شەبان مزوری
ڤێ هاڤینێ دەما ئەز لباشورێ کوردستانێ بوم، لگەل چەند ناس و دوستا ئێڤارەکێ مە شەڤبێریا خوە پێکڤە دکر، یەکی ژ ئامادەبویە گوت من
دوکتور گەلەک کورد لسوید هەنە؟
من گوت ، نەخێر نینن.
نەخێر کورد نینن، یان چی؟
من گوت بەلێ کورد نینن، بباوەریا من کورد لدەرڤەی کوردستانێ نینن.
گوت، ما تو نە کوردی؟
من گوت بەلێ ئەز نوکە لدەف تە کوردم، لێ لدەرڤە ئەز مزیری مە.
هەلبەت من نەڤێت پتر بچم ناڤ گەنگەشا مە، لێ من زۆر پێ خوەش بو ئەو پرس ژ من هاتی کرن چونکە بسالانە لدەرڤە دژیم لێ کورد من نە دیتینە. چونکە بمن واتا کورد بونێ جودایە ژپرانیا خەلکێ مە.
کوردبون بو من نەتشتەک وەک ئەم دبێژین بکوردی باخڤا، جلکێت کوردی لبەر خوەکە، خوارنا کوردی بخو، گوهداریا سترانا کوردی بکە….هتد. بو من کوردبون واتە تەنها ناسنامەیە دبیت ئەز لسەر تورە بم و شاد بم. چونکە مروڤ وەک لنڤیسینەک دیدا من نڤیسی دکارە زۆر ناسنامێن خوە بگهورە، بو نمونە ناڤ، پاشناڤ، هەرێم، وەلات، ئول، زمان ….. هتد، لێ گەل ژ تەمەنێ زارۆکی دەرباس بو نکارە نەتەوا خوە بگهورە، نەتەوە تەنها مورە هەیا رۆژا ئەڤرو بهیچ مەتریالەکی مروڤ نەشێث لسەر رویێ خوە راکەت.
مە کوردا ببوچونا من لوەلاتی نەتەوەبون وەک پێویست نە کریە ئارمانج ژ بو خوە. لەوما هەمان موزاییکا وەلاتی مە لگەل خوە ئینایە دیاسپورایێ. ئەم ناسناما ئیدولوژی وهەرێمی زال دکەین لسەر ناسناما خوەیا کوردی. من ببیرە دەما من لگەل چەند هەڤالا داخوازا پەنابەریێ کری لسوید، بەشەک ژوان ژ زاردەڤێ وان، پۆلیسی پرسەک دکر: تە لوەلاتێ خوە چکار دکر؟ یێ کومونیست دگوت ئەز کومونیست بوم، یێ پارتی دگوت، پاتی بوم، یەنەکێ دگوت یەنەکە بوم. هەلبەت چونکە ئەز ژ باشورم لەوما من باشور کرە نمونە، هەمان رەنگڤەدان لپارچێن دی ژی هەیە.
ذبیت بو گەلەکا جهێ سەرسورمانێ بیت کو ئەز بێژم کورد ل دیاسپورا نینن، لێ من دڤێت وەک هەرجارێ لگەل خوە بەری لگەلۆ کەسەک دی راستگوبم.
جهێ داخێ یە دەما ژ یەک پرسی تو کوردی؟ دبێژیت بەلێ ئەز سوسیالیستم، پەکەکە مە، پەدەکە مە، کومەلەمە، یەکگرتومە، پەسەکە مە، یانژی مزیریمە، بەرواری مە، دوسکی مە، پێجیناری مە، هەرکی مە، جافم، یانژی دێ بێژیت بەلێ و سوپاس بو خودێ موسلمانم، نە کوردم ئێزدیمە، نە کوردم شەبەکم، ئەز شیعەمە، یارسانم، سیکولەرم، ئەز مروڤم نە نەتەوە پەرستم، بارزانی مە، ئاپوچی مە، جەلالی مە، مریدێ شێخێن بریفکا مە، دەروێشێ شێخ نەهروی مە…..هتد. باشە نەیا رەوایە گو بێژین کورد ل دیاسپورا نینن. هەمی تێکەلیێن وان کەسێن بکورد ناڤدکەین بموخابنیڤە لسەر ڤان بنگەهێن ناسنامێن ژوری تێن ئاڤاکرن.
بکورتی و بکوردی ژبو ئەز و تو و ئەم هەمی پێکڤە کوردبونا خوە بهێز بکین و ببین هێزەک کاریگەر لدەرڤە ژبو وەلاتێ خوە دڤێت تێکەلیێن خوە لسەر کوردبونا خوە دوروست بکەین، وەک من لسەری ئاماژە پێکری، مروڤ دکارە هەر ناسنامەکا خوەیا کەساتی بگهورە د دەرڤەی ناسناما نەتەوی.
