محمەد چەلکی
” شولێ خوە بکە ب ئەساس، دا دلێ تە نەکەت وەسواس” پەندا کوردی.
هەلبژارتنێن پەرلەمانێ عێراقێ و ئەنجامێن وێ دانە دیارکرن کو جەماوەرەکێ زێدەی نەرازی ژ سیاسەتا هەموو حزبێن ددەستهەڵاتێدا هەیە و ئەڤ جەماوەرێ نەڕازی هەتا ڤێ گاڤێ ژی یێ بێ پێشەنگە لەوا پشکداری د پرۆسەسا هەلبژارتنێ دا یا کێم بوو کو ئەڤە رەنگە سزادانا حزبێن دەستهەڵاتدارە. بەرهەمێ ڤێ نەڕازیێ نەشیا ترازیا دەستهەڵاتێ بۆ خوەستەکێن وەلاتیێن نەڕازی بداشکێنیت و حوکمەتەکا نیشتیمانی ل شوینێ بهێتە سەر تەختێ فەروەریێ. ئەڤە شاشیەک مەزنە جەماوەرێ نەڕازی توش بووی چونکو هەمان دز و گەندەل جارەکا دی چوونەڤە سەر تەختێ دەستهەڵاتێ.
ل هەرێما کوردستانێ ژی هەموو حزبێن دەستهەڵاتێ پآش پاشکی هاتنە و جەماوەرەکێ زێدە دەنگێن خوە نەدانە، داتایێن باوەرکری ددنە دیارکرن کو هەر ئێک ژ پارتی و یەنەکێ پتر ژ ٣٠٠ هزار دەنگدەران ژ دەستدانە کو ئەڤە کارەساتە بۆ ڤان هەردوو حزبێن بزاڤا کوردی گەهاندیە ڤێ قۆناغێ. لێ لایەنێ ژ هەموویان پتر زیان گەهەشتیێ یەکگرتوویا ئیسلامی و باسکێ ئیسلامی بگشتی و بزاڤا گۆڕان بوویە.
وەک کوردەک کەیفخوەشم کو لایەنێ ئیسلاما سیاسی هێدی هێدی بێ سەنگ دبیت و رویێ وان یێ ڕاستی بۆ جادا کوردی دیار دبیت، پاشڤەکشانا باسکێ ئیسلاما سیاسی یا پێشبینی کری بوو چونکو ئەڤ باسکە ل هەموو دەڤەرێ پاش پاشکی دچیت و نێزیکە دێ هەموو باندۆرا خوە ژ دەست دەت.
لێ پاشڤەکشانا بزاڤا گۆڕان بڤی شێوێ تراجیدی کو نەشیای ئێک کوردسی بدەستڤە بینیت، نەیا چاڤەرێکری بوو لێ ئەگەر مرۆڤ هێدی و ل سەر خوە ل دروستبوون و گەشەیا ڤێ بزاڤێ بکەت دێ بۆ دیار بیت کو حزبەکا بێ ئایدۆلۆژیەکا زەلال و هەروەسا نەیا خوەدی دیدەکا دیمۆکراتخاز و لیبەڕال بوو بەلکو وەکو پۆپۆلیستان و کین لدل هاتە سەر دەپێ شانۆیا سیاسەتێ. ئەڤ رەنگێ سیاسەتێ ژ بلی وەک بلقا سەر ئاڤێ و دەمکیە زیانێ دگەهینیت تەڤایا پرۆسەسا سیاسی چونکو ب عاتیفە و پۆپۆلیستێ ل کێشەیان مێزە دکەتن و نەخوەدی پرۆژەک ستراتیجی دوم درێژە بەلکو ڤۆکسا خوە ل سەر ناکۆکیێن دەستهەڵاتێ گەرم دکەت. لەو ل دەستپێکێ شیا یەنەکێ دوولەت بکەت و پرانیا دەنگێن یەنەکێ د هەلبژارتنێن ٢٠٠٩ێ دا بدەستڤە بینیت.
پشکداریا گۆڕانێ ددەستهەلاتێدا و پشتدانا وێ بۆ داخازێن جەماوەرێ کوردستانێ و بووی پشکەک ژ دەستهەڵاتا وێ بزاڤ دکر کو بگوهۆڕیت! ئەڤێ چەندێ وەکر هەر زووی تەڤنێ وێ ژبەرێک بچیت و هەڤالێن وێ رۆژانە وەک گولبەرۆژان روویێ خوە بۆ لایەکێ ڤەدگوهازت کو هەتا دوهی ب دز و گەندەل و پاوانخاز و پاشڤەڕۆ ددان نیاسین.
گۆڕان پشتی رەحمەتی نەوشێروانی ژ پارتەکا تام ئۆپۆزسیۆن بوو پارتەکا پشکدار د هەموو شکەستن و سەرکەفتنێن حوکمەتا هەرێما کوردستانێ دا. ب رەنگەک دن ژ بەر خوەشییا پاری و کێکا دەستهەڵاتێ گۆڕانێ بتمامی خوە ژ بەرەیێ ئۆپۆزسیۆنێ ڤەکێشا. ئێک ژ شاشیێن حوکمەتا هەرێما کوردستانێ نەبوونا چ هێزێن ئۆپۆزسیۆنێیە چونکو هەبوونا ئۆپۆزسیۆنێ کارێن حوکمەتێ دکەڤیتە بن چاڤدێریێ و حوکمەت نەچار دبیت بەردەوام پێداچوونێ بۆ بریار و کارێن خوە بکەت. ئۆپۆزسیۆن خزمەتا دەستهەلاتێ دکەت لێ گۆڕانێ ئەڤە نەکر و بوو پشکەک ژ وێ دەستهەڵاتێ یا وێ ب دز، گەندەل، بنەمال و نەنیشتیمانی ناڤدکر.
جەماوەرێ گۆڕانێ جەماوەرەک ئۆپۆزسیۆنیە و پشکداریا گۆڕانێ ددەستهەڵاتێدا و چارەسەر نەبوونا کێشێن جەماوەری ژ هەموو لایانڤە کو گۆڕانێ بانگەشا چارەسەریێ بۆ ددا، د ڤێ هەلبژارتنا پەرلەمانێ عێراقێ(١٠-١٠-٢٠٢١) دا ئەڤی جەماوەری گۆڕان سزادا بەلێ چ تۆڤ سزا جەڵتا سیاسی بوو، پشتی ڤێ جەڵتێ ئێدی گۆڕان قەت نەشێت بزڤریت بۆ گۆڕانا سەردەمێ خوەیێ زێرین(٢٠٠٩).
سەردەم هاتیە گوهۆڕین و هەموو حزبێن ددەستهەڵاتێدا ئەگەر ل خوە نەزڤڕن و کێشین خەلکێ کوردستانێ چارەسەر نەکەن پشتراست بن جەڵتا گۆڕانێ دێ وان ژی گریت و سڤکە جەڵتە د ڤێ هەلبژارتنێ دا بۆ ڤرێکر چونکو نەچوونا پتر ژ نیڤەکا خەلکێ کوردستانێ بۆ سەر سندۆقێن دەنگدانێ ڕاهێنانە بۆ هەلبژارتنێن کوردستانێ کو ئەگەر لایەنێن لیبەڕال و دیمۆکراتخاز بەرەیەکی پێک بینن و بشێن متمانا خەلکێ کوردستانێ بدەستڤە بینن دێ جەڵتا سیاسیا گۆڕانێ هەموویان گریت و سەرکەفتنا نەوەی نوێ بڤێ تدارەکا هەی، ئیماژەیە کو گوهۆرینێن مەزن ل جاددا کوردستانێ بڕێڤەنە.
١٣-١٠-٢٠٢١
دهۆک
