نزار بێجان
بەشا دوێ
” پشتی کو ناڤێ کورد کەتی سەر ملەتەکی ئەوی مللەتی ناڤێ وەلاتێ خوە کرن کوردستان. گەلێ کوردستانێ ژ سەرخوەبونا خوە ڤەمابو، ژبەر وێ درەنگ ڤەمانێ هەستێن وی دئازرین زوی بەلاڤ دبون جاردی بلەز ل هەڤ کوم دبون. بلەز سرێ خوە رادکرن لێ مخابن دژمنی زوی تاپەسەر دکرن، کوردستانیا گەلەک جارا ل گەلەک هەرێم و دەڤەران ل دویڤ سیستەما “فودال ب پشتگریا هوز و بنەمالێن خوە رادبون سەرپیا و لبەر خوە ددان لێ مخابن کا چاوا بلەز رادبون هەر وسا زوی تێک دچون و ئەو کەلەگەرما دهناڤێن وان دە سار سار دبوو. پشتی کو کورد ل چو قوناغان بسەرنەکەتین “قاشو” ژوان وەرە ژ سەربورێن خوە سودمەندن لەوما تنێ چاڤێن خوە ڤەکرن، بێ زانابون بونە چاڤ لێکەرێن مودێلێن بیانیا دهزراخوەدا گەهشتن ئاستێ شورەشەکا پێشکەفتن خواز دوی سەردەمی دا ژی وەکی بالندەیەکی بێ جهـ و وار هەر روژ ل کاڤلەکی بیانیا بون حەتا ڤێ دوماهییێ ل باشور ژ نیشکان ڤە دادان کەڤنەوارێ خو و گوتن سەرهلدان ژیانە. د ئەڤێ سەرهلدانێ دە، وەکە کو کومەکا کەفتار و جەقەلێن برسی بکەڤن سەر جەندەکێ گامێشەکی بریندار هەر یەکێ پرتەک ژ ئەڤی وەلاتێ ڤەچرین. پاشی ژی ئەو کەسێن نەدهاتن،ناسکرن وان ژی ناڤ لخوە کرن، وەکو “پارتا جڤکێ، “پارتا رەنچکێش “پارتا یەکەتیا دەموقرات “پارتا ئایندە حەتا ڤێ دوماهیێ ئێدی پەیڤا “پارت. ژی بکار نەئینا هما “چێنچ و بەس. بمەرەما ئەو ژی وەکە رویڤیا لگەل وان حێفتیار و چەقەلا بچەرن و چەرین. لێ بەلێ دهەمان دەمێ دا هەر وەکە وان پەیڤا “مرجع وەرگەراندین کوردی و گوتین: لێڤەگەر، هەر وەسا ئەڤ جزب و تەڤگەرە ڤەگەران عەسلێ خوە، وان ژی هەمان “زێهنیەت٫ لدیڤ هێزا خوە پەنا برن بەر هوز و مالباتێن نێزیکی خوە. بەژەوەندیا خوە یا تایبەت پاراستن، پێشەروژا زاروکێن خوە مسوگەر کرن و چارەنڤیسێ جڤاکا سڤیل بدەستێن خوەدێ ڤە گرێدان. ئێدی خوەکوشتن، تالانکر، و هەمو جورەیێن گێندەلیێ بونە ئەرکەکی نەتەو و نیشتیمانی هەرتشت شێلی و وەلات تاری رەش و تاری کرن. ئێدی جڤاک کەت خەوا مرنێ جارا جاران کتێن کەسا شیار دبون و دبن لێڤان ڤە دگوتن “نە بو ڤێ ژیانا ئاوارتە لێ بەلێ هێژ پەیڤا وان دەرنەکەتین ئەڤێ دەستهەلاتێ ئەو کەس ڤرێدکرت جەحنەمادی. ئەڤ دەستهەلاتە هەر لبەر خوە نەراوەستا و جارەکێ خوە دادگەهـ نەکر و ب ئەحمەقانە شەرێ برسیکرنێ راگەهاند لاوما ئێدی جڤاکا ژ برسێ دکاڕی و دنالی هەلبەت دەما بنێ ئەردی دکەلت دبت ڤورکان و چیا دپەقت وەکە کو تێت گوتن:”ئالماس ژناڤ ڕەژوی و تەنی یێ دەردکەڤت. لەوما کەسێن دلسوز وەکی “ماموستە و قوتابی مەلا و فەقی داهێنەر و ئەندازیار روژنامەگەر و چالاکڤانا بریارا خوە دان ئێدی گوتن “نە، ئەو کەسێن براستی گرێدای ئاخ و وەلاتی هەر وەکی گرتیێن زیندانا دیاربەکرێ کا چاوا دگوتن: گاڤا ئەم مرین لسەر کێلی یێن مە بنڤیسن ئەڤ کەسێن هە قەردارێن گەلێ خوەنە. ئها وسا ئەڤان چالاکڤانێن بەهدینان خوە قەردارێن گەل و وەلاتێ خوە دیتن لەوما بزانەبون، و دسپلین ل شوینا “خەنجەر، تڤەنگ و چەکوچی. پێنڤیس، تەکنیک و تورا چڤاکی دان دەستێن خوە. ببێ جوداهیا “ملحد دیندار سوران بەهدین و ب سلوگانا ئازادی و ئازادی، مرن و زیندانا ئاسایشا گشتی دان پێشیا خوە و دەنگێ خوە بلند کرن.
