بژار نێروەی
جیھانا سیاسەتێ چجاران رون و ئاشکرا نینە ب شەف و نیف شەفا بریار وپرسێن مەترسیدار دھێنە شڕوفەکرن و ئەنجامدان، ل وەلاتەکێ سیاسەتا دەسھەلاتدارێن وێ بکێر نەھێت و شیان نەبن رێکخستن و سیستەمەکێ باش وەلاتی ب رێفەببەن بێ گومان دێ دەنگێ نەرازی دروست بیت دەمێ دەنگێ نەرازی و یاخی درۆست بو دێ پەیفا(ئوپزسیون)لسەر ئەنیا وان ھێتە نفیسین ئێدی ئەف کەسە و لایەنە ئوپزسیونە، بەلێ چ ئوپزسیونەک.! خارنا لایەنێن دەسھەلاتێ دفێت دا بھێز بکەفن و لدژی سیستەمێ دەسھەلاتا وی وەلاتی کار بکەن.! ………………. کوردستانێ نە بتنێ ئوپزسیون لاوازە بەلکی بێ ددانە، چ دەمەکێ دەنگێ نەرازی یێ جادێ و ئوپزسیونێ نەبویە رێگرەکێ مەزن کو دەسھەلاتێ ب شلقینیت، و ببیتە مەترسی لسەر کورسیکا وان، ژبەرکو جورێ ئوپزسیونێ شاش دھێتە پەیرەوکرن، ل چ جھان نینە بێژیە دەسھەلاتێ پارا بدەمن دا ل دژی تە کار بکەم و بھێز بکەفم، ھەروەکی لایەنێن نەرازی بەژداردبن دحکومەتێ دا و پلە و ئیمتیازێن خو وەردگرن، بێ دەسھەلات، ئانکو بریارا موتلەق و یا دوماھیکێ ب دەستێ وان نینە، ژبەرکو لایەنێن ئوپزسیون ب خارنا دەسھەلاتێ پیچەک بھێز کەفتینە، واتە مادەم ژ ئەگەرێ من تو بھێز کەفتیە بومن گەلەک یا ب ساناھیە ئەز تە بھێلمە برسی، وتە مەجبور بکەم ددانێت خو بێخی و نیشامن نە دەی، ئەگەر ژی دێ دگەل من بی دەسھەلاتێ دا و شریکێ ھەمی کارێن من بی چ باش چ خراب وی دەمی دفێت تبلا نەرازی بوتەژی بھێتە درێشکرن وەک ئوپزسیون نە بتنێ بو لایەنێن دەسھەلاتێ،و ھەر ئێک لدیف حەجمێ خو بەژدارە دفێ کاولستانییێ دا، …………………. ئوپزسیون نابیت لسەر بنیاتێ رەق و دوژمناھیێ ژدایک ببیت ژبەرکو ئوپزسیون دێ ژدایک بیت دا رەق و دوژمناھیا دەسھەڵاتێ بەرامبەر خەلکی نەھێلیت ئەگەر ئەو ژی ھەمان سیفەت ھات، کەواتە ژدایک نەبیت باشترە،کارێ ئۆپزسیونا درست ئەنجامدانا کارایە،بو خەلکی دەمێ لایەنێن دەسھەلاتێ کاران نەکەن، ئەم دنوکە دا پێتفی ئوپزسیونەکا زەنگینن، مە پێتفی ئوپزسیونەکا فەقیر نینە، یان ژی ب ئاشکرای بێژم پێتفی ھندێ ناکەت لسەر حسابا دەسھەلاتا گەندەل خوژی زەنگین بکەی و گەلەک کارا و ئەکتیف نەبی،دەسھەلاتێن گەندەل دئەسل دا دلاوازن بەلێ ژبەرکو ئوپزسیون بێسەروبەرە و ھەژارە، دەسھەلات بھێز دکەفیت و خەلک و مللەت ژی گرنگیێ نادەنە جورە ئوپزسیونەکێ کو فەقیرە کو نانێ وێ لسەر لایەنێن دەسھەڵاتێ یە، ھەر ژبەر ھندێ خەلک درەفیت ژ لایەنێن ئوپزسیونێ،و ددمەکێ دا ئەگەرێ ھەرە سەرەکی ئەوە ئوپزسیون لدژی دەسھەلاتێ ژدایک ببیت و ب گەھشتنا وێ ب دەسھەلاتێ،ژ دەسھەلاتەکا گەندەل ب گوھڕیت بو دەسھەلاتەکا ژیر و عاقل مەند و پری خزمەت.
