تەحسین ناڤشکی
هندی هەر وەلاتەک خودانێ خوە و خەلکەک نەخویندەوار بت و پترییا وان حەز و مەرەقێن خوە رەوشەنبیرکێنێ ل دەف نەبن و تاکێ وی نە یێ بەرهەڤ بت پرتووکەکێ ب هزار دیناران بکڕت، لێ رۆژانە ب کێمی پاکیتەکا جگاران ب دوسێ هزار دیناران بکڕت، گەلەکا ب زەحمەتە تاکێ ڤی جڤاکی بشێت خوە ژ رەوشەنبیرییا کەڤنشۆپا ب درێژییا سەدان چەرخان مەژییێ وی داگیر کری ئازاد بکەت و ئەو خەلک یێ بەرهەڤە ب هەموو رێکان بەرگیریێ ژ وێ رەوشەنبیرییا گەنی و د سەرێ خوە دا پیرۆز دبینت بکەت. گۆرەی ڤی ژیواری، دەمێ ئەو کەسێ ل ڤێرێ خوە ب ناڤێ رۆشەنبیر ددەتە نیاسین، د جڤاکەکێ وەسا دا، خوە ل سێتکێ حەرامێ (دین _ سیاسەت _ سێکسی) ددەت، بلا ئەو هزر بکەت کو ئەوێ خوە ل زەڤییەکا ئەلغامان ددەت، ژ بەر کو هەکە ژ بلی ئازادیێ چو تشتێ دی ل دەڤ وی رۆشەنبیری پیرۆزییا خوە نەبت، ب دروستی هزرێن وی و هزرێن پترییا خەلکێ دی بەرەڤاژی ئێکودونە. ئانکو کەسێ رۆشەنبیر ب چ رێژە ل دەڤ خوە یێ دروستە، لیبرالە یان مارکسییە و چەپڕەوە، خەلکێ دی ژی هەر وەسا ل دەف خوە یێ دروستە کو خودان بەهانە و پرنسیپێن خوە یێن پیرۆزێن دینی و عەشیرێ و ئایدیۆلۆجیێن دییە.. ئانکو ب دیتنا پترییا جڤاکێن گۆشەگیر و محفازکار، ئەو کەسێ پەیاما رۆشەنبیری هەلگرتی و هێرشێ ب دژواری و بێ دبلۆماسییەت دکەتە سەر پیرۆزیێن پتریا جڤاکی، ئەو کەسەک ب ڤارێ و خڕیای دهێتە ل قەلەمدان و جهێ وی د ناڤ جڤاکەک پترییا وی شەیدایێن دینێ و عەشیرێ و حزبا سیاسی دا نینە. ئەڤە هەڤڕکییەکا دۆمدرێژە، دیرۆک شاهدە ئەو رۆشەنبیرێن خودان سەرەدەرییەک ئەقلی، پەیام و ئیرادە و بەرهەڤی دانا قوربانییان شیاینە خەلکەکی خواندەڤان و تێدگەهت، هێدی هێدی، بێی کو دارێ د بنی ڕا ببڕن هشیار بکەن و بەرەف جیهانا شارستانی ببەن، لێ ئەو رۆشەنبیرێن هەڤدژ دگەل پەیاما خوە و دەقودەق ئەوا د سەرێ خوە دا ب شێوەیەک هەلچۆنی دبێژت و تنێ ئالییەکی ژ سێ ئالیێن سێتکێ حەرام (دین ـ سیاسەت ـ سێکس) بکەتە ئارمانجا رەخنەیەکا تەشەنوجانە و هەستێن یێن دی بریندار بکەت، گەلەک ب زەحمەت بشێت وێ پەیامێ بگەهینت. ژبەر کو سێتکێ حەرام (الثالوث المحرم) هەڤکێشەکا ئێکگرتییە و گەلەک ب زەحمەت ژێک جودا ببت. دبت ب رێکەڤتنا هەردو ئالیێن هەڤڕک جڤاک بەرەڤ ئاراستەیا تەناهییێ و پێکڤەژیانێ و ئاڤاکرنا شارستانییەک پێشکەڤتی بچت. مخابن، ئەڤ راستییا گەلەک ژ وان کەسێن د جڤاکێن گرتی دا خوە ب رۆشەنبیر دزانن، دێ بینین هەتا سەر هەستی هندەکا ژ وان خوە رادەستی حزبان، عەشیر و مەرجەعێن دینی کرینە، وەک هەر بەپرسەکێ گەندەل گەهشتینە ئارمانجێن خوە یێن نەشەرعی و بۆ خوە حەلال کرین، هەڤدژییا دی ئەو جۆرە رۆشەنبیر رێکێ نادەتە خێزانێ خوە وەک ئەو بەحسێ ئازادییا تاکە کەسی و ژنێ دکەت ئازاد ببن، تنێ ژ سێتکێ حەرام دێ دینی یان حزبێ یان عەشیرێ تنێ یان دووا ژ وان گۆرەی بەرژەوەندییا خوە کەتە ئارمانجا لێدانێ و ئاستەنگ د رێیا پشڤەچۆنێ دا، ئها هینگێ گومان بۆ مرۆڤی پەیدا دبت کو ئەڤ رۆشەنبیرە گەوهەر ئیشکالی بشێت گوهۆڕینان د جڤاکێ خوە دا پەیدا بکەت، ژ بەرکو ئەو نەشیایە ژ خوە دەست پێ بکەت و سێ گۆشەیێ مرار بوویە ئاستەنگ د ریا ئازادییێ دا، دین یان سیاسەت یان سێکس تنێ نینە و بێی رخنەگرتن ل ئێکی ژ هەرسێ تابۆیان هەڤکێشا هەڤڕکییێ و گوهۆڕینێ تەمام نابت. دبت کاکلا ئاڕیشەیێ ژی هەر ئەو بت کو پڕانییا خەلکێ نۆرمال گەلەک ژ مێژە خودان رۆشەنبیرییا عەشیرێ و دینی و پاشی سیاسەتێ بوویە. ئانکو پڕانییا وان نزانن ژبلی وی دینێ وی باوەری پێ هەی چو دینێن دی د دروستن، ژبلی عەشیرەتا وی چو عەشیرەتێن دی د روستن، ژبلی حزبا وی چو حزبێن دی د دروستن، بەرانبەر دەمێ پرانییا کەسانێن رۆشەنبیر، ب دیتنا خوە یا تیۆری رەت دکەن و هێرشی وان پیرۆزییان دکەن خوە دروست دانن، هینگێ تشتەک نۆرمالە ئەو خەلک ژی ل دووڤ چوارچۆڤەیێ خوە یێ هزری بەرگیریێ ژ پرنسیپ و قیەمێن خوە یێن میراتێ هزاران سالان بکەت و هێزا خوە د چەپەرێ خوە یێ گشتی را بینت کو ژ پترییا خەلکی پێکهاتییە دژی رەوشەنبیرێن کتەکا کێم هەڤڕایی بیروبۆچۆنێن وی خوە دیار دکەن. ئەوا مایی من ب کورتی نەگۆتی، هندی کو رۆشەنبیرێ کوردستانێ ژی خودان پەیامەکا رۆهن نەبت و بەرهەڤ نەبت خەلکێ خوە بێ لایەنی هشیار بکەت، نەبەرهەڤ بت قوربانییان سەخمەرات گوهۆڕینێن شارستانی بدەت و دوماهیی رادەستی واقعی ببت و ئەو ژی وەک وان بکت و بێی باوەری پێ هەبت، ئالایێ منافقییێ بلند بکەت، جڤاکێ کوردی ژی مینا جڤاکێن دی ل رۆژهەلاتا ناڤین دێ هەست کەت کو ئەو یێ دروستە و ئەو کەسێن خوە ب رۆشەنبیر دزانن د خڕیای و د سەرداچۆینە، تنێ شێخ و مەلا و خودان حزب و عەشیرەت د دورستن و ئەون رۆشەنبیرێن راستەقینە، هینگێ جڤاک دێ هەر مینت ئێخسیرێ رۆشەنبیرییا خوە یا کلاسیکی یا کو ژ سێتکێ حەرام پێک دهێت و گێژەڤانک دێ بەردەوام بت.