رۆژه‌ڤكوردستانی

کی بۆ لەیلایا کوردان بگریت؟!

جاسم محمد شرنەخى

پشتى هەلبژارتنێن 10-10-2021 یێن پەرلەمانێ عیراقێ ب داویهاتین من گۆتە هەڤالەکێ خۆ: تە چ ل دەنگێ خۆ کر؟ وى کەنیەکا هیسترى کر و گۆتە من: باوەرکە من دلێ کەسێ نە هێلا، من مۆهر ل هەمى لایەن و بەربژێران کر، ئەڤە نموونەیەکە ژ هزاران کەسان د ناڤ وێ ڕێژەیا کێما هاوڵاتیێن کوردستانێ یێن هاتینە هەژمارتن بەشدارى د هەلبژارتناندا کرین کو تەنها 35.35% بوون، ڤێجا تو چ دبێژى ئەگەر ئەوێن کاغەزێن خۆ بەتال کرین بچنە ل گەل یێن ماینە ل مالێن خۆڤە دێ سەرجەمى نەرازی و بایکوتکەران چەند پلەیان د سەر70% بەرزبیت؟! لێ یا سەیر ئەڤا بوورى نە جهێ ڕاوەستانێ بت، خەما گەلەک ژ مەزنێن کوردا و هێزێن وان یێن سیاسى تشتەکێ دیتربت یێ پەیوەندى ب وانڤە هەى نەک ب مللەتیڤە، لەوا لایەنکێ مەزن ژبەرکو تەنها قەبارەکا دەنگدان ژ دەستدا، یان ژى ب کورسیەکێ یان دوو کورسیێن پەرلەمانى ل جهەکێ خوسارت بوو و هەر چەندە ل هەمان دەمدا سێ قاتى وان ل جهێن دیتر قازانج کر، لێ سەرەڕاى وێ چەندێ ئاگرەک گەفتە هناڤێن وى و گازى ژ سەرێ قۆبکۆژێن (هەرەمێن) حزبى بلندبوون: دڤێت پیداچوون و خۆداچوونەکا بلەز بهێتە کرن و ئەگەر بهێنە دیار کرن و چارەسەرى ژى بهێتە دەستنیشان کرن، و کێمترخەم ژى بهێنە بەرچاڤ کرن دا بگەهنە سزایێن خۆیێن هەژى، و حەقێن وان ب کەڤتە نیڤەکا لەپێن واندا، خۆ تو دێ بێژى قودسا کوردان یا دشەوتت! د بنیاتدا پێداچوون خۆبخۆ کریارەکا باش و گرنگە، ژ ئەنجامێ تێگەهشتنەکا قەنج و جورئەت و وێریەکا ئاستبەرزە ژبۆ ڕەخنەیەکا خۆیەتى و ڕاستڤەکرنێ یە، لێ یا زۆر نە سرۆشتى و گەلەک خراب ئەوە: د ڤان پێداچوونێن سیاسیێن حزبیدا ئاڕاستەیا خەمخۆارنێ نە بۆ جهێ گرنگ و هەژیە ئانکو نە بۆ گەل و وەڵاتیە، بەلکى جوامێرێن بریارا پێداچوونێ دکن یێن گریێ خۆ دکن، ئەرێ گەلۆ چ ل دونیایێ هاتیە بۆچ زەلامێن مە – وەکى ئەو دبێژن –کونترۆلا بەڵاڤکرن و ئاڕاستەکرنا دەنگدەران نە کر، واتە ئەگەر ئەم ب دروستى بێژین: چما و چەوان جەماوەرى بچەکێ پشتا خۆ ژ بن ڕکێفێن قرالى و فیرعەونیا وان ل سەر سەرێ خەلکێ دکر ئینانە دەرێ؟! ئەرێ والله نەکو پێداچوون قەت ژ گازیێن مخابنێینە، ئەرێ بۆچى جەماوەرى یانژى بەهرەکا هەرە مەزن ژ جەماوەرى هەلویستەکێ دژوارێ نەڕازیێ ل هەلبژارتناندا ژبۆ هەر کەسێ ئەقل و ژدان هەى، بۆ خویانیا و بیانیا ل ناڤخۆ و ل دەرڤەى کوردستانێ پێشچاڤ کر، دەمێ ل رۆژا دەنگدانێ خۆفەشارتنەکا ب سەهم کرى، دەمێ ڕێژەیەکا زۆر زۆر مەزن ژ جەماوەرى گۆتیە هەمی هێزێن سیاسى هەر باخڤن و قێرقێرێ بکن، هەر بەندێن رۆستەمێ زال و فێلوشاهى بۆ مە بێژن: هوین یێن دئاخڤن بلا، لێ ئەم ژى هەر گاورن ب سیاسەت و هزر و گۆتنێن وە، مللەتى نەڕازى ب ڕاشکاوى گۆتە سیاسیان: ئەم هەتا گاورن ب پڕۆسیسا دەنگدانێ ژى، هوین هەر ل دەزگەهێن ڕاگەهاندنێ حزبى یێن سیبەر بکنە فیغان و هەوار، دیسان ل مینبەران ژى بلا هەر مەلا بکنە قێرى دا ئەم باوەرى و ئیمانێ ب گرنگیا دەنگدانێ موکم بکین، لێ ئەم – جەماوەر – ل ڕۆژا دەنگدانێ هەر دێ گاوریا خۆ ب وە دەرهاڤێژەیێن وە و سیاسەتا وە ئاشکەرا کین. هۆسان ب هەلویستەکێ نە چاڤەڕێکرى و نە خوازیار ل دەڤ هندەک لایەنێن سیاسى یێن د ئێشا نێرگزیا عشقا بەژنێن خۆدا و بەرژەوەندیێن خۆ و مالباتێن خۆدا، د خۆپەرێسیا خۆدا سەرخۆش بووین وهاى ژ نالینێن خەلکێ نەمایین، مللەتى ژى – یان ژى بەهرا زۆرا مللەتى – گۆتنا خۆ گەهاندنا هەمى خودان گوهان و هەتا گەهاندە گوهدرێژان ژى، ل هەمى عیراقێ و ل گۆردستانێ ژى گۆتنا نەخێر بۆ دەنگدانێ ل هەر چار کناران و هەتا دگەهیتە بەرپەرێن ئەسمانا ژى دەنگڤەدا، ئەرێ گەلۆ ل دەمێ ل کوردستانا مە پەیاما خەلکێ ئەڤە بت نێزیکێ 70% بایکوتا دەنگدانێ بکن ژ سەرجەمێ 3.486.787 سێ ملیون و چار سەد هەشتى و شەش هزار و حەفت سەد و هەشتى و حەفتان یێن مافێن دەنگدانێ هەیین تەنها 1.232.897 ملیونەک و دوو سەد و سیهـ و دوو هزار و هەشت سەد و نۆت و حەفت کەس بەرەڤ سندۆقان بچن، یێن چوویین ژى ژمارەکا باش ل وێرێ دلێن خۆ هین کرین دەهـ موهر ل کاغەزێن خۆ دایین وەکو دەربڕین ژ کەرب و کینا نەڕازیێ بەرامبەر هێزێن سیاسى و نەخاسمە هەمبەر دەستهەڵاتداران ئەرێ ما بۆ کەسێن بچەک عەقل و ڕەوشتێ سیاسى هەیین ئەو چەندە نە هێزترین پەیامە؟! ئەگەر ل دهۆکا سوسیلوژیا وێ موحافزکار ڕێژەیا بەشداربوویان کێمتربت ژیا وى جەماوەرێ بەرفرەهێ هەلویستێ نیگەتیڤ هەلبژارتی کو نێزیکى 52% یە، چونکى ژ 822.703 هەشت سەد و بیست و دوو هزار و حەفت سەد و سێ کەسان یێن ماف هەین دەنگى بدن بەس 444.235 چار سەد و چل چار هزار و دوو سەد و سیهـ و پێنج کەس دەنگدان، گەلەک ژ خەلکێ خۆ نە چوو بن بنگەهێن کومسیۆنێ بۆ وەرگرتنا کارتێن خۆ ، ما ئەڤە ژى نە هەوارەکا هەژى گرنگیدان و خەمخوارنێیە گۆهدارى بۆ بهێتە کرن. کەنگى هوین سیاسیێن ڤى وەڵاتی دێ لەیلایێن خۆ بچەکێ هێلن بتنێ و بەرێ خۆ دەنە مللەتى، گۆهێن خۆ دەنە وى گریێ تراژیدى یێ مللەت بۆ لەیلایا خۆ دکت مینا هۆزانڤانەک دبێژت: “کلّ ببكي على ليلاه وشيطانه يطبطبه”، هەر ئێک یێ بۆ لەیلوکا خۆ ڤەدلوورينت ودگریت و ئیبلیسەک تەپا ل پشتا وی ددت بێژتێ خەما نە خۆ، نەکو مەجنون لەلیلا بتنێ گریێ دلدار و مەعشۆقا خو دکت، کى دێ دەمەکێ ڕاوەستت و ب خاتینا مللەتى ژى بێژیت، ئەوا گەندەلى و دزى و بێ بەهری و شکەستنا سیاسى و پێلێنانا وژدانێ و ژێرپێکرنا مافێن تایبەت و یێن گشتى، ودیسان ژبەر بێخەمیا ل بلندترین ئاست ژبۆ دابینکرنا ژیانەکا هەڤکویفى سامان و داهاتێ زەبەلاحێ داعویرای، ئەڤ خاتینە کەفتیە دەراڤێ مرنێ، و داراستنا بیلاروسیا یا زەمھەریر ل سەرێ زڤستانێ بوویە مەخەلگەھ بو گەنجێن وەڵاتێ مە دا ژ ژەھرە زیندانا زولما سیاسی قورتاڵ ببن، ئەھا ئەوە بوویە پاڵدەرێ بایکۆتا زۆرینەیا مللەتى، ڤێجا گەلۆ کەنگى و کى دێ بۆ ڤێ چەندێ پیداچوونێ کت؟! ئەز بباوەرم ڤێ پێلا بهێزا نەڕازیبوونێ وانەیەک باش نیشا لایەنێن زلهێز نەدا، چونکى وەکى مە و گەلەک چاڤدێرێن سیاسی ل دەستپێکێ دکرنە ھەوار: د کاودانێت یاسایی و سیاسیێت عیراقێ و کوردستانێدا – بێ گومان- بایکۆتا ھەبژارتنا دێ قازانجى گەهینتە وان یێن بووینە ئەگەرێن نە هامەتیێ، دێ کورسیێن وان زێدە بدن، لەوا دڤیا گازى ب وى زمانى با یێ ئەو تێ دگەهن، واتە پێ پێگەیا وان د قازانجا کورسیان شکەستنەک مەزن ڤێ کەفتبا.

پتر به‌رچاڤ بكه‌
ڤێژی ب بینه‌
Close
Back to top button

ئه‌ڤ مالپه‌ره‌ cookies بكارتینه‌ . ژ بو به‌رده‌وام بونا ب كارئینانا ڤى مالپه‌ری . پێویسته‌ تو بكارئینانا مه‌ بو cookies ب په‌ژرینی 

Close