رۆژه‌ڤكوردستانی

بەردەوامیا هەرەس ئینانا پرۆژێن رەوشەنگەریێ

محەمەد چەلکی

ئەگەرێن هەرەس ئینانا هەموو بزاڤێن رەوشەنگەریێ ل جیهانا ئیسلامی و ل کوردستانێ ڤەدگەریت بۆ چەندین هۆ و ئەگەران، چەند خالێن هەین کو ئەگەرێن سەرکینە بۆ شکەستنا ڤی پرۆژێ گرنگ و پەیوەندی هەی ب ژیان و رومەتا مرۆڤیڤە، هەتا ئەڤ پرۆژە بسەر نەکەڤیت مەحالە ئەڤ رۆژهەڵاتە بۆ پێشڤە بچیت، دێ بەردەوام ل دور بازنەکا ڤالە زڤڕیت و ژ کارەساتەکێ بۆ کارەساتەکا جەرگ بڕتر چیت.

هندی بها و نرخێن مرۆڤی ل گۆر پیڤەرێن باوەرێن سەردەمێ چاخێن بەرێ و ب ژیانەکا ئاشۆپی(بەحەشت) بهێنە هەژمارتن هەلبەت کێشین جڤاکێ ئەڤرۆ ناهێنە چارەسەکرن و جڤاک بەڵاڤە دبیت ل سەر شەرەنیخا ڤەخاندنا وان تێکستێن(پیرۆز) کو ئەڤە ئێشەکا مەزنە بەرهنگاری ڤێ رۆژهەڵاتێ بووی هەر ل سەردەمێ ب خەلیفێن ڕاشدی دهێتە ناڤکرن هەتا ئەڤرۆ شەرێ ڤەخاندنا وان تێکستێن ب ناڤێ پیرۆز یێ بەردەوامە و هندی ئەڤ رەنگ هزرە یا بەڵاڤە بیت و خودان هێزا جڤاکی و ڕامانی بیت دێ ئەڤ شەرێ ژیان کوژ ل ناڤ جیهانا ئیسلامی و جڤاکێ کوردی ژی بەردەوام بیت .

ب پیرۆزی ڕاگرتنا وان تێکستێن ب ناڤ پیرۆز وەک ئێشەکا ستویرا هزرا ڤێ رۆژهەڵاتێ داگیرکریە و بوویە گڤاندێن پیرۆز و دەربازکرنا ڤێ گڤاندێ ب کارێن ژ ڕێ دەرکەفتی و دژی دین دهێتە هەژمارتن. ل ڤێرە بۆچوونێن گشت مللەتی(خەلکی) وەک هەڤە ئانکو ل ڤێرە جڤاک بوویە خوەدی هزرەکا ستویرا باوەریا ئاشۆپی. ستویریا ڤێ هزرا ئاشۆپی مافێن تاکی و خوەستەکێن وی بۆ ژیانەکا باشتر هێلایە بۆ پشتی مرنێ، ب ئەگەرا ڤێ باوەرێ مرۆڤێ رۆژهەڵاتی ژ کاس خستیە و بوویە مرۆڤەکێ سنگەپێ یێ نە پشکدار دبزاڤ و چالاکیێن جڤاکی دا ، مایە دویر پەرێز.

ئەگەر ل دیرۆکێ بنێڕین و لاپەرێن بزاڤێن هزری ڤەدەین دێ بینین تەڤ بزاڤ د کەسۆکی بوونە ژ بلی دوودلی ل سەر وان تێکستێن پیرۆز پەیدانەکریە و هەر ل دوور زڤڕینە و پرسا ماف و ئازادی و وەکهەڤیا مرۆڤان نە ئازراندنە دا وەک هێزەک داکۆکیکار ژ بەرژەوەندێن مرۆڤی و پاراستنا روومەتا وی ل ناڤ جڤاکێ دیار ببیت، دا هەژار و بەلەنگاز ل وێ هزرێ ببن خودان ئەڤە هۆکارێ هەرە سەرکییە کو بزاڤێن چاکسازیکرنا دینی ل ناڤ ئیسلامێ هەرەسێ بینیت. دبەرامبەردا ل ئەورۆپا بزاڤا رەوشەنگەریێ ب سەرکەفت چونکو رەوشەنگەرێن ئەورۆپی ژ دەرڤەی ڤەخاندنا تێکستێن پیرۆز کار ل سەر رەوشەنگەریێ و پرسا ئازادی و ماف و وەکەهەڤیێ ئینا رۆژەڤێ و ب درێژیا دەمی نابینی رەوشەنگەرەکی ئیشارەت دابیتە تێکستەکا پیرۆز ئانکو خوە داقۆتا بوون(دابڕان بوو) ژ هزرێن ئاشۆپی و گیرۆکرنا ژیانەکا خۆشتر بۆ بەحەشتێ و ب وێ زۆرداری و مافخارنا کنیسێ و پارێزڤانێن تێکستێن پیرۆز قاییل ببن، ب رەنگەک دن رەوشەنگەرا کار بۆ ڤەگەراندنا مافێن مرۆڤی دکر دوویری هەژموونا تیکستێن پیرۆز ب سایا وێ ڕاستگۆیا رەوشەنگەرا ئەڤرۆ هەموو مرۆڤاهی یا بەرهەمێ وێ دخۆت.

بزاڤا رەوشەنگەری ل رۆژهەڵاتێ و ل کوردستانێ ژی هەتا ئەڤرۆ نەبوویە خودان هێزەکا جەماوەری ئەگەر و هۆکار دمشەنە لێ یا هەری بەرچاڤ چەند ئەگەرەکێن زەق دیارن ژ وانا :

١- بەردەوامیا ڤەخاندنا وان تێکستێن پیرۆز ب گۆتنا وان ب دیدەکا سەردەمیانە کو ئەڤە بخوە بوویە زڤڕین ل دوور بازنا ڤاڵا. ترسا ڤان رەوشەنگەرا ژ هێزا پیرۆزیا وان تێکستان ل ناڤ خەلکی، نەهاتنە ڤەخاندنەکا جوودا بۆ کێشێن جڤاکی و پرسا ماف، ئازادی، دادپەروەری و وەکهەڤی بکەنە خالا کاری.

٢- بەڵاڤەبوونا ئایدۆلۆژیێن نەتەوەی و سیاسی ب تایبەت پرسا سەرخوەبوونێ و داڕمیانا خودانێن ڤان پرۆژان د گوهۆڕینا ژیانا خەلکی دا بۆ باشتربوونێ . هەلبەت خودانێن ڤی پرۆژەی هەتا ئەڤرۆ ل سەر ڤێ خالێ کاردکەن و مل بملێ هێزا کەڤنەشۆپیا دینی ل ناڤ مللەتی کاردکەن و ل کێشێن مللەتی دنەبانە.

٣- ئەڤە خالە ب دیدتنا من گەلەکا گرنگە و پێدڤیە ل سەر بهێتە ڕاوەستان ئەو ژی ئەڤێن ب ناڤ رەوشەنگەر پرانیا وان ژ ئایدۆلۆژیا مارکسی و حزبان هاتنە ئانکو کەسێن ناڤدارن دحزباندا، شکەستنا ئەزموونا مارکسیێ د پرسێن رێڤەبرن و مافاێن تاکان دا و بەڵاڤەبوونا گەندەلی و ئەنتی دیمۆکراتیا حزبێن گەهەشتینە دەستهەڵاتێ ب تایبەت د بیاڤێ بەڵاڤەبوونا گەندەلی و بنپێ بوونا مافێن مرۆڤی و وەڵات کرنە بازارێن شمەکێن بیانیا ب رەنگەک وەسا هەموو سکتەرێن ژیانێ و وەرارا ئابووری بوونە دیلێن کۆمپانیێن جیهانی. مرۆڤ دکارت بێژیت ئەڤرۆ هەموو جیهانا ئیسلامی و کوردستان ژی هاتنەداگیرکرن ژ لایێ ئابووری و کولتۆریڤە مەرەم ژ کولتۆری کو خەلک کریە ئالۆدەیێ تەرزێ ژیانا ئەورۆپی ژ لایێ مەزاختن و جلکاڤە. ژ ئەنجامێ ڤێ سیاسەتا شاشا مارکسی و حزبێن نەتەوەیی و دوور بوونا وان ژ پرسا ب مەدەنیکرنا دەستهەڵاتێ لایێ کەڤنەشۆپی(کەڤنپارێز) باسکێ ئیسلاما سیاسی ب باشی هاتیە بکارئینان و ئەڤرۆ دەڤەر تەڤ کەفتیە بن هەژموونا تێکستێن پیرۆز، جڤاک بەر بلێکترازان و ژبەرێکچوونێڤەیە و رەوشا هەموو وەڵاتێن ئیسلامی وەکهەڤە.

پرۆژێ رەوشەنگەریێ ل رۆژهەڵاتێ شکەستن خاریە ژ بلی وان ئەگەرێن مە ل سەری رۆهنکرین چەندین ئەگەرێن دن هەنە لێ ئەو گەلەک دبەرچاڤن و بوونە سەدەم کو خەلک ل وی پرۆژەی نەبیتە خودان. هندی هێزا رەوشەنگەر ل دوور تێکستێن پیرۆز بزڤڕن و ڤەخاندنێ ب رەنگەک نووی ژی بۆ وان تێکستان بکەت، دێ هەر شکەستن بەهرا وێ بیت. رەوشەنگەری ئانکو دابڕان ژ کەڤنەشۆپی و کولتۆرێ وێ و ڤەگەراندنا شکۆیێ بۆ مرۆڤی ببیتە خالا هەر بزاڤەکا وێ.

ڕەوشنەگەری ژ دەرڤەی ئایدلۆژی و حزبا دهێتە کرن چونکو کار ل سەر ڤەگەراندنا شکۆیێ بۆ مرۆڤی دکەتن و دیلیێ ناپەژرینیت بۆ چ حزب و ئایدۆلۆژیایێ.

پرسا رەوشەنگەریێ پرسەک بنیاتییە بۆ مرۆڤێن رۆژهەڵاتی و رزگارکرنە ژ وەهمێ و ڤەگەراندنا شکۆیێیە بۆ مرۆڤی دویری هەژموونا دین، ئتن، رەنگپێستی، جێندەری و پێکڤەژیانا هەڤدژانە.

ئەڤرۆ ژ هەموو دەما پێتر ئەڤ رۆژهەڵاتە و کوردستان پێدڤی ب هێزا رەوشەنگەریێیە بۆ چارەسەرکرنا هەموو کێشێن مە. بێی سەرکەفتنا پرۆژێ رەوشەنگەریێ ئەڤ رۆژهەڵاتە هەر دێ ل دوور بازنا ڤاڵا زڤریت و کوشتن و شەرێن ناڤخوە دێ دبەردەوام بن و ژ کاروانێ شارستانیێ دڤەقەتای بن.

٢٧-١١-٢٠٢١

پتر به‌رچاڤ بكه‌
Back to top button

ئه‌ڤ مالپه‌ره‌ cookies بكارتینه‌ . ژ بو به‌رده‌وام بونا ب كارئینانا ڤى مالپه‌ری . پێویسته‌ تو بكارئینانا مه‌ بو cookies ب په‌ژرینی 

Close