جیهانیرۆژه‌ڤكوردستانینێرین

عێراقیێن عیار ٢٤ دلنەوازیا کازمی دکەن ….

محەمەد چەلکی

     نیشتیمان پەروەری نە ب بلندکرنا درویشمێن قەبە و مەزنن و هەر جارا بیڤا خوە ببینن و بزانن کەس نابێژیتێ پشتا چاڤێن هەوە برو هەنە، درویشمێن وەڵاتپەروەری و ئاڵایێ کوردستانێ دبنە بەر عەرشێ عەزیم و ئێدی عێراقێ بفلسەکی ناکڕن، لێ گاڤا تەنگ لێ هاتنە شدداندن و بەرژەوەندێن وان یێن کەسۆکی کەفتنە د تەنگاسیێ دا، دێ بینی پێکڤە ب ئێک ئاواز دبنە عێراقیێن عیار ٢٤ . ڕاستی فهێتیە و شەرم مرۆڤی دگریت هەکو ڤان کەسان ب پەرسێن کورد ببینیت. ئێک ژ ئەگەرێن نەگەهەشتنا مە بۆ دەولەتبوونێ و ڤەقەتینا بەندکێ مە و ڤێ دەولەتا دویری خوەستەکا تەڤ پێکهاتەیێن وێ (١٩٢١) و بێی دارشتنا دستوورەکی کو کۆدەنگیا تەڤ پێکهاتەیان ل سەر بیت، ئەوە کو هێشتا سیاسەتمەدارێن مە و ژبلی جاش و خۆفرۆشێن کورد د هەموو گەهێن بزاڤا کوردی دا خوە ب عێراقی دزانن د تەنگاسیان دا ب عەیار ٢٤ خوە ددەن دیارکرن و هەلویستێن عێراقیبوونێ دفرۆشنە عەرەبێن عێراقێ.

     ل چ وەڵاتێن هاتینە داگیرکرن ئەڤێ یەکێ تو نابینی بەلکو د تەناگسی و بەرفرهەریان دا بئێک ریتم دئاخڤن و هەلویستێن خوە ل سەر ددەن دیارکرن ئەو ژی خوە ب پشکەک ژ وێ دەولەتێ نزانن ئانکو قەت خوە ب وەڵاتیێن داگیرکاری نزانن.

     ئەڤرۆ بەرێ سپێدێ(٧-١١-٢٠٢١) سەرۆک وەزیرێ عێراقێ کازمی ژ بزاڤەکا تیرۆکرنێ رزگار بوو، هەرچەندە هێشتا بکەرێن ڤێ بزاڤا تیرۆکرنێ نەهاتنە دەستنیشانکرن، لێ هەموو سەرتیر و شوین دەوس بۆ باسکێ شیعەیێن سەر ب ئیرانێڤە دچن. ئەڤێن ئەڤ هەولە کرین هەر ئەون یێن خیڤەت ل دوور دەڤەرا کەسک(منطقة الخضراء) ڤەداین و ب ئەنجامێن هەلبژارتنان نەدرازی. بەلێ بکەر یێ دیارە لێ بۆچی هەتا نوکە نەهاتیە ڕاگەهاندن، ئەگەرێن وێ ئەوە دا باسکێ ئیرانێ پتر نەئارینن و شەرێ تائیفیێ ناڤ مالا شیعە – شیعە نەچیتە قۆناغا هەڤ کوشتنێ و هەودانێ.

     ب ڤێ کریارا بزاڤا تیرۆکرکرنا کازمی و توندوتیژیا خوەنیشاندەرێن باسکێ ئیرانێ(حشدا شەعبی) ل دژی هێزێن ئەولەکاریێ و هەروەسا بەرسڤا هێزێن ئەولەکاریێ دەستپێکا دەستپێکرنا شەرێ ناڤخوەیێ مالا شیعە-شیعە یە. ل سەر ڤێ بزاڤا تیرۆری پرانیا لایەنێن سیاسی یێن عیراقی ئەڤ کریارە شەرمەزارکرن و هەتا باسکێ ئیرانێ ژی لێ ب ئاوایەک شەرمۆکی کو ژ ڕاگەهاندنێن وان دیار دبیت کو دەستێ وان ل پشت ڤێ کریارێیە.

     نورمالە ئەڤ کریارە بهێتە شەرمەزارکرن ژ هەر ئالیەکیڤە، لێ رۆندک باراندن بۆ پرسێن سەرەوریا عێراقێ و ئێکپارچەیا عیراقێ ژ لایێ گەلەک بەرپرسێن کوردڤە نەجهێ دلخوەشیێیە بەلکو فەرە ئەڤ بەرپرسە هەر زووی ژ ڤان رەنگە داخوینانیان ب ئاڤا کانیا سپی ل لالەشا نورانی خوە تافیل بکەن، چونکو وەڵاتێ مە یێ داگیرکرییە و ئەم پشکەک نینین ژعیراقێ، بەروپشت سەروەریا عێراقێ هەر ژ رۆژا بنپێکرنا مافێن هەژیێن تەڤایا پێکهاتەیێن وێ و ب تایبەت یێن کوردان دەستپێکریە. ئەز تێناگەهم ئەڤە چ سەروەریا یا سیاسیێن مە رۆندکا بۆ دبارینن کو عێراق و هەرێما کوردستانێ ژی رۆژانە ژ لایێ هێزێن ئیران و دەولەتا تورک سنوور و سەرەوریا وێ دهێنە بەزاندن تورکیا ب هندێ ژی راناوەستیت و هێزێن ئوپۆزسیۆنا کوردێن باکور ل هەرێمێ دکەتە ئامانج و تیرۆر دکەت. دار ل چیایێن کوردستانێ نەهێلان هەموو بڕین لێ سیاسەتمەدار و بەرپرسێن ڤێ عیراقێ و هەرێمێ ئەڤێ چەندێ ب سەرەوری نزانن تەنێ بزاڤەکا تیرۆرکرنا بەرپرسەکی ب بەزاندنا سەروەریا عێراقێ دزانن!

     دلنەوازیا بەرپرسێن هەرێمێ بۆ بزاڤا تیرۆکرنا کازمی و رۆندک باراندن بۆ سەوەریا عیراقێ ژ کوردێن وەڵات داگیرکری ژ لایێ عێراقێڤە و هەتا ئەڤرۆ دەست ژ هەوێن ب عەرەبکرنا کوردستانێ بەرنەداین و دژی هەر بزاڤەکا سەربەخۆبوونێ بۆ کوردا دکەن ل ناڤ ناڤگینێن جیهانی. ئەرێ ما ژ ڤێ فهێتیتر هەیە! نیشتیمانپەروەری و کوردستانیبوون نە ئەوە تو خوە ب عێرقی، ئیرانی، سوری و تورکیایی بزانی بەلکو کوردبوون تەنێ دکوردستانینە و ژبلی وێ یا دی چ جوداهی د نابەینا جاشبوون و تورکایی، سوری، و ئیرانی و عێراقیبوونێ دا نینە.

٧-١١-٢٠٢١

دهۆک

پتر به‌رچاڤ بكه‌
ڤێژی ب بینه‌
Close
Back to top button

ئه‌ڤ مالپه‌ره‌ cookies بكارتینه‌ . ژ بو به‌رده‌وام بونا ب كارئینانا ڤى مالپه‌ری . پێویسته‌ تو بكارئینانا مه‌ بو cookies ب په‌ژرینی 

Close