاوتەریب بونە پێڤەرێن دلسوزی و کار ل سەر کرنێ دناڤا جەماوەرێ ی ن ك دا. دیسان وەكو سەردەمی جاران یا پارتی دیموکراتی کوردستان چاوا دابەشی سەر دو تەوەران بو ب ناڤێ مەلایی و جەلالی وەسە یەکێتی دابەشی دو تەوەران بو ب ناڤێ جەلالی و نەوشیروانی. ب ڤی رەنگی د هندرویێ خودا هێدی هێدی دەستێن دەرەکی و بەرژەوەند خوازا یەکێتی کرە د و پار و گوران لێ دەرکەت.ی ن ك بو حیزبەکا کوتلەبازی و هەر کەس بو پالەوانەك تێدا ب داهان سەنترال تێدا چێبون. سەنتەرێ خو یێ چەقی ل دەست دا. هزر و بیر و هەلسوکەفتا کەسێن سەرکردە وەکی حیزبێن دی یێن کلاسیکی بو رێبازا سیاسەتا ل سەر کارکرنێ یا یەکێتیێ. بویە کورد دیسان ل باشور ڤەگەریانەڤ خالا سفرێ و یا دەستپێکێ. چارەنڤیسێ حیزبەکا خودان ئەزمون پشتی نەمانا مام جلالێ رەوانشاد ب جارەکێ کەتە دەستێ مروڤێن نابەرپرسیار و هەلپەرست و بەرژەوەند خواز، بویە ئەڤ چارەنڤیسە بو چاڤەرێکریێ ی ن ك گەلەك هەول و بزاڤ مە گەلەك کادر و ئەندامێن دلسوز یێن یەکێتیێ دا دا حیزبا مە خوین ل سەر دای و خو ل سەر ماندی کر ل دەست کونە بعسی و جاش و مەسینهەلگر و دز و گەندەلان رزگار بکەین. مە گەلەك بزاڤ کر کو مەسین هەلگر و ناوچەگەر و خەلکێ دەرون نەڤی نەبیتە پێشەوا و ئیستراتیجیا ڤێ حیزبا ل سەر رێبازا چەپرەوی و سوسیال دیموکراتیەتی هاتیە دامەزراندن. لێ جهێ داخێیە ژ هەمی لاڤە کەسێ مشەخور و نا بەرپرسیار و ناخەمخور بونە رویێ ڤێ حیزبا سیاسی، ژ بەر هندێ ژی ئیرو ل سەر ئاستێ وەلات و دەرڤەی وەلات ئەڤ حیزبە یا توشی قەیرانێن هەرە مەزن کری. چارەنڤیسەک نادیار یێ چاڤەرێی ڤێ هێزا سیاسی یا خودان رویبارەکێ خوینا شەهیدا دکەت. مروڤێ دەرون نزم و خوفروش و جەردە ب ئسلوبێ خو یێماستئاوچیاتی و بو بەرژەوەندێن خو یێن دەمکی ب هەمی ئاوایەکێ ب پشتەڤانیا ناحەز و دەزگەهێن سویخوری خو ئینا پێش و بونە رویێن یەکێتی نیشتیمانی. ب هەمی هەول و تەقەلا هەولا لاوازکرن و دورخستنا کادرێ خودان ئەزمون و دلسوزێ یەکێتی نیشتیمانی دا. گەلەك ل وان کادران بونە قوربانی ل رێزێن یەکێتی نیشتیمانی دورکەتن. جهێ مەسین هەلگر و کونە بعسی و کونە جاشان پتر خوش کر. بەیە یەکێتیا مە یەکێتی نیشتیمانی کوردستان گەهشتە ڤێ دوریانا د هەردو رێیان دا بەرەڤ مرن و نەمانێ دچیت.ئەز وەکی پێشمەرگەیەکێ دێرین و کونە کادرەکێ یەکێتی نیشتیمان ب خەمەکا مەزن و چاڤێن تەژی روندك و ب حەسرەتا گریان یێ ل پێشەروژا حیزبا کو من هەمی ژیانا خو و هەمی بەرژەوەندیێت کەس و کارێت خو بو کریە قوربان دنێرم. ئەو پلانا کو ل هەرچوار دەورێن دەڤەرا یەکێتی ل بو هەلوەشاندنا یەکێتیێ هاتیە دارشتن من وەکی کەسەکێ خودێ ئەزمونا سیاسی پێشبینی بەری بیست سالا یا کری. د گەلەك تەوەرێن حیزبی ل دەڤ گەلەك بەرپرسێن مەعنی من یێ درکانی و بەحس کری. لێ جهێ داخێیە نەگوداری و خو باوی و حقدا ناوچەگەری د دلێ هندەك ل وان بەرپرساندا. گوتنا من ب هەند وەرنەگرت و ب گالتە بازاری ژی ل من وەردگرت. ل بەر ڤان هەلویستێ نا شایەنێ وان بەرپرس و کوتلەباز و مەسین هەلگران من د گەل دەستەیەك ل کادرێن ی ن ک هەلویست وەرگرت. ئەم ل مەیدانا کردەوە یێ کارێن حیزبی دورکەتین. گەلەك ل وان کادر و دلسوزێن دێرین نوکە خو ب یەکێتی ژی نابینن ، ب تەمامی ل گورەپانا سیاسی دور کەتن. ب ڤی رەنگی ئەو یەکێتیا خودان رێبازا کوردایەتیێ ب جارەکێ ل مروڤێن دلسوز و خودان کەسایەتیا دیروکی پاقژ بون. مروڤێن هەلپەرست و بەرژەوەند پارێز بونە خودانێن حیزبا ناڤبری.
