محەمەد چەلکی
سەرۆکێ لەشکەرێ قودسێ ئیرانی پشتی دەرکەفتنا ئەنجامێن بەراهی یێن هەلبژارتنان و دیار بووی بەرەیێ فەتحێ سەر ب ئیرانێ و حشدا شەعبیڤە ئەنجامێن باش بدەستڤە نەئینایین، سەرکول و پێخاس شڤێدی نیڤ شەڤ گەهەشتە بەغدا و هەر زووی چەند کۆمبوون دگەل باسکێ ئیرانێ کرن. هەلبەت ئیران رازی نابیت هەما هوسا ب ساناهی عێراق ژ بن هەژموونا وێ بدەرکەڤیت. دەرکەفتنا عێراقێ ژ بن هەژموونا ئاخوندێن ئیرانێ رژێما ئیرانێ بەر هەلوەشیان و کەفتنێ دبەت. سەرانێن ئیرانێ ڤێ ئێکێ باش دزانن لەوا هەموو بزاڤکرن دا هەلبژارتن ل عێراقێ نەهێنە ئەنجامدان، لێ رژدیا ئەمریکا و باسکێ دژی ئیرانێ ل عێراقێ شیان شکەستێ ب هەموو بزاڤێن ئیرانێ بینن.
هەرچەندە هەتا ڤێ گاڤێ ئەنجامێن داویێ یێن هەلبژارتنان نەدەرکەفتنە لێ مرۆڤ دکاریت سیمایێ حوکمەتا بهێت یا عێراقێ بزانیت کو دێ حوکمەتەکا ئەنتی ئیران و بەر ب جیهانا عەرەبی و رۆژئاڤاڤە چیت چونکو بەری هەلبژارتنان ب قانوون رێک ل دەمەزراندنا هەڤپەیمانیێن پشتی هەلبژارتنان و هەروەسا دەرکەفتن ژ باسکەکی(کوتلەکێ) و چوونا ناڤ باسکەکێ دی هاتیە گرتن ئانکو باسکێ ئیرانێ نکاریت ئێدی شیعەیان لبن ئێک سیهوانە کۆم بکەت، لەوا پێشبینی دهێتە کرن کو باسکێ مەزن دێ بۆ خوە ل هەڤپەیمانیا گەرهیت و ل ڤێرە بۆ پێک ئینا هەر حوکمەتەکێ کو یا ب سەرکەفتی بیت دڤێت باسکێ سوونە و کوردان رازی بکەت، ئەگەر نە نەشێت زورینێ دپەرلەمانیدا مسگور بکەت.
یا دیارە کو سوونە و کورد هند ژ سیاسەتا ئیرانێ درازی نینن ب تایبەت کورد چونکو ڤەکری حوکمەتا ئیرانێ و حشدا شەعبی گەفان ل هەرێما کوردستانێ دکەن و ئەڤە بوویە دەمسالەک ب بەردەوامی سنوورێن هەرێمی دبەزینن و ب درونا هەولێرێ ب ئارمانج دگرن.
چاڤ هەمی ل دەرگەهێ کۆمسیۆنا هەلبژارتنانن کانێ دی کەنگی ئەنجامێن هەلبژارتنان بفەرمی ڕاگەهینیت و ناڤێ باسکێ زۆرینە بری دیار کەت، لەوا ئیرانێ ب لەز و بەز حاقانی هنارتە عێراقێ دا هەر چ نەبیت رێکێ ل وێ حوکمەتێ بگریت یا ببیتە ئەگەر کو عێراق ژ بن هەژموونا وێ بدەرێخیت. ژ بلی هنارتنا حاقانی بۆ عێراقێ بەردەفکێ وەزارەتا دەرڤە یا ئیرانێ گۆت: “عیراق یا ل سەر رێکا راست برێڤە دچیت لێ دڤێت بارەگایێن هێزێن ئوپۆزسیۆنێ ل سەر سنووری نەمینن، ئەگەر نە دێ کەینە ئارمانج و ناهێلین ژ عیراقێ گەف بۆ حوکمەتا ئیرانێ بهێن و ئارامیا مە تێکبدەن.”
بەلێ ئەنجامێن هەلبژارتنان ترس و لەرز ئێخستیە دلێ ئاخوندێن ئیرانێ لەو هیستریایێ گرتنە و هەتا ژ عێراقەکا گوهدارا ئیرانێ پشت ڕاست نەبیت قوین توتیک ڤێ ناکەڤیت.
هەلبژارتنێن عیراقێ دەستپێکەکە کو عێراق خوە ژ گێژەڤانکا شەرێ تائیفی و ناکۆکیێن هەرێمی دویر ڕابگریت چونکو ژ بلی گەندەلی و ژ کارکەفتنا هەموو سکەترێن ژیارا عێراقیان پێڤە گرێدای وەکو دامەزراندن، کێمبوونا بهایێ دینارا عیراقی، ئابوورێ پشبەستی ب بازارێ پەترۆلێڤە، ساخلەمی و کەرتێ پەروەردێ عێراق بوویە مێرگا خوە ژێک سافیکرنا زلهێزێن جیهانی و هەرێمی. ئەگەر باسکێ دژی ئیرانێ بهێز ئەنجامێن هەلبژارتنان بدەستڤە ئینان، ئیران دێ تەڤ کارتێن فشارا خوە ددەتە کاری و بۆ ڤێ چەندێ ژی حشد یا تێزەکرییە لەوا ب دویر نابینم کو دێ هەوەکا دن یا شەرێ تائیفی یێ شیعە-شیعە و سوونی دەستپێکەت ژ دایکبوونا حوکمەتەکا نووی دێ گەلەک یا ب زەحمەت بیت چونکو هاتنا حاقانی و ئاخفتنا بەردەفکێ وەزارەتا دەرڤە یا ئیرانێ ڤێ نامێ دگەهینن.
ب زەحمەتە باسکێ دژی ئیرانێ کو باسکێ سەدری سەرکرداتیا وێ دکەتن د هەل و مەرجەکێ هوسا دا بکاریت حوکمەتێ دگەل کوردان و سوونا پێک بینیت لەوا ب دیدا من ئەمریکا پشتی باسکێ سەدری ل ناڤ خوەیا شیعەیا بێ رووی بکەت ل ڤێرە مەرەم ئەوە چونکو سەدر یێ بێ هەلویستە و وەک گولبەرۆژێ زوی زوی رویێ خوە دگوهۆڕیت. ئەڤە ژی دێ وی پتر بێ رووی کەن د ناڤ جادەیا لایەنگرێن بنەمالا سەدری دا و زێدەباری باسکێ دنێ دژی ئیرانێ، هینگێ ئەمریکا ب رێکا سوننا و کوردان دێ دووبارە کازمی ئیننەڤە سەر تەختێ سەرۆکێ حوکمەتێ. هەر ژ بەر ڤێ ئەگەرێ بوویە کو کازمی خوە نەهەلبژارتی.
ئەڤ هەلبژاتنە تەنێ بۆ هندێ بوویە کو باسکێن ئیرانێ ل عیراقێ بهێنە قڕاندن و ژ بریاردانێ دویر بێخن.
ژ ئەنجامێن هەلبژارتنان تەنێ ئیران و باسکێ ئیرانێ ل عێراقێ دێ زیان گەهەیتێ و ئیدی عیراق نامینیت ل بن هەژموونا ئیرانێڤە. لێ ئەڤە هەموو پشتی هەوەکا دن یا شەرێ تائیفی شیعە-شیعە دێ هێتە شکەڤێ.
١١-١٠-٢٠٢١
دهۆک
