نزار بێجان
“ماموستا نە کەسەکی “عبسی” ڕکو و یاخی بوو ماموستا کەسەکی هەستیار و دلینی و ڕومانسی بوو، من وەکی سۆسیولۆگەک ماموستا دخوەند، لێ ژبۆ من ژی نەدهات ناسکرن، چونکی ئەو ژ گەلەک لەهنگا پێکهاتبوو. ماموستای جارنا نفرەت ل خوە دکرن و دگوت ئەڤە چ ناڤە وەکی پاتەکی قیرێ مایە ب دەلنگێن من ڤە ئەز نەشێم بلڤم. خوەزی دخوەستن کو وەکە جوانەکی سەربەردای با، جارنا دخوەس سڤک ببت، دا کو د خابووری دە بنئاڤ نەبت. جار جاران ژی وەحشێ دویرا بوو “نێرون” جاران ژی دڤیا ئەو بخوە خودایەکی ب ئافرینت و ئەو ژی ببت پێغەمبەرەکی فسق دا دەوروبەرا هەمیا ل خوە مەهر بکت، لێ هەر دیسا باوەر نەدکر کو بشێت حەزا خوە یا دبن شیتکێ دا تێر بکت بێ باوەر مابوو، “ئەڤ ماموستایە دنیڤا جوقا لەهنگێن خوە دە هندا دبوو، جارنا ب هەیڤان پێژنا وی نەدهات، دەما ژ تنێتیا خوە ژی سل دبوو، ژ نیشکانڤە رادبوو خوە ژێک رادکێشا و تەماشەی پارچەیێن جڤاکێ دکر، دا بزانت کا هەر پارچەکێ چ جۆرێ کوترێ دڤێت دا پێشکێشی وان بکت. ئەڤ “ماموستا”یە کەتبوو د ناڤا تەڤلیهەڤیەکە بێ هەمپادا جار ژ ناسناڤێ خوە تۆرە دبوو، جارا ژی ماچی دکر و دگۆت: ئەگەر تو نەبای ما ئەز چمە! هما تە یێ شیای خوە لمن بکی خودان! ئەز ژی ببم خوەدان شاگرد و حەیران، سوباس بۆ کو تە شیای من راکێشی ناڤ مروڤان ئەگەر ما کەنگی ئەز مروڤ بیم؟! “ماموستا” دژمنێ خوە بوو گەلەک جارا رەوشا خوە بدەستێن خوە خراب دکر، زانینا خوە ل خوە دئالاند تێدئالزی، هەول ددا لبەر چاڤێن جڤاکی هندا بکت و پاشی ئەوبخوە ژی سەر ژێ نەدکر دەر. “ماموستە” ژ کەسی بلندتر نەبوو، بەلێ ژ مە هەمیا درێژتربوو. نە بیست و پێنج سالا ل پێشیا مە بوو، بەلکو بیست و پێنج سالا ژ مە بتەمەن تربوو. “ماموستە”ی ڤێ دوماهیکێ مەژیێ خوە خواربوو، لەوما هندەک جارا خوە ددا ناڤ “الملحدکان و جاران ژی ناڤ “تەقیایان دا. ئەڤا من ل ژوور نڤیسی بەلکی ژ رۆمانەکا ریالیستی یا “ماموستای بخوە بت، هوین دشێن چاڤکانی یێ لسەرێ گوندێ ببینن. ئەم دێ ئێین سەر راستیا ژینێ ژبەر کو ئەڤ پەژیکا نەحوەشیێ خوەگورانێ دناڤ جڤاکێ دا یا بەر بەلاڤبووی، “ماموستا “ئارام ژی ژمێژە یێ تووشی ڤێ ڤیروسێ بووی، ماموستە “ئارامی گەلەک دیت خوەند و بهیست لێ کێم نڤیسی. “ئارامی “مریەما مەزن و پیرۆزکر مافێ وییە دلدارا خوە پیروز بکت، لێ پیرۆزی لگۆر مرۆڤا تێن گوهۆڕین، لەوما ئەز ناڤێ “مریەما ل کچا خوە ناکم و من نەڤێت ناڤەک من بەر ب گۆمانا ڤە ببت و کا دێ نەڤیێ من کوڕێ کێ و کیژان بابی بت. ماموستا ئارامی “عقلێ خوە نڤیسی دەینا سەر دەستێن خوە لاوما کەت لەپێن دەلنگ کورتا و دوماهیێ ژی عقلێ خوە خوار. “ماموستای دڤیا “فەلسەفێ بکوردی خوش کت، لێ بسماللەهیا ل دەستپێکێ تاما وێ بر. ماموستە “ئارامی پرتووکا سەروچاڤێن خوە نەبی بتنێ فێسبوکەک بۆ سەروچاڤێن مە چێکربی، تێت بیرا من دڤی فێسبوکێ دا پرتووکەک پۆستکربی لسەر نڤیسی: ئەگەر تە زانی پرتووکەک لاوازە پێتڤی ناکت بخوینی وی دەمی من زانی ماموستا قەلسە ژی و چ ژ هەلسەنگاندنێ چێناکت. ماموستە “ئارامی نەدڤیا دلێ کەسەکی ژێ خوە بهێلت لەوما کەسەک بۆ خوە نەهێلا. ماموستای بۆ مە بەحسا “قرالا دکر کا چەوا خوە دهاڤێت دەلنگێن فیلۆسۆفا و بۆ وی ببوو مراد کو جارەکێ “پاڤلی ببینت. ماموستە “ئارام ئەڤە سەرێ بیست و پێنج سالانە گاڤا ئاخڤت ب ئەزمانێ خوە یێ هەرێمکی پەحن بەحسا یونانی یێن کەڤن دکت و ئەو بخوە ژی نەشیا ببت دینەکی وەکی “دیوژەنی، کا چەوا گۆت “ئەسکەندەری خوە ژبەر تاڤا من بدە ئالەکی و من چوو تشتێ دی ژ تە نەڤێت. “ئارامی چو جارا چەپەرەک نەگرتە هەتا ئەڤرۆ چەپەرێ خوە بەردت. “ئارامی گوهۆڕینەک ل باژارێ مە کر بەلێ نە گوهۆڕینەکا وەکی گوهۆڕینا “گورانێ بوو، کو بشێت هەست و دلا بشکێنت. “ماموستا “ئارامی خوە گۆهاڕت بەلێ نەشیا خوەهـ سەرکێ قەلەمێ نڤیسەرەکی گەنج ژی بشکێنت، ماموستا “ئارامی گەلەک بەرهەم یێن هەین، لێ بەلێ نەشیا ب بەرهەمێن خوە کەسەکی ببال خوەڤە بکێشت، بەروڤاژی ئەو بخوە هەر رۆژ ببەرهەمێن خوەڤە یێ ددویڤ ئێکیرا دچت. نەنە ئەگەر من دڤێ نڤیسێ دا سڤکاتی پێکرنەک کربت ئەز راست نابێژ! ماموستە “ئارام کەسەکی مەزنە ژبەژنا گەلییێ زاخو. خوەدان نرخە لەوما ژبۆ بانگەشا هلبژارتنێن ئیسال ئەو بی بەدیلێ تونێلێ.
