رۆژه‌ڤكوردستانی

ئەڤ وێنەیە مەسجەکا مەترسیدارە!

محەمەد چەلکی

     هێدی هێدی دەستهەڵاتدارێن کوردستانێ یێ بەرەف دەستهەڵاتداریا رۆژهەڵاتیڤە دچن، هەمی بەردەفک و نزا چ ئێدی شیانێن روی سپیکرنا ڤێ دەستهەڵاتێ نەماینە!

     ئەڤ سەردەمە نە سەردەمێ حزبا قائید و ئایدلۆژیا و نەتەوەپەرەستیێیە! تە چ بڤێت دێ ئەو بەڵاڤ بیت و هەموو رویدان و بزاڤێن جڤاکی و سیاسی ل دەرڤەی سهانەتا دەستهەڵاتێ نەهێلی بەڵاڤ ببت. مافخاز و بزاڤێن جڤاکی و سیاسیێن ئوپۆزسیۆن ب توومەتێن تێکدەر، ئاژاوەچی، دژ یاسا و سەروەریا وەڵاتی ل ناڤخوە و دەرڤە بکەیە تەشابەت و تێکدەر، نەخێر ئەڤ مودێلێ دەستهەڵاتێ ئێدی جهێ وێ ل سەر گویا زەمینێ نەمایە و ئەگەر بخازیت بمینیت دێ بناڤێن دکتاتۆر، ئەنتی دیمۆکراتی و مافێن مرۆڤی هێنە هەژمارتن و دێ کەڤنە بەر شویرێ عمابرگۆیا ناڤنەتەوی و دێ هێنە ناڤ زڕادن .

     هەتا ئها ڤێ ساتێ ژی دەستهەڵاتا کوردی ل سەر شۆپا دەستهەڵاتدارێن رۆژهەلاتی دچیت و مفا ژ ڤێ پێشکەفتن و بەلاڤەبوونا هشیارا مافێ کەسی و وەڵاتیبوونێ ب رەنگەک وەسا کو وەلاتی ب خوە بوویە چاڤدێرێ رەنگێ برێڤەبرنا دەستهەڵاتێ، نەدیتییە .

     سەردەرەیا دەستهەڵاتا کوردی بۆ پرسێن ئازادیا خرڤەبوون و خوەپیشاندان و بزاڤێن جڤاکێ سڤیل بۆ بدەستڤە ئینانا مافێن دابینکرنا مۆچە، دامەزراندن، باشترکرنا رەوشا خزمەتگوزاریان، کەرتێ ساخلەمیێ، پەروەردێ، یەکسانیا وەرگرتنا دەلیڤێن کاری و …. هتد گەلەکا نەشارستانییە و تومەتێن دەستهەڵات ددەتە بەر وەڵاتیان دویری هەموو رەوشتێن دیمۆکراتی و مرۆڤایەتیێنە.

     هێجەتێن دەستهەڵاتێ بۆ ب لابرنا خوەستەکێن هێزێن جڤاکێ سڤیل، مافخاز و قوتابیان بۆ پرسا توندتیژی، دەستێن دەرکە و وەرنەگرتنا دەستویریێ بۆ خوەنیشاندانێ کەسەکی قاییل ناکەت چونکو داخازکرنا مافان و خوەپیشاندان و خرڤەبوون مافەکە و پێدڤی چ دەستویریا نینە تەنێ دێ هێزێن ئەولەکاری و پۆلیس هێنە ئاگەهدارکرن و هەو.

     خالا دن یا هەری سەیر کو دەستهەڵات دبیتە لێبۆک ئەوە دبێژن:” مافێ هەرکەسییە خوەنیشاندانا بکەت.: ئێ باشە مادەم مافە بۆچی تو ناهێلی خرڤەببن و خوەنیشاندانێ بکەن؟ ئەگەر خرڤەبوون ژی هێزێن ئەولەکاری و پۆلیس ژ خوەنیشاندەران پترن!! ئەڤە چ دگەهینیت، هوین دێ کێ دسەردا بەن کو مافێن وەلاتیان د خوەنیشاندانێ دا دپاراستینە؟

     ئەگەر ل تەڤایا خوەنیشاندانێن ل هەرێما کوردستانێ رویداین مێزە بکەین(ژبلی یێن دەستهەڵات بخوە دکەتن) هەموو ڕاستی توندوتیژیێ هاتنە و ڕاپێچی زیندان و دادگەهێ کرنە!

     خوەنیشاندانێن ئەڤرۆ ل سلێمانیێ رویێ رەشێ دەستهەڵاتا کوردی نیشانی هەموو جیهانێ دا. ئەڤ قوتابیە(گەنجە خودانێ وێنەی) یێ داخازا مافێ خوە دکەتن، ئەرێ دێ چ پاساو هەبیت بۆ روی سپیکرنا ڤێ دەستهەڵاتێ؟ ئەڤ سەرەدەریا هشک دگەل خوەنیشاندەران بۆ ئاییندێ دەستهەڵاتا کوردی مەترسیدارە دێ بیتە دەستێکا جوودابوونا دەستهەڵاتێ و وەڵاتیان.

     ئەرێ ئەڤە نابیتە پاساو بۆ کۆچکرنا گەنجان بۆ ژ دەرڤە؟ ژ بلی ناڤ ڕزاندنا دەستهەڵاتا کوردی ل ناڤ ناڤگینێن جیهانێ ژ خوە هێش پرسا کۆچبەرێن ل بیلاروسیا ل مەدیا جیهانێ گەرمە و ئەڤ سەرەدەریا هشکا دویری رەوشتی دێ بیتە هاندەر کو ئەورۆپا ب زوترین دەم ل هاوارا وان کۆچبەران بچن و وەرگرتنا پەناهندێن کورد وەکو سالێن ١٩٨٠ێ یان ببیتە نمرە ئێک.

     دەستهەڵاتا کوردی یا ل سەر دوریانەکا مەترسیدار و ئەگەر ل پرس و مافێن وەلاتیان نەبیتە خودان و تەڤایا ئاریشێن ئەڤرۆ ل هەرێمێ هەین ب جدی ل سەر نە ڕاوەستیت و چارەسەر نەکەتن، هەر ل پاساوێن بێ ڕامان و چڤێل بگەرهەیت و باوەریێ ب وان پاساوان بینیت، هەر هوسا ب هشکی سەرەدەریێ دگەل وەڵاتیێن داخازا مافێن خوە بکەت. وەک چەوان د هەلبژارتنێن عێراقێ دا وەڵاتیان حزبێن دەستهەڵاتدار ب دەنگێن خوە سزادان، د هەلبژارتنێن کوردستانێ دا کەس ژ وان بڕاوە نابیت چونکو هەلبژارتنێن عێراقێ تەکان، وورە و هێز دا وەڵاتیان کو دەنگێ وی دکاریت تەرازویا دەستهەڵاتێ بگوهۆڕیت.

     فەرە دەستهەڵاتدارێن کوردستانێ ل خوە بزڤڕن و ل خوەستەکێن وەڵاتیان ببیتە خودان و ب نەرمی سەرەدەریێ دگەل خوەنیشاندەران بکەت. وەڵاتی دکارن هەموو دەستهەڵاتداران بگوهۆڕن چونکو هێزا هەری بهێزە. خوەنیشاندەر نە تێکدەرن و نە ژی دەستەک بیانی ل پشتە بەلکو تەنێ خوەستەک و داخازێن وان هاندەرن، هەردەما ژیانەکا شایستە و ئارام بۆ وەڵاتیان بەردەست بوو ئێدی هەوجەی چ خوەنیشادان و چوونا سەر جاددان نابیت.

٢٢-١١-٢٠٢١

پتر به‌رچاڤ بكه‌
ڤێژی ب بینه‌
Close
Back to top button

ئه‌ڤ مالپه‌ره‌ cookies بكارتینه‌ . ژ بو به‌رده‌وام بونا ب كارئینانا ڤى مالپه‌ری . پێویسته‌ تو بكارئینانا مه‌ بو cookies ب په‌ژرینی 

Close