جاسم محمد شرنەخی
پشکا دوویێ
سیاسەتمەدار ومەزنە ڕۆناکبیرى رۆژئاڤایا وەڵاتێ عەرەبى (مەحفوز نەحناح) ل دۆر هەلبژارتنێن نە ڕەوا دبێژت: ” صندوق الانتخابات زجاجي! لکن على يمينه غشاش وعلى يساره رشاش! – ڕاستە سندوقا مەیا دەنگدانێ ژ شۆشەیە! لێ مخابن ل ئالیێ ویێ ڕاستێ فێلبازەک هەیە ول ئالیێ چەپێ ژى تڤەنگەکا گۆلەبارران هەیە!” د پشکا ئێکێ ژ گۆتارا مە، ئاماژەیەکا بلەز و بەز ب (4) جۆرێن سەختەکاریا بەرى دەنگدانێ مە دابوون، بەلێ چیرۆکا سەختەکاریا مینا بەندێن ڕۆستەمێ زاڵن خلاس نابن، ئەڤجا دا ل فێرێ ژى بەحس ل هندەک ڕەنگێن دن یێن سەخەتەکاریا بەرى هەلبژارتنان بکین: 5- ترساندنا خەلکێ: جارەکێ د گۆتن: دێ ئازۆقێ وان هێتە بڕین یێن دەنگێ خو نە دەنە مە، دەمێ ئەو درەوە کەڤن بوو و چ ئازۆقەیێ وەسا ژى نەما، گەڤا لێبڕینا مۆچەى د هاتە کرن، هەر ل گەلدا گەڤێن ڕەتکرنا داخوزیێن دامەزڕاندنێ نەخاسمە ل ناڤەندێن خواندنێ ئەڤ ترساندن و ئیرهابە پتر دهاتە کرن. 6-ـ نەهێلانا ڕامانێ ژبۆ نهێنیا دەنگدانێ: ژ سادەترین بنەمایێ هەر دەنگدانەکا دڕوست ل هەر پارچەکا جیهانێ چ ل سوید بت یان ل ئەفریقیا بت یان ژى ل وەڵاتێ مە کوردستانێ بتن (نهێنیا دەنگدانێیە)، هەر گاڤا ئەو نهێینیە هاتە تێکدان کوننەهە بێژین: هەلبژارتن زەڵالن و سەختەکارى نە هاتیە کرن، نویترین میناکێ ڤى جۆرێ سەختەکاریێ ژى ئەڤڕۆ چەند کەسەک وەکى ڕۆژا چەژنێ مال مال دگەڕن و داخوازا کارتێن خێزانێ یێن باییومەترى دکن، و دبێژنێ هوین ب سەر چ لایەنێ سیاسیڤە نە، هوین پاڵپشتیا کیژان لایەنێ دکن، وێ چەندێ هەمیێ ژى تۆماڕ دکن!! 7- نە ئابدیتکرنا تۆمارا دەنگدەران ب شێوەیەکێ دروست و تەمام، واتە نە پاقژکرنا وێ تۆمارێ ژ کەسێن مرى یانژى یێن چووینە ژ دەرڤەى وەڵاتى، ل دویڤ یاسا و ڕێنمایێن کوموسیونێ یێن ڤێ گەڕا دەنگدانێ، یێ ل دەرڤەى عیراقێ مافێ دەنگدانێ نینە، هەر چەندە شوین تبلا ئەلکترۆنى هەیە، و دەنگدان پێش وانڤە نەیا ب ئاسانە، لێ گومان نینە هەلبژارتن د کەڤێت ناڤ گومانێدا. 8- جۆرەکێ دیترێ سەختەکاریا هاوڵاتى دەنگێ خۆ بدەن: ل ڕۆژا هەلبژارتنا نێزیک بنگەهێن دەنگدانێ هەیدەدانەک مەزن ل دەوروبەر و ل بەر دەرگەهێن جهێن هەلبژارتنا ل پێش چاڤێن حکومەتێ دهێتە کرن، ل وى جهـ و ل دەمێ گۆرەى هەمى یاسایێن هەمى دونیایێ بانگەشە تێدا حەرام، چاڤ ل هندەک کاندیدان د هێنە خشاندن و جاران هاریکارى ژى بۆ د هێتە کرن ژبۆ کارەکێ نە یاسایى، ئەو ژ کێم خەمیێ ناکن د بانگەشێدا، ب ئاوایەکێ کارتێکرنەکا دەرۆنى ل دەنگدەران دبت. ئەڤ هەمى زێدەگاڤى ل سەر یاسایێ وپێلێنانا پڕەنسیپێن هەلبژارتنان ژلایەکێڤە و ژلایەکێ دیترڤە نەبوونا ڕێکارێن یاسایێن ڕەدعێ یێن دژوار ل سەر بناغەیێ سەختەکارى تاوانەکا سیاسیا مەزن و ترسناکە، ئەگەر یاسا هەبن ژى ناهێنە جێبەجێکرن ل سەر سەختەکاران، ئەڤ هەدوو جۆرێن فاکتەران چەندین نیشانێن پرسێ (؟؟؟؟) و سەرسورمانێ (!!!!) دخێنە ل سەر هەلبژارتنان. هندى مە بەرپەر ڕەش کرین د هەردوو پشکێن گۆتارێدا هەمى (لێ لێ) بوون و هێشتا (لۆ لۆ) یێن مایین، هێشتا سیرێن سەختەکاریا د دەنگدان و پشتى ب هەلبژارتن ب دویماهی دهێن یێن مایین و نە هاتینە سپیکرن!! لێ سەرەڕاى ئەڤا مە گۆتى هاوڵاتى ب هوشیاریا خۆ یا هاتیە ئاڤاکرن د ئێکەم هەلبژارتن ل ساڵا 1992 وەرە وهەتا نها دکارن گەلەکێ ژ ڤێ سختەکاریا بەریا هەلبژارتنا ڕسوا بکن، و فشارێ ژ بۆ نەهێلانا وێ پەیدا بکن، جار بۆ جارێ باشترە، چاڤێن مە ڕۆهنن ب هەڵاتنا ڕۆژەکا گەش ئەم ژى سەرێن خوە ب وەڵاتەکێ سەرکەفتى د هەلبژارتنێن پاقژ و زەڵالدا بلند بکین، ڤێجا کى ببت ژێڕا پیرۆز بت مادەم ب حەلالیە.
