محەمەد چەلکی
ترحێووووو ….. ما هەوە چ بۆ کەرکووکێ کرە هەتا ناڤێ غەدرێ ژ دەڤێ نا موبارەکێ هەوە بدەرکەڤیت!
رەوەند مەلا مەحمود بەرپرسێ مەلبەندێ ئێکەتیێ ل کەرکووکێ بۆ دەنگێ ئەمریکا گۆت: غەدرەکا مەزنە پۆستێ پاریزگەها کەرکووکێ نەدنە ئێکەتیێ، هەلبەت ئەگەر گۆتبایە بۆ کوردان دا داخویانیەکا دروست بیت و مادەم مە وەک کورد شیانێن پاراستنا خاکا کوردستانێ نینن، هیچ شەرمەک تێدا نینە هەوارا خوە بگەهینە ناڤگینێن ناڤ نەتەوی هەروەسا کارەک ڕەوایە چونکو هەموو دوکۆمێنتێن دیرۆکی تەکەزیێ ل کوردستانیا پارێزگەها کەرکووکێ دکەن.
کێشا کەرکووکێ و هەروەسا کێشین حوکمەتا هەرێما کوردستانێ دگەل بەغدا هەموو د قانوونینە، ب رێکا کۆمەکا پارێزەرێن زیرەک دکارن بێی دەستتێوەردانێن حزبا و هەژموونا وان ئەڤی کاری ئەنجام بدەن، لێ بۆ وەناکەن، ئەڤە ڤەدگەریتە بۆ پرسا کی موختارە و برا گەوەرەیە! ئەگەر نە دەستەکەکا پارێزەرێن زیرەک دکارن گشت ڤان کێشێن مە دگەل حوکمەتا بەغدا چارەسەرێ بۆ ببینن و ئەگەر برێڤە نەچوو دادگەها ناڤدەولەتی ل دەنهاگێ(لاهای) هیڤیا دکەت.
مخابن کو سەرکرداتیا کوردی هند بیر ل بەرژەوەندێن خوە یێن سیاسی و ئابووری و پێگەهێن حزبی دکەتن نیڤەکا وێ بیر ل ڤەدیتنا چارەسەریێن قانوونی برێکێن ئاشتیانە دگەل بەغدا ناکەن.
پشتی کەتنا رژێما دکتاتۆریا سەددامی و حزبا بەعس ل ٢٠٠٣ێ و هێرڤە شەرەنیخا حزبێن کوردیە کانێ کی دێ پتر ببیتە عێراقیێن عیار ٢٤ و وەرگرتنا پۆستان ل بەغدا و پرسا ماددێ ١٤٠ و ب تایبەت یا کەرکووکێ چونکو کەرکووک نە ژبەر پەترول و غازێ بۆ کوردستانێ یا گرنگە بەلکو چونکو عەردێ کوردانە و داگێران ژێ نیشانا بێ کێرییا کوردانە کو ب ساناهی دەستان ژ ئاخا خوە بەرددەن، هەرچەند بۆ کەرکووکێ درویشمێن قەبە هەنە ل سەر عەردی چ دیار نینە بەلکو گەلەک لایەنێن کوردی دئامادەنە دگەل شۆڤینیترین حزبێن تورکمان و عەرەبان رێک بکەڤن لێ بۆ حزبەکا کوردی نە دئامادەنە هندی سەرێ دەرزیکەکێ داگێرانێ بکەن! هەلبەت ئەڤ رێکەفتنێن هە دگەل عەرەب و تورکمانا ل سەر هەژموونا کوردان و پێگەهێن کوردان دهێتە هەژمارتن، کار گەهەشتیە وێ ئێکێ ئێدی نە تورکمان و نە ژی عەرەب قەبویل ناکەن پارێزگەرێ کەرکووکێ کورد بیت!
د ٣٠ سالیا حوکمڕانیا کوردی دا چ پێنگاڤێن شایستە نەهاتنە هاڤێتن بۆ ئاڤەدانکرن و پێشخستنا بن خانێن ئابووری و مرۆڤی زێدەباری داگێرانێن ڤێ حوکمەتا هێشتا بێی هاریکاریا هێزێن هەڤپەیمانیا نێڤ دەولەت ل دژی داعش و قانوونیا بریارا ٦٨٨ یا نەتەوێن ئێکگرتی( UN ) کو سنوورێن کوردستانا ل سەر هێلا ٣٦ دپارێزن، ئەگەر ئەڤە نەبن حوکمەتا هەرێما کوردستانێ وەک دیوارێ ل سەر بەفرێ ب نەرمە هێرشەکا لەشکەرێ عێراقێ جارەکا ئەڤ دفن بلندێن دەنگێ بۆریزانێن وان و مێرخاسیا وان دگەهیتە بەر عەرشێ عەزیم کونە مشک دێ لێ بنە قەیسەری، ئەگەر هەبن باوەر نەکەن فەرموون ل هێرشا تەلەرویتێن داعشێ بۆ سەر شناگال و سنوورێن هەولێرێ مێزە بکەن کانێ پلا بەرخوەدانا ڤێ هێزا ب ملیارا دولار لێ دهێنە مەزاختن ل کیش ئاستی بوو. کار گەهەشتبوو وێ ڕادێ زارۆکێن دهۆکێ بەرسڤا هۆزانڤان قادر قەچاخی دابوون و دگۆتێ: ئەگەر نەهاتبا فرفرۆکێ … تو نەدمایە ل دهۆکێ! بەلێ ڕاستی ئەڤەیە ئانکو مە شیانێن پارستنا خاکا کوردستانێ نینن و ڤێ ئێکێ ب شەرم ژی نزانم بەلکو شیانێن مە دهندن و بەرهەمێ نەرێکخستیا ناڤلا کوردی و کۆدەنگیا کوردانە بۆ پرسێن نەتەوی.
رۆندک باراندنا بەرپرسێ مەلبەندێ ئێکەتیێ هەوارا دویف گورگییە و ب دوو عانێن قەلپ ناهێتە کرین چونکو د ڤان دەمێن بووری دا نە ئێکەتیێ و نە ژی چ حزبێن کوردی بۆ پرسا کەرکووکێ و تەڤایا ئاخا کوردستانێ و ب تایبەت ماددێ ١٤٠ لەشکەرەکێ تایبەت یێ نیشتیمانی یێ دویری هەژموونا حزبان ئاڤا نەکریە، د چ گەهێن دەمێ بووری دا مل ملانا حزبی ژ بەر خاترا پرسێن نەتەوی کێم نەکرییە بەلکو کار گەهەشتیە ئێدی چ حزبێن کوردستانی دویری کێشمە کێشێن ناڤخویی نەماینە چونکو ل ڤێرە پرس بوویە چەوانیا خرڤەکرنا پارەی و پۆستێن بلند ئەڤجا ل ناڤ حوکمەتا عێراقێ بن یان یێن هەرێمێ بن.
ماف چ جارا ناهێنە پێشکێش کرن بەلکو دهێنە ستاندن ئەڤجا برێکا توندوتیژیێ بیت یان ب رێکێن قانوونی و دانوستاندنێ بی، هندی دەلیڤێ ئاشتیێ هەبیت، نابیت مرۆڤ رێکا بکار ئینانا چەکی بگریت و ئەڤرۆ ل عێراقێ مە دەلیڤێ رێکا ئاشتیێ هەیە، ل سەر حوکمەتا هەرێما کوردستانێ فەرە ئەڤێ رێکێ بهەلبژێریت، بێی بکارئینانا دەتسەواژێن خیانەت و نەتەوپەرەستیێ. ئەڤجا رۆندک باراندن یا ژ خوەیە و رێکا ڕاست یا دیارە وهەوجەناکەت کورد ل پەی دەوسێ بکەڤن رێ چونکو بهندێ نە کەرکووک بەلکو تەڤایا خاکا کوردستانێ یا ب ناڤێ ماددێ ١٤٠ هاتیە ناڤکرن، دێ ژ دەستێ کوردان چیت. رۆندک باراندن نیشانا چ ژێ نەهاتنێیە، لێ کوردان چەندین ئالاڤ ددەستاندایە کو بشێن خاکا خوە بپارێزن، پرسیار ئەوە د شیانێن ڤێ سەرکرداتیا هەیە یا هەتا حەفکێ د داگێرانێ بۆ داگیرکەرێن کوردستانێ دا نقووم بووی، زێدەباری گەندەلی و خۆخۆریا ناڤ خوە، ئەڤی ئەرکی ئەنجام بدەت؟!
١٤-١١-٢٠٢١
