تاکور زەردەشتی
ئه‌رێ تكا و ڕجا ژ ڕێكخراوێن مرۆڤی و جیهانی چاره‌یه؟! ل كۆنسولخانا و نوینه‌رێن مافێ مرۆڤ و نه‌ته‌وێن ئێكگرتی و ئه‌وروپا و ئه‌مریكا و ئوسترالیا و … هنده‌ك جارا پێكه‌نینا مرۆڤی پی دهێت بڕاستی، هه‌رچه‌نده پێنگاڤێن خراب نینن و ئالیه‌كا ڕێچاره‌یێ دهێنه دیتن لێ پێنگاڤێن بێچاره‌ییێ نه بڕاستی، ژبۆ كو هه‌كه ل كێله‌ك خه‌باتا چالاكڤانێن ل ئه‌وروپا جڤاك جهێ خوه نه‌گریت ده‌مێ ڤان لایه‌نان دكێشنه سه‌ر خه‌تا فه‌لاكه‌تێن مه براستی خه‌باتا وان ڤاڵا ده‌ردكه‌ڤیت، وی ده‌می ئه‌و ژی هه‌مان ده‌ستهه‌لاتدارن و ب ڤێ ڤالاهیا دبینن بازاڕێن سیاسی لسه‌ر ڤان پێنگاڤێن چالاكڤانان دكه‌ن. ژبۆ كو ده‌مێ ئه‌كتیڤیستێن مرۆڤی و لایه‌نێن ئه‌وڕۆپی و جیهانی جڤاكه‌ك وه‌ك جڤاكا مه فه‌تسی و بێ موڕال و نه‌زان لسه‌ر مافێن خوه یێن سه‌ره‌تایی و سروشتی دبینن، ده‌مێ كۆمه‌له‌كا سه‌رۆكا دبینن كو هه‌موو پسمام و كوڕ و باب و برانه و ب دیتنا جادێن ڤاڵا ژ ده‌نگێ هشیاریێ ئه‌و ژی پێكه‌نینا وان ب ڕه‌وشا مه دهێت و كه‌د و خه‌باتا چالاكڤانێن مه یێن ده‌رڤه ب ڤی ڕه‌نگی ڤاڵا ده‌ردكه‌ڤیت و وه‌كه پێدڤی جهێ خوه ناگریت. بۆچی؟!
ئه‌و گه‌ل و جڤاكا ده‌مێ ره‌وشه‌نبیرێ وی، گه‌نجێ وی، رؤژنامه‌ڤانێ وی، یان ڕه‌خنه‌گرێ وی لبه‌ر چاڤێ وی ژێر ئه‌شكه‌نجێ بهێته كوشتن، بهێته ئه‌شكه‌نجه‌كرن یان ب بێ دادی بهێته گرتن و ئه‌و نه‌هه‌ژیت…
ئه‌و گه‌ل و جڤاكا ده‌مێ گه‌نده‌لیێن لسه‌ر سه‌روه‌ت و سامانێ وی ب ئاسته‌كێ ئاشكرا ببن كو دنیایه‌كا به‌لگێن وێ ببنه رۆژه‌ڤا نڤیسكار و ئه‌كتیڤیستێن جیهانی و ئه‌و لسه‌ر نه‌هه‌ژیت و نه‌كه‌ته هه‌وار..
قه‌یران بگه‌هنه هژمارا 42 یان كو ئێدی جڤاك و نه‌ته‌وه لسه‌ر دهلوه‌شن و ئه‌و نه‌ته‌وه و جڤاك پێ نه‌هه‌ژیت و نه‌كه‌ته هه‌وار و نه‌هێته جادێ..
هه‌رچی به‌شێن هه‌ری گرنگێن خاكا وی كو د قۆناغا ده‌هان ساڵان ب خوینا سه‌دان هزرا كه‌س و كار و باب و كالێن وی هاتینه بده‌ستڤه هاتن هه‌می ب بێ ئیراده‌یی ڕاده‌ستی دژمنان بهێنه كرن و جڤاك لسه‌ر نه‌هه‌ژیت و نه‌كه‌ته هه‌وار و نه‌كه‌ڤیته جادێ و خوه نه‌سۆژیت..
هه‌رچی گه‌نجێ وی یێ كێمه‌كێ هش و سه‌ودا هه‌یی ساڵانه ب ده‌هان هزاران ژ وه‌ڵاتی بڕه‌ڤن و ئه‌و گه‌ل لسه‌ر نه‌هه‌ژیت و نه‌كه‌ته هه‌وار و نه‌كه‌ڤیته جادێ و خوه نه‌سۆژیت و به‌رپرسا نه‌كێشته به‌ر چه‌كۆچێ دادگه‌هێ..
هه‌رچی نوخبه و ڕۆناكبیر و خودان هه‌لویستێن خاكا وی كو كێمه‌كا ئیرادا ئاخڤین و ڕه‌خنێ هه‌ی ب چه‌كۆچێ بێدادیێ و حزبیانه ب ده‌ستێ هه‌مان تاوانبارێن كو وه‌ڵاتێ وی گهاندینه ڤێ وێرانیێ بهێنه ئه‌شكه‌نجه‌دان، سزادان، ته‌مراندن، بایكۆت كرن، سزادان و كه‌س لسه‌ر نه‌هه‌ژیت و نه‌كه‌ته هه‌وار و نه‌كه‌ڤیته جادێ و خوه نه‌سۆژیت و دادگه‌ها هه‌یی ب ته‌رش تالانێت وێڤه ب سه‌ر هه‌ڤدۆ نه‌هلوه‌شینیت..
ئه‌و گه‌ل و ئه‌و جڤاك مریه بڕاستی..
كه‌س ژی ب هه‌وارا مریا ناهێت! هه‌ركه‌سه‌ك بلا ڤی په‌مبوی ژ گوهێ خوه بینت ده‌رێ كو ئێك بۆ وی ده‌ریه‌كێ ڤه‌كه‌ت بێ كو ئه‌و ل وی ده‌رگه‌هی بده‌ت.! تو ده‌ردێ خوه نه‌زانی دێ چ دره‌مان و ل كیڤه دانی، ده‌ردێ ته توی، ل گه‌ل ته‌یه، د جڤاكا ته‌دایه، نه‌ل ئه‌وروپا و ئه‌مریكا و ئوسترالیایه، ئه‌و وه‌ڵاته هه‌می بخوه ژی دبنه ده‌رد ده‌می كو تو بخوه ل مه‌یدانێ نینی!
ئه‌و دادگه‌ھ و دادوه‌ر و داواكارێ گشتی و یاسایا كو ئیرۆ تو دبینی ئه‌ڤ هنده به‌رچاڤێ ته و هه‌می جیهانێ ب ئاشكرا و بێ هه‌سته‌ك به‌رپرسیاریێ ڤان هه‌می تاوانا دبینیت و ڕه‌واتیێ دده‌تێ و سه‌ره‌ڕای ڤێ تاكه‌كه‌سێن كو گیانێ ڕاسته‌قینه‌ێ وژدانی لده‌ف وان هه‌ی هه‌میا دكێشته به‌ر چه‌كۆچه‌كێ رزیێ كو ب ده‌ستێن ده‌ره‌كی و یێ توركێ فاشیست دا دهێته هه‌ژاندن و سه‌رشۆڕانه بڕیارێت دیكتاتۆرانه ئه‌رێ دكه‌ت ئه‌و دادگه‌ه نینه ئه‌و دزخانه یه بێدادگه‌هه و مه‌ركه‌زا داگیركرنا شه‌ره‌ف و كرامه‌تا ته‌یه كو دشێت تاوانێت خوه دئێخته سه‌ر ستوهێ ته و ئه‌و زیندانا كو ئه‌و دڤیا تێدا بان ته ب سته‌مكاری نه‌چاری سزاێ وێ دكه‌ت. ئه‌و دادگه‌ها كو ته بخوینا سه‌دان هزار كه‌سا بده‌ستڤه ئینابۆ. وی ده‌می دڤێت تو بزانی پاشه‌ڕۆژا زاڕۆكێ ته سۆت، قه‌ت ئێدی شیری نه‌دێ و مه‌زن نه‌كه بڕاستی، هه‌ره هه‌مویا ئێكجاری بهاڤێژه د روباره‌كێ دا بلا ئێكجار بخه‌ندقن نه‌ك بۆ هه‌تاهه‌تا لژێر زولم و بێدادی و ڕه‌زاله‌ت و سه‌رشۆریێ دا بمینن و وه‌ك ڤان گه‌نجێت ڕاستگۆ كێلی ب كێلی ڕۆژانه ب ده‌مژمێر و خۆله‌كان چڕكه ب چڕكه بمرن و بمرن و بمرن و هه‌وار بكه‌ن بۆ كێمه‌كا هه‌ناسا ئازادیێ، دا بكارن هه‌بن، دا بكارن ڕایا خۆ بێژن، دا بكارن بێژن بۆچی سه‌روه‌تا ته ب تلیارانه و ڤلا و قه‌سرێن ته ل ئه‌مریكا و ئه‌وروپا ب ملیارانه، مه‌سره‌فێ زاڕۆكێن ته ل خاندنگه‌هێن ئه‌مریكی و ئه‌وروپی ساڵانه ب ملیۆنان دۆلارانه، ئه‌و زارۆكێن مه دڤێت پشتی 12 ساڵا خاندنێ نه‌زانن ئێك لاپه‌ڕ ئینشاێ بنڤیسن، مامۆستاێ مه دڤێت لسه‌ر عه‌ردێ بهێته خشاندن، به‌رچاڤێ كامیرا پێهن لناڤ گونێت وی بهێته وه‌شاندن، مامۆستاێ 25 ساڵا ئوستازێ زانكۆێ ب ڕه‌ڤدێن سه‌یێت پاشدر لسه‌ر جادێ ب بلۆكاو دارا بهێته قوتان، و موچێ وان نه‌هێته دان و ده‌مێ ده‌عوا نانێ خوه حه‌قێ خوه دكه‌ن بهێنه ئه‌شكه‌نجه كرن و سزادان و پاشناڤێ تێكده‌ر و ده‌ستێ ده‌ره‌كه لسه‌ر بهێته دان و ئه‌و ئبلیس و ده‌جالێت كو به‌رێ ل كافتریێت سكس فرۆشیێ و ده‌یوزیێن زایندی ل كۆلانا هاتینه ڤێدان ئیرۆ د جلێ مه‌لاتی و قداسه‌تێ دا نه‌فسا خوه یا عه‌ماره تێر بكه‌ن و بێژن به‌لێ ئه‌ڤ كه‌سه تێكده‌رن و ده‌ستێن ده‌ره‌كینه و زاڕۆكێ منێ گه‌نج مافێ وێ نه‌بیت بێژیت بۆچی؟!
بلا ئه‌و زاڕۆك به‌ری بهێته دنیاێ بمریت، یان بلا هه‌ر نه‌بیت دا د ڤێ ڕه‌زاله‌تێ و سه‌رشۆڕیێ دا نه‌ژیت و عه‌زاب و ئه‌شكه‌نجا ئه‌ز دبینم ئه‌و ژی نه‌بینیت!
ژبۆ نه‌هامه‌تیێن ڤی واری پێدڤی بۆ گه‌ل هه‌ژیابا، كربا هاوار، كه‌تبا جادێ، خوه سۆتبا، ئه‌ڤ بێدادگه‌ها هه‌نێ ب ته‌رش و تاڵانڤه بسه‌ر ئێكدا ئینابا، لێ ئیرۆ ژبۆ وان چه‌ند زیندانیێن خودان شرافه‌تێن كو ناڤێ وانا بۆ هه‌تاهه‌تا د دیرۆكا شه‌ره‌فا به‌هدینان دا هاته تۆماركرن دڤیا چ بكه‌ین؟ گه‌ل دڤیا چ بكه‌ت؟ كه‌سێ كو ژ شه‌ره‌ف و ده‌عی و ئیمان و وژدان و خوینا شه‌هیدێت ده‌هان ساڵان فام دكه‌ت دڤیا ئیرۆ دیار بیت و بهێته مه‌یدانێ. گه‌ر كو پڕسا وان زیندانیا ژی نه‌كه‌ت بلا پڕسا دادگه‌ھ و یاسا و خیمێ ڤی وارێ خوه بكه‌ت كو ئێدی نه‌مای، بلا هه‌تا ئه‌و كه‌سێن كو موچێ وان هاتینه مسۆگه‌ركرن ب بهاێ بێده‌نگیێ ژی بپڕسیت بێژیت كانێ یا مه خوین ژبۆ وێ دای ئه‌رێ ئه‌ڤ موچه‌یه بۆ كو تو پێ ده‌ڤێ من گرێده‌ی و من فێری سه‌رشۆڕیا لسه‌ر نان خارنه‌كێ بكه‌ی!؟
دڤێت كاره‌كێ وه‌سا بهێته كرن كو جڤاكا كوردی و یا جیهانی بهێته نه‌چار كرن كو لسه‌ر بزار بهێن و بچاڤێ خوه وه‌ك دیمه‌ن ڤان ڕاستیان ببینین. كه‌سێن كو هه‌ست ب به‌رپرسیاریێ دكه‌ن دڤیا وه‌ك چاوا ڤانا ده‌ست ب مانگرتنا ژ خارنێ كری، تیمێن جودا ده‌ست ب مانگرتنێ بكه‌ن و كه‌نگی ڤان مانگرتن شكاند ئه‌و ژی بشكێنن. دڤێت ئه‌و به‌ربژێرێن ڤێ جارێ كو ژبۆ پرۆپاگندا خوه پۆسته‌رێن خوه ددالقینن ل كێله‌ك وێ وێنه‌یێ دادگه‌هێ و یێ وان زیندانیان ژی بهێنه هه‌لاویستن. گه‌نج بلا ل كێله‌ك هه‌ر ئێك ژ وان پۆسته‌را وێنه‌كێ زیندانیێن به‌هدینان هلاویسن. دڤێت وێنه‌یێن داخازا سه‌ربه‌خۆییا دادگه‌هێ بهێنه هلاویستن. دڤێت تیمێن رونشتنا ئازادیێ و كۆنێن نۆبه‌تا دادخازیێ لبه‌ر ده‌رگه‌هێن دادگه‌هێن هه‌ولێر و دهۆكێ بهێنه ڤه‌دان، یان ل پارك و هاڤینگه‌هان خیڤه‌تێن تایبه‌ت بۆ ڤان كاران بهێنه ڤه‌دان.
ڕۆژانه كه‌س و كارێن زیندانیێن قوربانیا ڤێ بێدادیێ ب نۆبه‌داری لوێ ده‌رێ كۆم ببن كۆ چاوا زاڕۆك و خۆشتڤیێن وان د گۆشه‌گیریێ دا ئه‌و ژی دیمه‌نه‌ك وه‌سا لبه‌ر چاڤێ رایا گشتی ڤه‌هینن بۆ كو ئه‌ڤ ده‌نگه نه‌هێته ڤه‌مراندن و ژنوی ڤان دیمه‌نان بێخنه به‌رچاڤێ نوینه‌ر و ئه‌كتیڤیست و ڕێكخراوێن جیهانی كو ڤان دیمه‌نان ته‌ماشه بكه‌ن دا كو نه‌چار ببن شه‌رم ژخوه و بكه‌ن و ڕه‌واتیێ بده‌نه داخازێن جڤاكه‌كێ نه‌ك ب دیمه‌نێ تاكه‌كه‌سه‌كێ ل ئه‌ورووپا بكه‌نه كه‌نی و بهێن د دوو ڕێزكادا بۆ بێده‌نگ كرنا وی كه‌سی تویته‌كێ به‌ڵاڤ بكه‌ن و كوتایی.
تاكۆر زه‌رده‌شتی (كازم) 11\9\2021
