رۆژه‌ڤكوردستانی

هەرن مریشکا خوە پەیداکەن؟

شەبان مزوری

باوەر دکەم پرانیا مە خەلکێ کوردستانێ و بتایبەتی خەلکێ دەڤەرا بادینان سەرهاتیا بابێ و کورا دزانیت، دەما مریشکا وان هاتیە دزین و لێ نە گەریاین، پشتی وی هەر تشتێ هاتبا دزین دا بابێ وان بێژتێ کورێ من هەرن مریشکا خوە پەیدا کەن. تا هەسپێ مالێ هاتی دزین بابێ هەر دگوت هەرن مریشکا خوە پەیدا کەن، زاروکێن وی گوتن بابێ مەیێ شێت بوی، هەر تشتێ وندا بو دێ بێژیت هەرن مریشکا خوە پەیدا کەن. بابێ گوت کورێن من ئەز شێت نینم لێ ئەگەر روژا مریشکا وە ڤەنەگریای مال وە خوە لێکربا خودان کەسێ دخوەرا نە ددیت تشتەک وەیێ دیژی ببەت؟

بابەتێ من گرێدای ڤێ سەرهاتیا سەری یە و شەق و پێنێن دەستهەلاتێ لسەر خەلکیە. دەما خەلکێ مەیێ ئاسایی ڤێ دەستهەلاتێ ددا بەر شەق و پێنا ( ئاسایی مەبەستا من چینا کارکەر، خوەدان دەرامەت کێم، جوتیار ) خەلکێ دی یێ خوە ب رێبەرێن ئولی، کومەلاتی، رەوشەنبیری، هەرێمی، ئەکادیمی….هتد، بێ دەنگی و بێ هەلویستی هەلبژارت و هیچ کارڤەدان نەبون، سەرئەنجام هەمیا شەق و پێن خوارن.

بمن تەڤایا رەوشا گەلێ کورد لهەر چوار پارچێن کوردستانێ ڤەرێژا هەمان هوشمەنبدیێ یە یاکو بسەدان سالا دناخێ تاکێ کوردا چاندی کو بباوەریا من تێکەل بویە لگەل گێنێن بیولوجیێن کوردا. ئەز دێ لسەر چەند گوتنەکا راوەستێم لناڤ جڤاکا مە کو بمن ئەگەرێن سەرەکیێن کولاتی و ملخویلیا مەنە.

زۆر مە بهیستی یە کو دەما ئاریشەکا زیان بەخش لناڤ جڤاکێ سەرهەلددەت، ژبو رێگرتن بێتە کرن خەلکێ کو دڤێت کارڤەدان هەبیت، دێ بێژن ( دونیا رەڤ و رویە هەرکەسێ شولەب خوەیە ). لڤێرە مەبەست ئەوە تاکی ژ بەرپرسیارەتیا گشتی ڤەبرن و تەنیا هزر د خوەدا بکەت. بو تاکی گرنگ نەبیت کانێ لدورا وی چ دقەومیت و بڤی شێوەی پەرت و بەلاڤکەن، تاک تاک یا بڤێت دەستهەلاتداری لگەل وان بکەت.

نمونا دویەمین ( کێ دەیکا مە مارکر ئەو بابێ مەیە ) لڤێرە خوەدانێن ڤێ پەیامێ دخوازن هەمی هەستا بەرخوەدانێ لناخێ تاکەکەسیدا بکوژن و بێژنێ نە گرنگە کی دەستهەلات دارە، یا گرن ئەوە تو ملکەچێ دەستهەلاتداری بی. هزر دگوهارتنێ دا نەکەی، هەر دەستهەلاتدارێ هەی نوینەرێ خودێ یە، تو فەلەبی، ئیسایە، تو موسلمان بی اللە، تو ئێزدی بی تەوسی مەلەکە، لەوما نابیت ژ فەرمانا وی دەرکەڤی. سەرئەنجام لشوینا کولێت خودێ بون، بونە کولێت دەستهەلاداری ژی.

یا سێیەمین ( دونیا هەمی کی… بیت بوهوستەک ژ من دویر بیت ) ئانکو هزرا خوە دخوەدا بکە، گرنگ نینە کێ چبسەری بێت، کی هات کوشتن، بەرزەکرن، تالان کرن، کرێت کرن، یا گرنگ ئەوە مادەم نە گەهشتی یە تە، کارڤەدانێ لسەر نەکەی. لڤێرە دڤێت مروڤ هزرا خوە بکەت گەر تو وەک تاکە کەس دور بگەهیتە تە ما و دێ شێی خوە بپارێزی؟ لڤێرە دەما ئاگر بوهوستەک ژ تە دویر بیت بزانە توژی دێ بوی ئاگری هێی ساوتن. دەستهەلات دارێ ستەمکار بڤی شێوەی دخوازیت تو کورە، لال و کەر بی ژبو بشێت بئاسانی ژەهرا خوە دلوپ دلوپ و برەزامەندیا تە بەردەت ناڤ دەڤێ تە.

ئەڤا ئەم بدرێژیا مێژویا خوە دبینین ژ کرێتکرن، هەتکرن، شکاندن، رەزیل کرن، چەوساندن، تالانکرن….هتد ژ کارو رەفتارێن بێ رەوشتی چ ژ دەستێ داگیرکەرا و چ ژ دەستێ دەستهەلاتدارێن خومالی سەرئەنجاما هوشمەندیا لسەری من نڤیسی.

بابەت باشورێ کوردستانێ یە، شەق و پێن لێدانا خەلکی یە کو دویرە ژ یاسایێن دەستهەلاداران بخوە نڤیسین. دەما شەق و پێن ب خەلکێ هەژار کەتین دڤێت ماموستا، کەساتیێن ئولی، نڤیسەر، دوکتور بێدەنگ و هەلویست نەبان. بێدەنگیا ماموستای واکر کو ماموستا ژی بکەڤیتە بەر شەق و پێنا، بێ دەنگیا کەساتیێن ئولی هەمبەر لێدانا ماموستای  و کەسێن ئاسایی واکر کو مەلا بکەڤیت بەر شەق و پێنا، بێدەنگیا نڤیسەری هەمبەر لێدانا کەسێن ئاسایی، ئولی و ماموستا واکر کو نڤیسەر ژی بکەڤیت بەر شەق و پێنا، بێدەنگیا دکتوری هەمبەر لێدانا کەسێ ئاسایی، ئولی، ماموستای و نڤیسەری واکر کو دوکتور ژی بکەڤیت بەر شەق و پێنا.

بکورتی و کوردی ئەگەر ئاگر بەربو مالێن دوروبەرا تە، تو دێ بکادیا وی ئاگری فەتسی.

پتر به‌رچاڤ بكه‌
Back to top button

ئه‌ڤ مالپه‌ره‌ cookies بكارتینه‌ . ژ بو به‌رده‌وام بونا ب كارئینانا ڤى مالپه‌ری . پێویسته‌ تو بكارئینانا مه‌ بو cookies ب په‌ژرینی 

Close