(پشکا ئێکێ)
جاسم محمد شرنەخى
دبێژن: کەسەکێ ئەمریکى ناڤ ل خودا و دگۆت: وەڵاتێ مە دکارت دماوێ 24 دەمژمێراندا ئەنجامێن هەلبژارتنا ڕابگەهینت، ئێکێ ئوڕۆپی لێ ڤەگێڕا: حکومەتا دەولەتا مە د نیڤ ڕۆژیدا (12) دەژمێراندا ئەنجامان بەڵاڤ دکت، زەڵامەکێ خەلکێ ڤێ پارچەیا وێران سەرێ خۆ بلندکر و ب کەنیڤە گۆت: حنێر ئەڤەیە بەریا هەلبژارتنا ب هەیڤەکێ و دوو هەیڤان ئەنجام بۆ خەلکێ هەمیێ ددیاربن، وەکى ل وەڵاتێ مە ئەڤەیە هێز!! یێن شارەزا دبیاڤێ سیاسی و نەمازە د هەلبژارتناندا د زانن ڕاستیا هەلبژاتنێن پاکژ و ڕەوا و دیسان یێن سەختە و ب بناڤ هەلبژارتن چنە، ژبەرکو پیناسەیا سەختەکاریێ ئەوە: هەر دەستێوەردان و کارتێکرنەکا نە یاساییە ل هەر دەمەکێ هەبت ل سەر هاوڵاتیان کو دەنگێن وان بەرەڤ بەربژێرەکێ یان ژى لایەنەکێ ژ لایەنێن هەڤڕکى و پێشبڕکیێ د گۆڕەپانا سیاسیدا دکن بچن، واتە چ بەریا هەلبژارتنا بتن یان ل ڕۆژا دەنگدانێ بت یان ژى پشتى ئەنجامدانا هەلبژارتنا بت. ل وارێ مەیێ هەمى تشت بەرۆڤاژى و ب ستەم و خرابکارى د هێنە ڕێڤەبرن، بێفامیەکا زۆر مەزنە ئەم تەنها ب وان ڕێکارێن زۆر موکوم و هەژیێن کوموسیۆنا دەنگدانێ ب هێنە خاپاندن و بێژین: ڕێک یا ل سەختەکاریێ هاتیە گرتن، و هەلبژارتنێن زەلال و عادیلانە رێکا خو دبینن، نەخێر ل گەل دەستخۆشى و ڕێزێ ل کارێ جوانێ کوموسیۆن دکت، مینا بەرهەڤکرنا ئامیرێت پێشکەفتى و وەرگرتنا شوین تبلا ئەلکترۆنى و کارتا بایۆمەترى و ل گەل دا ب کارئینانا سۆپایەکێ مەزن ژ فەرمانبەرێن ڕێکخستنا پڕۆسیسا دەنگدانێ، لێ گومان نینە ئەڤ عەزەمەتە ل لایەکێ دیتر هیچ کارتێکرن نینە ژ بۆ ڕێگریێ ل سختەکاریێ، ئەرێ چەوا و بۆچى؟! چونکى ئەڤا مە بەحس ژێ کرى ژ ڕێکاران قەت پەوەندیەک هندى سەرێ دەرزیێ نینە ب هەمى جۆرێن ساختەکاریێن دەمێ بەرى دەنگدانێ دهێنە ئەنجامدان، ڕێکارێن بوورین چ کارتێکرن ل چ جۆرێن دەستێوەردان و زێدەگاڤیا ل سەر بنەمایێت دیموکراسى و زەڵالیێ و پێلێنانا و تێکدانا یاسایێ بەرى دەنگدانێ ژ بۆ بەرژەوەندیا لایەنەکێ سیاسیێ دەستنیشانکرى نینن، ل سەر حەسێبا هەمى بێ دەستهەڵاتان، هەر ژ دەستپێکا دەستپێکێ و هەتا دەنگدەر دگەهنە بەر دەرگەهێن بنگەهێن دەنگدانێ، زۆر جۆرێن سختەکارى و تەزویرێ د ئیڕادەیا گەل و وەڵاتیدا د هێنە کرن و ژوان: 1ـ ئیستیغلالکرنا سازیێن لەشکەرێ وەڵاتى و هێزێن ئەمنى و ئەولەهیان، کو ئێک کەس ژ خەلکێ ناهێنە وەرگرتن ئەگەر نەچنە دناڤ ڕێزێن پارتا دەستهەڵاداردا، و تەزکیە و فورما حزبى نەبت، ئەگەر ئەڤە نە تەزویر بت، پا خونە تەزویرێ شاخ هەنە! 2ـ هەر وەکى وێ یا بوورى یان ژى پچەکێ کێمتر، ژ بۆ سازى و فەرمانگەهێن فەرمیێن حکومى ژى بێژە کو ب ڕەنگەکێ زۆر خراب هاتینە و دهێنە قورخکرن، د هەوێن هەلبژارتناندا ئەم دبینن کاندیدێن پارتا دەستهەڵاتدار ل هندەک وەڵاتێن ڕۆژهەڵاتێ وەکى زاڤا و یێن مێ وەکى بیکا مەعزومن ل دەڤ ئیدارەیێن فەرمانگەهـ و ڕێڤەبەریێن گشتى، کارگێر هەمى فەرمانبەران ژ بۆ وان ئامادە دکن، و جەنابێن کاندیدێن پارتا دەستهەڵاتدار بانگەشا خۆ ب دلێن خۆ دکن، چەوا دڤێن ڤەدلۆرینن، تشتێ سەیر و عنتیکە ل بەرپەرێن خۆیێن تایبەت ل سۆشیال میدیایێ ژى وێنەهەواڵێن وان کومبوونا بەڵاڤ دکن. 3ـ کڕینا دەنگان چ ب پارەیێ تایبەت، لێ یا کارەساتر ب پارەیێ گشتیێ وەڵاتى و وەڵاتیان، ئەرێ هێژاینوو ما ئەڤ (700) هزار بندیوارێن حەڕامخۆر تا چ ڕاددە پارە کارتێکرنێ ل وژدانا ڤان یەئجۆج و مەئجۆجان دکت تا دۆ جاران بێ وژدانیێ بکن، جارەکێ مالێ حەرام یێ ئەو نە شایستە دخۆن، جارا دیتر ژێ پێ وژدانا خۆ دفرۆشن دەستهەڵاتێ و دەنگێن خۆ ب ئەگەرێ وان پارا د دەنێ، و سندۆقێن دەنگدانێ ب ئەگەرێ پارەیێ بێ خودان و سێوییان پڕدبت! 4ـ ناڤزڕاندن و تەشهیرکرن ب لایەنێن نە دەستهەڵاتدار، هەتا جاران دگۆتن: یێن گەهشتینە عەرەبان، یان ژى ب بێ بەختى د بانگەشەیەکا بێ ڕەوشتدا تۆهمەتا خیانەتێ د هێتە ئاڕاستەکرن، هەتا بگەهیە زێدەگاڤى و خڕۆقاتێن یاسایێ ل هەمبەر هەوێن بانگەشیێن لایەنێن بێ دەستهەڵات و بەربژێرێن وان، ژ ڕاکرنا هۆیێن ڕێکلامێن وان، دڕاندنا وێنە و پۆستەرێن بەربژێران ل تاری شەڤان جاران ژى ل ڕۆژ نیڤرۆ، یا دیارە چەند سیمایێ ڤێ پڕۆسیسا مەزن و لگەلدا ناڤ و ڕەنگ دەنگێ گەل و وەڵاتى پێ کرێت و پیس دبت. چەندین جۆرێن دیترژى ژ ساختەکاریا بەرى هەلبژارتنا یێن مایین، لێ دا زێدەتر درێژ نەکین دێ جارەکا دن ل ڤى ڕەنگێ خڕابکارى و خیانەتکاریا نیشتمانیا مەزن ڤەگەڕین.
