میر نێروەیی
هەمی ولاتەکێ دەما حکومەت دهێنە پێکئینان، پاڕتەک یان هەژمارەک ژ پارتان حکومەتێ پێکدئینن، هەروەسا پارتەک یان هژمارەک ژ پارتێن دی روولێ خو د ئۆپۆزسیۆنێ دا دگێرن، هەر یەک د چارچوڤێ خۆ دا کار دکەت، کو پێدڤیە دەستهەلات ماف و خزمەتگوزاریان پێشکێشی وەلاتیان بکەت، هەڤدەم کارێ ئۆپۆزسیۆنێ ژی رەخنەگرتن و هایدارکرنا حکومەتێ و نیشاندانا کێموکاسی و دانا پرۆژان و دیارکرنا بنپێکاریانە، و دروستکرنا فشارانە لسەر حکومەتێ بۆ خزمەتکرنەکا باشتر، ل هەرێما کوردستانێ ژی ژ سەرهەلدانا بزاڤا گۆران ئۆپۆزسیۆن دروستبوویە، کو ل دەستپێکێ گۆڕان و یەکگرتوو و کومەلێ ئەو روول گێرایە، دیڤ ژبەر پێکئینان حکومەتا بنکەفراوان ئۆپۆزسیۆن د خولا بەریا نها دا نەبوویە، پاشان ڤەلڤینا نەوەی نوێ و یەکگرتوویا ئیسلامی ئەو روول گێرایە و هەیا نها بەردەوامن، کو هەبوونا ئۆپۆسیۆنێ دەرخەرێ هەبوونا جورە دیموکراسیەکێ یە. چما پێدڤیە حکومەت سوپاسداری هەبوونا ئۆپۆزسیۆنێ بیت؟ ئەگەر د هەمبەر حکومەتێ دا ئۆپۆزسیۆن نەبیت د هەمبەر بنەماێن دیموکراسی لاوازە و هەڤدەم پێدڤیە حکومەت پێکولێن زێدەتر بدەت بۆ چاڤدێریکرنا دامودەزگەهان و دبیت حکومەتا هایداری هەر تشتی نەبیت و پێنگاڤێن حکومەتێ ژی بێمنەتر بن ژبەرکو بتنێ ئەو د گورەپانێ دایە، هەڤدەم دگەل هەبوونا ئۆپۆزسیۆنێ بێ کو حکومەت مەزاختنێ بکەت و لیژنێن چاڤدێریێ دروست بکەت و بێ کو بزاڤەک ژلایێ حکومەتێ ڤە بهێتەکرن، ئۆپۆزسیۆن چاڤدێریا دامودەزگەهان و قاچاغچیاتی و گەندەلیێ و بنپێکاریان… بۆ دکەت، هەر کارەکێ نەئاسایی و نەیاسایی دئینت زمان و پێشنیار و رەخنە دکەت، و ژئالیەکێ دی ڤە ژی حکومەتێن بێ هەبوونا ئۆپۆزسیۆن ل چاڤ ولاتێن دن و ئاستێ بلند ب بێ دیموکراسی و نزیکبوون ژ خۆسەپێنەریێ دهێن دیتن، لێ دەما ئۆپۆزسیۆن لهەمبەر حکومەتان هەبن، ب حکومەتێن نزیکتر ژ بنەمایێن دیموکراسیێ دهێنە ل قەلەم دان، هەروەسا د دەما هەبوونا ئۆپۆزسیۆنێ دا هەر پێنگاڤەک و چالاکیەکا ژلایێ پارتێن ئۆپۆزسیۆن ڤە یان ڕەخنەگر و چالاکڤانان ڤە بهێتەکرن، بەریا د مفایێ ئۆپۆزسیۆنێ دا بیت، لسەر ئاستێ دەرڤە، د مفایێ دەستهەلاتێ دایە، ئەگەر زێدەتر زەلال بکەم، دەما پەرلەمانتارێن ئۆپۆزسیۆنێ بوتلێ ئاڤێ یان پێلاڤێ دهاڤێژنە سەرۆکێ/سەرۆکا پەرلەمانی، و شەرێ داخوازکرنا مافان د پەرلەمانی دا دکەت، ئەگەر یەکجار د مفایێ ئۆپۆزسیۆنێ دا بیت، دووجاران د مفایێ دەستهەلاتێ دایە ژبەر کو روویێ دەستهەلاتا وان ب دیموکراسی دیار دبیت، دەما چالاکڤان ژی چالاکی و خرڤەبوون و خۆنیشاندانان دکەن و ڕەخنەگر راستەوخۆ ڕەخنێ ئاراستەی حکومەتێ دکەن ب هەمان ئاوایی دەستهەلات ب دیموکراسی دهێتە لقەلەم دان، حکومەتا هەرێمێ ب بەرجەستەکرن و رێپێدان ب چالاکیێن ئۆپۆزسیۆن و چالاکڤان و ڕەخنەگران زێدەتر مفادارە، ژبەرکو مافێ خەلکێ نەرازی و بێ خزمەتگوزاری یە داخوازا مافێن خۆ بکەت، لێ د دەما پێنەدانا مافان دا و ڕێگریکرن ژ داخوازکرنا مافان، تەمامەن دەستهەلات زەرەرمەندە، هەروەسا د نها دا دەستهەلات بانگەشا پرۆژێ چاکسازیێ دکەت کو ئەڤە دەما سێ سالانە چ ژێ دیار نەبوویە، ئەگەر د چاکسازیێ دا ژی د راستگوبن پێدڤیە زێدەتر رێ و ئاسانکاریا ب ئۆپۆزسیۆن و خەلکی بدەن هەیا چاکسازی بلەز بهێتەکرن. هەڤدەم حکومەت خۆ ب دەیندار و د ناڤ قەیرانان دا نیشا ددەت و ئۆپۆزسیۆن پێکولا ئەنجامدانا خزمەتگوزاریان دکەت، هەڤدەم حکومەت هەوڵێن وان ژی ژناڤدبەت، واتە نکاریت خزمەتگوزاریان بکەت و ئۆپۆزسیۆن ل شوونێ دکەت و حکومەت بزاڤێ دکەت رێگریێ بکەت و ئۆپۆزسیۆنێ کرێت بکەت ل شۆنا پێنگاڤێن باشتر، هەیا نها دەستهەلاتا کوردی هوسا د ئۆپۆزسیۆنێ گەهشیە کو پێدڤیە د هەمبەر دا د چەپەرێ شەری دا بیت، گرنگە بێژم ئەگەر خۆ ئۆپۆزسیۆن یا نەساخ لەم ژی بیت حکومەت مفادارە. حکومەت پێدڤیە سوپاسدار بیت کو خەلکەک هەبیت ڕەخنە و پێشنیاران پێشکێشی وان بکەت، ژبەرکو کەسێن هیڤی ب حکومەتێ هەبن ڕەخنەیان دگرن و پێشنیاران پێشکێش دکەن، ئەگەر حکومەت دخوازیت لسەر بنەمایێن دیموکراسی سەرەدەریێ بکەت، پێدڤیە مافان لهەمبەر وەلاتیێن خۆ ڤەکەت و مافان پێ بدەت، هەردەم حکومەتا هەرێمێ پێکولان دکەت خۆ ب دیموکراسی نیشانی دونیا دەرڤە بدەت، لێ بنەماێن دیموکراسی دیارن و ئەو بنەما ل هەرێمێ نەدیارن و ناهێنەدیتن، ژبەرکو ل چ ولاتەکێ نینە حکومەت ئۆپۆزسیۆن و خۆنیشاندەران و چالاکڤانان ب تێکدەر و ئاژاوەگێر لقەلەم بدەت، هەڤدەم مافێ خۆنیشاندانێ ب وەلاتیێن خۆ نەدەت و ماف و خزمەتگوزاری و موچەی ژی پێنەدەت، لسەر ئەنجامدانا خرڤەبوونەکێ ب سەدان ماموستا و چالاکڤانان دەستەسەر بکەت، سەرۆکێ حکومەتێ ب خۆنیشاندەران بێژیت هون چاوا سەرەدەریێ دکەن ئەم ژی دێ وەسا کەن، هەروەسا رۆژنامەڤان و چالاکڤانان و ماموستایان ب سیخۆر لقەلەم بدەت و لشوونا دادگەهێ بریارێن وی بهێنە جیبجیکرن، حکومەت وان کاروبارێن برێکا ئۆپۆزسیۆنێ ژی یێن دیموکراسیەتەک ژێ دیار دبیت، ل خۆ تێکددەت و روولیێ خۆ زێدەتر نەشرین و کرێت دکەت، د نها دا زێدەتر وەکی دەستهەلاتەکا توتالیتاری دهێتە دیتن، ئەگەر لسەر ڤی رتمی بەردەوام بیت، دبیت د داهاتی دا باجێ بدەت و دێ گەلەک لسەر یا گران بیت.