جاسم محمد شرنەخى
وەڵاتێن ژ ستەما داگیرکرن و دکتاتۆریێ رزگار دبن دوو قویناغێن سەرەدەریێ ل گەل هێزێن خویێن چەکدار هەنە: قویناغا تەڤگەڕى و شۆرەشێ و یا دویێ یا دەولەتدارى و حوکمڕانیێ، ل قویناغێ ئێکێ دبت هێزێن چەکدارێن ڕزگاریخواز سەر ب لايەنەکێ یان چەندین لایەنێن شۆرەشڤان بن، لێ د حوکمڕانیێدا سۆپا یان هێزێن لەشکەرێ وەڵاتى دهێنە ڕێکخستن و نامینن سەر ب چ لایەنێن حزبیڤە، جڤاکناسێ ئەڵمانیێ ماكس ڤایبەر ودیسان هەمى ڤەکولەریێن سوسیولوژى و سیاسى دۆپات دکن: تەنها وەڵاتى (دەولەتێ) مافێ قورغکرنا هێزێ (واتە هێزا هشکا لەشکەرى و ئەمنى) هەیە، نە لۆژیک نە بنەمایێن سیاسى و دستۆرى و یاسایى ھزرەکا بەرۆڤاژى ڤێ چەندێ قەبوول نا کت، چونکى حەتمەن دێ بتە ئەگەرێ کارەساتێن مەزن وەکى شەرێ ئەهلى و ناڤخویى و ناهێلت چ جاران ئەو مللەتێ هێزا وێیا چەکدار حزبى بت ژ قویناغا دەستپێکیا پاشڤەمان و بێفامیێ دەرباز ببت. ئەگەر ئەم ڕاست بین ل گول خوە دێ دانپێدانەکا ئاشکەرا کین: ل هەرێما مە ئیڕادەیەکا حزبیا بەرتەنگ هەیە ڕێگرە ل پێشمەرگەیێ کوردستانێ یێ قارەمان ببیتە سۆپایەکێ نیشتمانى، ئەڤە چەند تاوانەکا مەزنە یا هەمبەرى قارەمانێن پێشمەرگە دهێتە کرن!! ل کوردستانا مەیا باشۆر هەر دەرفەت نینە کورێن وەڵاتى بێى جیاوازیا سیاسى و حزبى ناڤێن خو تومار بکن وەکو خۆبەخش د ناڤ لەشکەریدا، دیسان سەربازکرنا بخورتى (تجنید إجباری ) ژى نینە هەمى گەنج ماوەیەکێ یاسایێ دیارکرى بچنە د ناڤ ڕێزێن پێشمەرگەیەکێ نە ب سەر چ پارتانڤە، پێشمەرگەیەکێ کوردستانیێ نەیێ ڤێ زۆنا حزبى و نەیێ وێ زۆنا دیترا حزبى، پشتى 30 ساڵێن حوکمڕانیێ هیشتا پێنگاڤێن موکوم نە هاتینە هاڤێتن بەرەڤ دەزگەهکرنا هێزێن سەرلبندێن پێشمەرگەى. هەتا ئەفرۆ ژى عەقلیەتەکا خۆپەرێسى هەیە ب دەنگەکێ بلندێ نەشاز د کەتە قیڕى و گازی دکت تایبەت ل گەل هەر پڕۆسیسەکا هەلبژارتنان: هو خەلکینوو دەنگێ خو بدەن وى لایەنێ سیاسى یێ سوپایێ وى سەنگەرێ شەرى هەمبەر دوژمنا گرتى!، هەتا کەنگى دێ ئەڤ سینەما بەلاش بین ل ناڤ مرۆڤایەتیێ، تشتێ سەیر و سەرێ مورکا مە کوردا ل سەر ژ لایەکێڤە هەر ناهێلن خەلکێ نە ژ بەندا وان بهێن ببن پێشمەرگە، ڕێ نادن پێشمەرگەیەکێ ئاڤاکرى و پێگەهاندى ب عەقیدەیەکا نیشتمانى مینا هەمى سۆیایێن وەڵاتێن دونیاییێ پەیدا ببت، یێن ل نالێ ژى دن و ل بزمارى ژى، دن مینا مەنسۆر حەلاجی گۆتى: (( ألقاه في اليم مكتوفا وقال له : إياك إياك أن تبتل بالماء – دەست و پێ لێ گڕێداى هاڤێتنە د گۆڵا ئاڤێدا و سەر حالێ ویڕا گۆتنێ نە وەبت نە وەبت تو شل و تەر ببى ))، ژ لایەکێ دیترڤە هەر ئەو یێ کارێ خویێ حزبیکرنا پێشمەرگەى د کنە منەت ل سەر سەرێ هاوڵاتیێن دیرۆکا ژین و ژیارا وان پڕى قوربانى هەتا ئەم گەهشتینە ڤێ ئاستێ سەربەخوییا سنۆردار. سەرەڕاى یا بوورى هەر چاڤەڕیى ڕۆژەکا گەشین پێشمەرگە تێدا هێما و سومبولەکا نیشتمانیا بلند بت، پاڕاستى بت ژ لەزیتنا سیاسییا بەربژێر و لایەنێن هەڤڕک، نە مینت کەڕەستەکێ بانگەشا حزبیا نە ڕەوا.
