ب ناڤێ خودایێ مەزن و دلۆڤاندۆست،
هەڤال و خواندەڤانێن هێژا و قەدرگران،ئەز دگەل وێ نێرینێ مە، کو کەسێ رەوشەنبیر گەرەکە سیاسەتێ بکت، بەلێ سیاسەت وەکو فکر( فکرا یوونانستانی، فکرا ریالیزمی سەردەمێ ماکیاڤیللی و فکرا سەردەم) و سیاسەت وەکو فەلسەفە (ئەقل و لۆژیک د سیاسەتێن گشتی یێن هەر دەولەتەکێ دا) و سیاسەت وەکو زانست (فکرا سیاسی، سیستەمێن سیاسی و پەیوەندیێن نێڤدەولەتی)، لەورا ژی وەختی من بریاردایی کارێ سیاسی بکم، ب مەبەستەکا خوڕی سیاسی بوو، بەلێ پشتی شەش هەفت سالان د ناڤ حزبەکا دیارکری دا، ئەز گەهشتم باوەریێ کو گەلەک کەس جوداهییا کارێ سیاسی ژ کارێ حزبی نزانن. هێژایێن من، من ب فەر دیت دوو خالان بدم دیارکرن:خالا ئێکێ: ئەز ب ئاشکەراهی رادگەهینم، کو من ب ئاوایەکێ فەرمی دەست ژکارکێشانا خوە پێشکێشی بەرپرسێن ئێکەتی نیشتیمانی کوردستان ل دهۆکێ کرییە و دەست ژکارکێشانا من چو پەیوەندی ب ناکوکی و پرسێن ناڤخوەیی یێن حزبی ڤە نینە، بەلکو بریارەکا کەسایەتی یە، گرێدایی پارادایما من یا سیاسی و سوسیۆلۆژی یە بۆ سالێن داهاتی. هەژی گۆتنێ یە، پشتی من بریاردایی بەرپرسێن ئێکەتی ل دهوکێ پەیوەندی دگەل من کرن و ئامادەییا خوە دەربڕین بۆ هەر کار و خزمەتەکێ، بەلێ من ب سینگەک بەرفرەهـ ڤە سوپاسییا وان کر وبریارا خوە سەلماند.خالا دوویێ: دەزگەهێ پالۆ یێ میدیایێ وەک دەستپێشخەری پەیوەندی ب من کر، کو پێدڤی ب خزمەتا من هەیە وەکو راڤێژکارەک میدیایی بۆ کەنالێن دەزگەهی ئەو ژی (وار تیڤی، رادیۆیا وار، گاڤ پرێس و شەفەق پرێس) و پشتی دانوستاندنێ دگەل بەرپرسێن دەزگەهێ، من ب سوپاسی ڤە داخوازا وان بجهـ ئینا و کارێ راڤێژکاریێ قەبیل کر. ب راستی ژی نە ژ دویر و نە ژ نێزیک پرسێن سیاسی و حزبی دگەل من نەدا و نەستاندن، بەلکو تەئکید کرن کو ئەز وەک کەسەک بسپۆر د بوارێ رەوشەنبیری، میدیا، فکر و فەلسەفێ دا خزمەتا خوە بەردەوام بکم و ژدل ژی ئەز وێ پێنگاڤێ بلند دنرخینم، سوپاس بۆ وی هەلویست و ئینسیاتیڤا جوان، هەروەسان سوپاسییا هەمی گەنج و لاوێن دەزگەهی دکم کو خوەشحالی و هەڤکارییا خوە بۆ کارێ من یێ نوی نیشا دان. ل دوماهیکا ڤێ داخویانیێ، ب خوەشحالی ڤە رادگەهینم، کو ژبلی کارێ من یێ نوی، من بەرنامەیەک ژی ل سەر شاشا وار تیڤی هەیە ب ناڤێ تاڤەهەیڤ. ئەز تەڤایا دۆست و هەڤالێن هێژا پشتراست دکم، کو ئەم دێ ل سەر کەد و خەباتا خوە بەردەوام بن دگەل داخوازێن سەرکەڤتنێ بۆ هەمییان.رێز و سلاڤێن برایێ وە، سەبری سلێڤانەیی ١٧ ٠٩ ٢٠٢١
