رۆژه‌ڤكوردستانی

لۆ بالۆ خالۆ … لۆ بالۆ خالۆ

Kan vara en bild av Mihemed Celki

محمەد چەلکی

(تێکستەکا خرشە تنێ بۆ بیرهاتنا هندەک مرۆڤێن هێژا و جهێن هاتینە ژبیرکرن هاتیە نڤێسین) هندەک گۆتنێن بەڵافش …. ل سەردەمێ خرشدبێژن: ئەزمان سۆرک ب شەڤێ دگەڕهن … ب رۆژڤە هەمی دبنە گوه و ل سێڕیانا، ل ناڤ بازاری، ل کۆلانا، ل بەر دیوارا، ل ناڤ عاقارا، ل سەرێ زەڤیێ و ل بنێ زەڤیێ، ل سەر کانیێ و ل سەر جۆکێ، ل بن هەر گەزەکا عەسمانی، هەر ئەزمان سۆرەکی مۆبایلا وی یا ڤێ و هەر چرپەکێ، پس پسەکێ، گژانکەکێ، گرنژینەکێ، چاڤ گرێبوونەکێ و هەر تشتێ ببینیت و نەبینیت تومار دکەت … بۆ کێ دهنێریت، بۆ عەجیەکی، شێتەکی، تۆپز ل کەندالەکی، بۆ دینەکی، هارەکی، بۆ قەچاخچی و قۆلبڕەکی، بۆ گەوادەکی، دەیۆزەکی و کێ و کێ و هەتا وی ئەفسەرێ دبن ترو ستێراڤە ملێ وی خویل بووی و خوە رۆژەکێ زانکۆیەکا لەشکەری نەدیتی و ب رێباری ژی د بەر جادا وێڕا نەچووی دهنێریت، کەس نزانیت. هندەک دبێژن هەر ئەزمان سۆرەکی ئەرشیفەکا فهێتیێن کەسێن د دەستهەلاتێدا و ب ناڤ ماقویلێن باژێرینە، خرڤەکرییە. ئەگەر رۆژەکێ وێ ئەرشیفا خوە ڤەکەت یان هندەکێن ژ وی زیرەکتر و تێبڕتر ژێ بدزن. ئەڤ باژێرە دێ بیتە ماکا فهێتیێن جیهانێ. جارەکێ پەرکەکێ بچویک ژ بەریکا ئەزمان سۆرەکی دکەڤیت، تێدا هاتبوو کەسەکێ ناڤدارێ ڤی باژێری(ب ناڤ و نیشان) دا کو پۆستێ وی ژێ نەهێتە وەرگرتن، حاشا سومە حاشا باڵا دەستێن ڤی باژێری بۆ ژنا خوە دبرن،(ئەستەغفیرەلله). باوەر بکەن زومێنەکا وەسا ئێخستە باژێری … بەلێ هەمی ب خوە وەرهاتن و بەڕەک ژ ڤانێن دەشتا گەڤەرێ ب سەر دادان. دبێژن هندەک ئەزمان سۆرک زوی گەهەشتنێ و ئەو پەرک داعویران … هندەکا یا ژ دەڤێ ئەزمانسۆرکێن ڤی باژێری گولێبووی و ڤەدگێڕن و دبێژن: هەر کەسێ سیبەرا ئەزمان سۆرکا گەهەشتێ، شێت دبیت و هار دبیت، یان دڤێت ل خەستا دینا بنڤیت یانژی دێ بنە شکەفتە ڕەشێ* یان شکەفتا بیبەکرا* و ئەگەر پیچەکێ ئەزمان سۆرک دلۆڤانیێ پێ ببەت دێ ل گەرا خەنۆی* رۆژەکا چلێ زڤستانێ جەمەدا گەڕێ شكێنن و سێ جارکی د گەڕێ هلینن و ل سەر کانیا هێلیشوا* مامێ حەجی محەمد تاهر* دێ دەڤێ گورگان لێ بێنیت*، ل شکەفتا نێچیرڤانا* بۆ هۆڕک و بێملبیرا *و بۆ سورا کوترا* ئەو دیوی سەلتەنەتا ئەجنێن ئەزمان سۆرک بەن. دبێژن ئەزمان سۆرک سیتاڤکن، ژ دویرڤە فالێن هەمی قەرەچ و بابە دەروێشا دخوینن، ژ تیشکا رۆژێ بلەزتر دەرباز دبن و د سەر ئاڤێرا دچن و تەڕ نابن. دبێژن خەرزێ ئەزمان سۆرکا رێتی خوە ڤایرۆسێ کورۆنایێ ژی ڤێرا ناگەهت هەمیان بهنگێڤیت، ئاجوج و ماجوج ژ بەر دڕەڤن، ژ با و سیبەرا وان خوە ڤەدزن لێ ئەو تەنێ ژ گەلاجیا پەترولێ و سۆرێ چاڤشین دترسن. ئەگەر ترسا پەترۆلێ و سۆرێ چاڤ شین نەبایە، هندەک دبێژن: نوکە سەرێن گەلەکا چووبانە رێزا کۆلاڤەکی، عانەکی … دبێژن محو دینۆی ڕاست دگۆت: لۆ بالۆ خالۆ … لۆبالۆ خالۆ* ئەو تنێ د ئەزمانێ ئەزمان سۆرکا دگەهشت و هەر رۆژ ل سەرێ گوندی ئەزمان سۆرک درەڤاندن و د رێکا کانیا گوندی دا یا ب ناڤێ کانیا شێخی* شڤتانەک دەدەستان دا بوو بەردبوو پێژانێن زەڤیێن هنداڤی کانیا شێخی و دبوو حەیتە حەیتا وی و شڤتان دادوەشاندە ئەزمان سۆرکا … هەکە رێبارەک یان زارۆکەکێ گوندی دیتبا ب دێمەکێ بشکۆری دابێژیت: لۆ بالۆ خالۆ … لۆ بالۆ خالۆ … ئانکو من تو ژ ئەزمان سۆرکا پارازتی و بخێر هاتی … وەی پا محۆ دینۆ تو مرۆڤەکێ ب عاقل و دلۆڤان بووی تو قەت ژ ڕەڤاندنا ئەزمان سۆرکا ماندی نەدبووی … گۆڕا تە بگول … جارەکێ داپیرا من(خودێ دلۆڤانیێ پێ ببەت، دگەل مریێن هەوە هەمیان) گۆت: هەر دەما محۆیێن دین د ناڤ مە دا نەمان، دێ ئەزمان سۆرک قوتبڕیا زارۆکێن مە ئینن … هیڤی خازم کەس ژ هەوە نەکەڤیتە بەر با و سیتڤاکا ئەزمان سۆرکا.• شکەفتە ڕەش … گەلەک شکەفت ب ڤی ناڤی هەنە لێ من مەرەم پێ ئەو شکەفتە یا ل بەر لێڤا خابیر … دبێژن ئەو گورانگەها هەمی ئەجنێن دەڤەرا بەرواری و گولیایە.• شکەفتا بیبەکرا یا ل چیایێ مەتینا .. شکەفتەک گەلەک مەزنە و ل سەردەمێ هەردوو شورەشێن کوردستانێ خەلک دچوو تێڤە بۆ خوە پاراستنێ ژ هێرشێن فرۆکێن لەشکەرێ عێراقێ.• گەڕا خەنۆی … گەرەکا ئاڤێیە ل سەر رویبارکێ رۆی ئەوێ سەرەکانیا وی ژ هرۆرێ دزێت، ئەڤ گەڕە ل گوندێ مەیە و ئەم لوێرێ فێری مەلەڤانیا بووینە.• کانیا هێلیشوا کانیەکا ب ناڤ و دەنگا گوندێ مەیە.• مامێ حەجی محمەد تاهر مرۆڤ چاکەکی گوندێ مەیە، یێ چوویە بەر دلۆڤانیا خودێ.دەڤێ گورگاب بێنان … دەما چارپێیەکی گوندیان ژ گاڕانێ ڤەدما یان بەرزە ببا، داچنە دەف مرۆڤەکێ قورئان خوین و ژ خودێ ترس دا پێڤە بخوینن دا گورگ وی چارپێ نەخون. شکەفتا نێچیرڤانا یا چیایێ زنارا کێستە و گەلەکا ئاسێیە.• هۆرک و بلێمبیر دوو گوندێن بەرواریانە ل سەر سنوورێ تورکیانە.• سوارا کوترا … جهەکە دکەڤیتە ناڤ باکورێ کوردستانێ بەدرخان بەگێ شەرەکێ مەزن لێ کربوو ل دژی تیریان … • محۆ دینۆ ناڤێ وی یێ درست محمەدسالح بوو کەسەکێ روی خۆش و مرۆڤ دوست بوو، یێ لال بوو و هەروەسا یێ خودان پێتڤیێن تایبەت بوو، خەلکێ گوندێ بابیرێ بوو… هەر کەسێ بیانی هاتبایە گوندی دا چیتە بەراهیێ و بێژیتێ: لۆ بالۆ خالۆ، ئەڤە سلاڤا وی بوو، بەلا خۆ ژێ ڤەنەدکر هەتا بربا مالا خوە• کانیا شێخی کانیا زەلامایە ل گوندێ بابیرێ.٢٩-٠٩-٢٠٢١دهۆک

پتر به‌رچاڤ بكه‌
ڤێژی ب بینه‌
Close
Back to top button

ئه‌ڤ مالپه‌ره‌ cookies بكارتینه‌ . ژ بو به‌رده‌وام بونا ب كارئینانا ڤى مالپه‌ری . پێویسته‌ تو بكارئینانا مه‌ بو cookies ب په‌ژرینی 

Close