محەمەد چەلکی
ل سەر داخازا سەرۆکێ ئیرانێ ئەڤرۆ(١٢-٠٩-٢٠٢١) سەرۆکوەزیرێ عێراقێ مستەفا کازمی ب سەرەدانەکا فەرمی گەهەشتە تەهرانێ …
ئەڤ سەرەدانە ل دەمکییە گڤاشتن ل سەر ئیرانێ زێدە بن و پەلەقاژا وێیە کو پیچەکێ بەندکێ عمبارگۆیا ئابووری ل سەر حەفکا خوە سست بکت.
بهاتنا تالیبانان(١٥-٠٨-٢٠٢١) مەودایێ یاریکرنا ئیرانێ بەرتەنگ بوویە و ئیران ژ هەر کەسی باشتر دزانیت کانێ بۆچی ئەمریکا خوە ژ ئەفغانستانێ ڤەکێشایە لەوا هەموو کارتێن ددەستدا دێ ددتە خەبتاندن دا رژێما خوە یا ڤەرێلهای بپارێزت ژ کەفتنا مسۆگەر.
ڤەخاندنا سەرۆکوەزیرێ عێراقێ د ڤی دەمی دا بزاڤەکە ژ لایێ ئیرانێڤە دا هەڤسارێ هەلبژارتنانێن عێراقێ لغاڤ بکەت چونکو حزبێن تائیفا شیعە پێگەهێ خوە یێ جەماوەری نەمایە و جاددە گشت ل دژی ئیرانێ و حزبێن ب سەر ئیرانێڤە د تەڤگەرەک خۆرت دایە و هەر ئەڤ تەڤگەرە بوویە سەدەم حوکمەتا عادل عەبدلمەهدی برۆخیت و هەلبژارتنێن پێشوخت بهێنەکرن.
هێشتا کازمی سەروبەرێ چوونا تەهرانێ بدوماهی نەئینای نامەکا توند ب درۆنایێن هەولێرا پایتەخت کریە ئارمانج بۆ کازمی و حوکمەتا هەرێمێ هنارت کو ئەگەر هوین ژبن هەژموونا مە(ئیرانێ) دەرکەفتن یان بخازن بدەرکەڤن، تەناهی دێ ل هەوە بیتە هزرەت.
کارتێن ئیرانێ بۆ تێکدانا ئارامیا عێراقێ و هەرێمێ هەین گەلەکن یا ژ هەموویان بهێزتر تەڤایا پارتێن ئەڤرۆ د حوکمڕانیا عێراقێ دا بۆ دەمەکێ درێژ ل ئیرانێ بوون بەلکو مل بملێ ئارتەش و پاسدارێن ئیرانێ شەرکرنە بەلکو سەرکردێن گەلەک ژ ڤان حزبان هەر خوە ب پشکەک ژ شۆرشا ئیسلامیا ئیرانێ دزانن و ئەڤێ یەکێ بێێ کو خوناڤەکا شەرمێ رویێ وان بگریت، دبێژن. ل پێشیێ ئیرانێ گەلەک بزاڤکرن کو ئەڤ هەلبژارتنێن پێشوەخت نەهێنکرن لێ رژدیا ئەمریکا و هێزێن ناڤخۆ ئەو خوەستەکا ئیرانێ ل عەردی خستن لەوا بەرێخوە دایە کازمی و ڤەخاندە ئیرانێ دا ڤەکری بێژیتێ: حەتا ڤێرێ و ستۆپ! ئەگەر هوین بخازن ژ بن هەژموونا مە بدەرکەڤن دێ عێراقێ کەینە یەمەنا سەعید!
کلیلێن ئارامیا عێراقێ و هەرێما کوردستانێ ل تەهرانێنە و سەدم ژی وەک مە ل ژوور ئانین زمان ئەڤ حزبێن د دەستهەلاتێ دانە و تەڤ پەروەردا ئیرانێنە و هندی حەڤ حزبە خوەدی پێگەهێ جەماوەری و هێزا لەشکەری بن(لەشکەرێ میلیشاتان) رەوشا عێراقێ وەکو وەلاتەکێ ئێکگرتی دێ هەر ئەڤە بت و رۆژ بۆ رۆژێ دێ خرابتر لێهێت.
ڤەکشیانا ئەمریکا ژ ئەفغانستانێ ژی تەڤایا سیاسەتمەدارێن عیراقێ ب هەرێما کوردستانێنڤە شۆک کرنە د نابەینا کێکا ئەمریکا و درۆن و حشدا شەعبیا تەرورست دا عێراق ل سەر هەرفتەیەکێ مەترسیدار ل بەندا ئەنجامێن هەلبژارتنێن پێشوەختە.
ئەگەر ئیران شیا لغاڤێ رویدانان ل عێراقێ بۆ بەرژەوەندا خوە ئارستە بکەت(ئەز هزر دکم دێ شێت) هینگێ رەوشا ئابووری و خزمەتگوزاریان دێ بەرەف کمباخترێ چیت و پێلەکا دن یا خوەپیشاندانا دێ دەستپێکەت و ڤێجارێ دێ گەلەکا خویناوی بیت و دێ بیتە داویا هەژموونا ئیرانێ ل عێراقێ، ئەڤ سینارۆیە پشتی حوکمەتا نوی دهێتە ڕاگەهاندن دێ دەستپێکەت. لێ ئەگەر باسکێ ئەنتی ئیران براوەیێن ئێکێ بن دهەلبژارتناندا کو ئەڤە دویر دەرازە و نەکردە چونکو باسکێ ئیرانێ هێشتا گەلەکێ بهێزە(هێزا ئابووری و لەشکەری ددەستدایە) و زێدەباری نەزەڵالیا هەلویستێ ئەمریکا. وەکو نوکە پشتی هەلبژارتنان کلیلا چارەسەریا کێشێن عێراقێ و هەرێما کوردستانێ دێ ل تەهرانێ بن!
١٢-٠٩-٢٠٢١
دهۆک
