رۆژه‌ڤكوردستانینێرین

ژەهرا مەژی دەرکەفت سەختەیە

شەبان مزوری

هەولدانا ژناڤبرنا جەستەیێ یا هەڤرکێ خوە نە تشتەک تازەیە بەلکو بدرێژیا مێژویێ هەبویە و بباوەریا من دێ بەردەوامبیت. بو گەلەک خەلکی دبیت جهێ سەرسورمانێ بیت ئەڤا ئەڤە هەیامەکە بویە رۆژەڤ لناڤ سەرکردایەتیا یەنەکێ دا، ئانکو تاوانبارکرنا چەند کەسا بهەولا کوشتنا چەند سەرکردێن یەنەکێ برێکا ژەهردانێ.

ژەهر ژ بەریا ١٣٠٠٠ سالا هاتیە بکارئینان ژبو ژناڤبرنا بەشەک گیانەوەرا. سوقرات بژەهر دانێ کوشتن. د مێژویا مروڤاتیێ دا زۆر کەسا دوژمنێن خوە، رکابەرێن خوە بئارمانجا ژناڤبرنا جەستەیی ژەهرداینە. ئەستەمە ئولەک یان دەرستهەلاتەک ژڤی کارێ چەپەل بێپار بیت هەیا رۆژا ئەڤرو.

 چیروکێن هەولدان یانژی ژەهرکرنا هندەک کەسا لناڤ یەنەکێ بەردەوام گوتن لسەر هاتینە کرن بدەمەک کورت پشتی یەنەکە هاتی راگەهاندن. لێ سەرەرای ڤێ هەمی پرۆپاگەندا ژەهرکرنێ و هەولدانا ژەهر کرنێ، ئەوا ئەز بزانم یەک سەرکردێ یەنەکێ بژەهرێ نە مریە، هەرچەندە دلێ گەلەک ژوان دخوازیت مرنا هەڤالێ خوە ببینیت.

سیاسەت بخوە کارەک چەپەلە و چەپلتر دبیت دەما مروڤێن هیچوپیچ سەرکێشیا وێ بکەن، مە بهەزاران نمونە هەنە کانێ چەوا دز و جەردە کەفتینە گیانێ یەکودو لسەر دابەشکرنا دزی و تالانیێن خوە، ئەڤا لناڤا یەنەکێ دبینم هەمان دیمەنە. کەسەک بهێز دناڤا یەنەکێ دا نەمایە ژبو هندەک کەس ملکەچێ وی بن وەک سەردەما جەلال تالەبانی.

یا بالکێش ئەوە کو ژەهرا مەژی یا سەختەیە، چونکە نەکەس پێ دمریت، نە کێمئەندام دبیت و نەژی هەما ژبو دلێ خەلکی رۆژەکێ دکەڤیت ناڤا نڤینا. پشتی ژەهرا یەکێتی ئەتا سەراوی گوتی پەدەکێ ئەز ژەهر دایمە و گوت من بەلگە هەنە، لێ بوچی هەیا ئەڤرۆ نەدگوت؟ مە لسەر ژەهردانا زۆر کەسا خواندیە یان ژی بهیستیە و پرانیا ژێدەرا نیشان ددەن کو مروڤێ ژەهردای ژ چەند سەکوندا تا چەند رۆژا زۆرتر ئەستەمە بژیت، لێ پێچەوانە ژەهردایێن کوردستانێ بهێزتر دبن و گەشتر دبن. لێ لڤێرە هندەک باوەری بۆ مروڤی دبیت دیوروست ببیت، ئانکو ئەڤ مروڤە بخوە ژەهرن ما ژەهر دێ چکاری تێدا کەت.

زۆر کرێتە لسەدا بیست و یەکێ ل وەلاتێ مە ئەو کەسێن خوە بپێشەنگ و سەرکردە دبینن، دەست ببەن بو ڤان جورە کارێن شەرمزار ژبو لادانا هەڤرکەکێ خوە یانژی کەسەکێ لسەر خوە بترس ببینیت.

بکورتی و بکوردی: تو یێ بێ دوژمن خەونەکەی تو ناژی.

پتر به‌رچاڤ بكه‌
ڤێژی ب بینه‌
Close
Back to top button

ئه‌ڤ مالپه‌ره‌ cookies بكارتینه‌ . ژ بو به‌رده‌وام بونا ب كارئینانا ڤى مالپه‌ری . پێویسته‌ تو بكارئینانا مه‌ بو cookies ب په‌ژرینی 

Close